រដ្ឋបាលឃុំព្រែកថ្មីបានបញ្ជាក់ថា ផ្លូវដែលប្រជាពលរដ្ឋស្នើសុំចូលគ្រុបតេឡេក្រាមខេត្តកណ្តាលគឺជាផ្លូវកណ្តាលចុងដីសម្រាប់ធ្វើដំណើរទៅចម្ការ មិនទាន់មានផ្ទះប្រជាពលរដ្ឋរស់នៅទេ!
(កណ្ដាល)៖ រដ្ឋបាលឃុំព្រែកថ្មីបានបញ្ជាក់ជូនលោក ឆែ វណ្ណឌី អភិបាលស្រុកកោះធំស្តីពីផ្លូវបេតុងមួយខ្សែ ស្ថិតនៅភូមិកំពង់ស្វាយក្រោមខាងក្រោយវិទ្យាលយ័ ហ៊ុន សែន កោះធំ ដែលប្រជាពលរដ្ឋស្នើសុំចូលគ្រុបតេឡេក្រាមខេត្តកណ្តាលថា ផ្លូវនោះគឺជាផ្លូវកណ្តាលចុងដីសម្រាប់ធ្វើដំណើរទៅចម្ការ មិនទាន់មានផ្ទះប្រជាពលរដ្ឋរស់នៅទេ។
ការបញ្ជាក់របស់រដ្ឋបាលឃុំព្រែកថ្មី ក្រោយពីប្រជាពលរដ្ឋរស់នៅភូមិកំពុងស្វាយក្រោម ឃុំព្រែកថ្មី ស្រុកកោះធំ ខេត្តកណ្តាល ស្នេីសុំលោកអភិបាលខេត្តកណ្ដាលនូវផ្លូវបេតុងចំនួនមួយខ្សែ ដែលមានទីតាំងនៅក្បែរនិងវិទ្យាល័យ ហ៊ុន សែន កោះធំ ដោយសារតែផ្លូវនេះពិបាកជិះពេក នៅក្នុងគ្រុបតេឡេក្រាមខេត្តកណ្តាល។
ប្រភពពីរដ្ឋបាលឃុំព្រែកថ្មីបានបន្តថា កាលពីថ្ងៃទី៣០ ខែមករា ឆ្នាំ២០២៦ ក្រុមប្រឹក្សាឃុំបានប្រជុំពិភាក្សា និងអនុមត័ជ្រើសរើសគម្រោងមូលនិធិឃុំឆ្នាំ២០២៦គឺបានឯកភាពគ្នាធ្វើគម្រោងជួសជុលផ្លូវបេតុងអាមេដែលជាគម្រោងអាទិភាពស្ថិតនៅក្នុងភូមិឱ្យអស់ជាមុនសិន ចំណែកផ្លូវតាមចុងដី និងផ្លូវតាមមាត់ព្រែកឆ្ពោះទៅចម្ការ ទុកធ្វើនៅពេលក្រោយ៕
