ចាប់ឃាត់ខ្លួនវ៉ៃខ្នោះមុខសញ្ញាជួញដូរគ្រឿងញៀនខុសច្បាប់បាន៧នាក់ទៀតហើយ!

(បាត់ដំបង)៖ នៅថ្ងៃទី០២ ខែកុម្ភៈ ឆ្នាំ២០២៦ វេលាម៉ោង០៧៖៤០នាទី នៅចំណុចភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង កម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលស្រុករតនមណ្ឌលដឹកនាំដោយលោកវរសេនីយ៍ឯក សន និល អធិការនគរបាលស្រុករតនមណ្ឌលបានចុះប្រតិបត្តិការបង្ក្រាបបានករណីរក្សាទុក ដោយខុសច្បាប់នូវសារធាតុញៀន ០១ករណី ក្នុងបទល្មើសជាក់ស្តែង។

ក្នុងកិច្ចប្រតិបត្តិការនេះ សមត្ថកិច្ចឃាត់ខ្លួនជនសង្ស័យម្នាក់ ឈ្មោះ ជិន ចយ ហៅឡុញ ភេទប្រុស អាយុ៤៧ឆ្នាំ ស្នាក់នៅបណ្តោះអាសន្នភូមិអូរ៧៥ ឃុំអូរអណ្ដូង ស្រុកសាលាក្រៅ ខេត្តប៉ៃលិន នាំមកកាន់អធិការដ្ឋាននគរបាលស្រុករតនមណ្ឌល។ វត្ថុតាងចាប់យកបានរួមមាន៖ ថ្នាំញៀនប្រភេទមេតំហ្វេតាមីន (ម៉ាទឹកកក ICE) ចំនួន០១ថង់, ទូរស័ព្ទដៃចំនួន ០១គ្រឿង, ម៉ូតូចំនួន ០១គ្រឿង មិនស្គាល់ម៉ាក ពាក់ស្លាកលេខ បាត់ដំបង 1F-7638 (ចាស់)។

ឆ្លងតាមចម្លើយសារភាពរបស់ជនសង្ស័យខាងលើ និងដោយមានការអនុញ្ញាតពីលោកឧត្តមសេនីយ៍ទោស្នងការនៃស្នងការដ្ឋាននគរបាលខេត្តបាត់ដំបង និងមានការសម្របសម្រួលនីតិវិធីពីលោក មាស ចាន់ពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្តបាត់ដំបង កម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលស្រុករតនមណ្ឌល សហការជាមួយនគរបាលប៉ុស្តិ៍រដ្ឋបាលអូរអណ្ដូង នៃអធិការដ្ឋាននគរបាលស្រុកសាលាក្រៅ ខេត្តប៉ៃលិន បានបន្តកិច្ចប្រតិបត្តិការ រហូតឈានដល់ចាប់ឃាត់ខ្លួនជនសង្ស័យបានចំនួន ០៦នាក់ទៀត នៅចំណុចភូមិអូរ៧៥ ឃុំអូរអណ្តូង ស្រុកសាលាក្រៅ ខេត្តប៉ៃលិន នៅថ្ងៃខែឆ្នាំដដែល វេលាម៉ោង១១៖៣០នាទី។

សមត្ថកិច្ចឃាត់ខ្លួនជនសង្ស័យ០៦នាក់៖ *១-ឈ្មោះ អាត សុខា ភេទប្រុស អាយុ៣៥ឆ្នាំ រស់នៅភូមិអូរ៧៥ ឃុំអូរអណ្តូង ស្រុកសាលាក្រៅ ខេត្តប៉ៃលិន, *២-ឈ្មោះ អាត រតនា ភេទប្រុស អាយុ២១ឆ្នាំ រស់នៅភូមិអូរ៧៥ ឃុំអូរអណ្តូង ស្រុកសាលាក្រៅ ខេត្តប៉ៃលិន, *៣-ឈ្មោះ ហេង ពៅ ភេទប្រុស អាយុ២៥ឆ្នាំ រស់នៅភូមិអូរ៧៥ ឃុំអូរអណ្តូង ស្រុកសាលាក្រៅ ខេត្តប៉ៃលិន, *៤-ឈ្មោះ លី ឆៃយ៉ា ហៅ ពាង ភេទប្រុស អាយុ៣៥ឆ្នាំ រស់នៅភូមិអូរ៧៥ ឃុំអូរអណ្តូង ស្រុកសាលាក្រៅ ខេត្តប៉ៃលិន, *៥-ឈ្មោះ ពេជ្រ វណ្ណ: ភេទប្រុស អាយុ៣៥ឆ្នាំ រស់នៅភូមិកូនដំរីក្រោម ឃុំស្ទឹងត្រង់ ស្រុកសាលាក្រៅ ខេត្តប៉ៃលិន និង*៦-ឈ្មោះ ទឹយ គីម ភេទប្រុស អាយុ៤២ឆ្នាំ រស់នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នាំមកកាន់អធិការដ្ឋាននគរបាលស្រុករតនមណ្ឌល ។ វត្ថុតាងចាប់យកបានរួមមាន៖ ថ្នាំញៀនប្រភេទមេតំហ្វេតាមីន (ម៉ាទឹកកក ICE) ចំនួន០៦ថង់, ថ្នាំគ្រាប់រាងមូលសំប៉ែតពណ៌ក្រហម មានត្រាអក្សរបរទេសWY ចំនួន ០១គ្រាប់កន្លះ, កញ្ឆាក្រៀមមួយចំនួន, ជញ្ជីងសម្រាប់ថ្លឹងថ្នាំញៀន ចំនួន ០១គ្រឿង, សម្ភារៈសម្រាប់ច្រកចែករំលែកលក់ថ្នាំញៀន និងសម្ភារៈសម្រាប់ប្រើប្រាស់ថ្នាំញៀនមួយចំនួន និងទូរស័ព្ទដៃចំនួន ០១គ្រឿង។

បច្ចុប្បន្នកម្លាំងអធិការដ្ឋាននគរបាលស្រុករតនមណ្ឌលកំពុងកសាងសំណុំរឿងបញ្ជូនទៅការិយាល័យជំនាញខេត្តដើម្បីចាត់វិធានការតាមនីតិវិធី៕