អង្គភាពពន្ធនាគារខេត្តស្ទឹងត្រែងបំភ្លឺក្រោយមានការចុះផ្សាយថា លោក លឹម វាសនា និងបក្ខពួកបានជំរិតទារប្រាក់ពីជនជាប់ឃុំជាថ្នូរអនុញ្ញាតឲ្យប្រើប្រាស់ទូរស័ព្ទដៃ

(ស្ទឹងត្រែង)៖ ក្រោយមានការបង្ហោះព័ត៌មានតាមគណនី Tik Tok ឈ្មោះ VOK TV កាលពីថ្ងៃទី១២ ខែកុម្ភៈ ឆ្នាំ២០២៦ មានខ្លឹមសារថា៖ «លោក លឹម វាសនា ប្រធានពន្ធនាគារខេត្តស្ទឹងត្រែង រួមនិងបក្ខពួករងការចោទប្រកាន់ថា បានជំរិតទារ ប្រាក់ពីជនជាប់ឃុំ ចាប់ពី ៤០០០ដុល្លា ទៅ៧០០០ដុល្លាក្នុងមួយបន្ទប់ជាថ្នូរ អនុញ្ញាតឲ្យប្រើប្រាស់ទូរស័ព្ទដៃ សូមឯកឧត្តម ស សុខា រដ្ឋមន្ត្រីក្រសួងមហាផ្ទៃចាត់មន្ត្រីជំនាញបើកការស៊ើបអង្កេតករណីខាងលើនេះផង?»។ អង្គភាពពន្ធនាគារខេត្តស្ទឹងត្រែងបំភ្លឺថា អង្គភាពពន្ធនាគារខេត្តស្ទឹងត្រែងតែងតែអនុវត្តតាមច្បាប់ ស្តីពីពន្ធនាគារ បទបញ្ជាផ្ទៃក្នុងពន្ធនាគារ និងសេចក្តីណែនាំរបស់អគ្គនាយកដ្ឋានពន្ធនាគារ យ៉ាងខ្ជាប់ខ្ជួនដោយធ្វើការឆែកឆេរនៅគ្រប់អគារឃុំខ្លួនរបស់ជនជាប់ឃុំដើម្បីស្រាវជ្រាវរកវត្ថុហាមឃាត់ និងទូរស័ព្ទដៃ ចល័តនៅក្នុងអាគារឃុំនីមួយៗជាប្រចាំ ក្នុងគោលបំណងដើម្បីបង្ការទប់ស្កាត់ការលួចនាំចូលវត្ថុហាមឃាត់ ឬទូរស័ព្ទដៃចល័តចូលក្នុងពន្ធនាគារ។ ដោយនៅពេលដែលពន្ធនាគារបានអនុវត្តគោលការណ៍ច្បាប់តឹងរ៉ឹងបែបនេះ ជាហេតុធ្វើឱ្យជនជាប់ឃុំមួយចំនួនមិនពេញចិត្តចំពោះ អង្គភាពពន្ធនាគារខេត្តស្ទឹងត្រែង ទើបធ្វើការដាក់បន្ទុកចុះផ្សាយមកលើអង្គភាពពន្ធនាគារបែបនេះ។ នេះបើតាមសេចក្ដីបំភ្លឺរបស់អង្គភាពពន្ធនាគារខេត្តស្ទឹងត្រែងដែលអង្គភាព The Mirror News ទទួលបាននៅថ្ងៃទី១២ ខែកុម្ភៈ ឆ្នាំ២០២៦ម្សិលមិញនេះ។

ជុំវិញករណីនេះ អង្គភាពពន្ធនាគារខេត្តស្ទឹងត្រែងក៏បានធ្វើការបដិសេធចំពោះការចុះផ្សាយខាងលើ ដោយពន្ធនាគារខេត្តស្ទឹងត្រែងពុំដែលបានចេញសេចក្តីសម្រេចណាមួយឱ្យយកសេវាប្រើប្រាស់ទូរស័ព្ទដៃចល័តនៅក្នុងពន្ធនាគារឡើយ មានតែធ្វើការហាមឃាត់ និងស្រាវជ្រាវចំពោះ ជនជាប់ឃុំលួចលាក់ប្រើប្រាស់ទូរស័ព្ទដៃចល័តក្នុងពន្ធនាគារ។ ក្នុងករណីរកឃើញការល្មើសនឹងបទបញ្ជាផ្ទៃក្នុង ពន្ធនាគារអង្គភាពពន្ធនាគារនឹងធ្វើដាក់វិន័យចំពោះដល់ជនជាប់ឃុំដែលលួចលាក់ប្រើប្រាស់ទូរសព្ទដៃចល័ នោះផងដែរ។ បច្ចុប្បន្ន អង្គភាពពន្ធនាគារខេត្តស្ទឹងត្រែងកំពុងតាមដាន និងធ្វើការស្រាវជ្រាវចំពោះករណីនេះ ដោយបានរកឃើញរបស់ហាមឃាត់មួយចំនួន និងកំពុងស្វែងរកអ្នកដែលពាក់ព័ន្ធប្រព្រឹត្តិបទល្មើសបន្ថែមទៀត ដើម្បីអនុវត្តតាមច្បាប់។

ពាក់ព័ន្ធករណីខាងលើនេះ សូមសាធារណជន និងបណ្តាញសារព័ត៌មានទាំងអស់មេត្តាជ្រាប និងសូមកុំមានការភាន់ច្រឡំដូចខ្លឹមសារគណនី Tik Tok ឈ្មោះ VOK TV ដែលបានចុះផ្សាយ៕