សំណង់ខារ៉ាអូខេរំលោភប្រឡាយរដ្ឋ និងសំណង់អាគាររោងចក្រ ចំនួន២កន្លែង នៅស្រុកស្អាង កំពុងត្រូវបានគេសាងសង់ទាំងអត់មានច្បាប់ត្រឹមត្រូវ ខណៈលោកចៅហ្វាយស្រុក ជឺ គឹមហៃ បានឆ្លើយថា ខារ៉ាអូខេគាត់ កំពុងតែដាក់ច្បាប់ចូលច្រកហើយ!

(កណ្ដាល)៖ ទីតាំងសំណង់ខារ៉ាអូខេមួយកន្លែងនៅភូមិព្រែកស្នង ឃុំព្រែកគយ ស្រុកស្អាង ខេត្តកណ្ដាលត្រូវបានគេរាយការណ៍មកថា កំពុងសាងសង់អត់មានច្បាប់ត្រឹមត្រូវនោះទេ ថែមទាំងបានសង់រំលោភយកដីព្រែកទៀតផង និងបានកំពុងសាងសង់ជិតរួចរាល់ទៅហើយ។

ជុំវិញករណីនេះ លោក ជឺ គឹមហៃ អភិបាលស្រុកស្អាងបានប្រាប់ឱ្យអង្គភាព The Mirror News ដឹងនៅព្រឹកថ្ងៃទី២២ ខែមករា ឆ្នាំ២០២៦នេះ ថា ខារ៉ាអូខេខាងលើ់នេះ ម្ចាស់ទីតាំងកំពុងដាក់សុំច្បាប់នៅច្រកហើយ។ លោកបន្តថា ចំពោះការលុបប្រឡាយ ក្រុមការងារបច្ចេកទេសបានចុះទៅពិនិត្យទីតាំងរួចហើយ ដោយសារមួយរយៈនេះ មានបងប្អុនសួរនាំ លោកក៏បានឱ្យជំនាញចុះទៅនិងបំភ្លឺជូនរួចហើយ។

លោកអភិបាលស្រុករូបនេះ បានប្រាប់ឱ្យដឹងទៀតថា លោកអត់ប្រាកដទេ ថាតើគេសាងសង់ប៉ុន្មានបន្ទប់ រឿងជំនាញ លោកមិនអាចឆ្លើយថា ប៉ុន្មានបន្ទប់បានទេ ឃើញជាក់ស្ដែងប៉ុន្មានគឺប៉ុណ្ណឹងហើយ។

ពាក់ព័ន្ធករណីសំណង់អាគាររោងចក្រមួយកន្លែងទៀត ដែលត្រូវបានសេចក្ដីរាយការណ៍មកថា កំពុងសាងសង់អត់មានច្បាប់ត្រឹមត្រូវដែរនោះគឺស្តិតនៅភូមិតានូ ឃុំស្អាងភ្នំ ស្រុកស្អាង ខេត្តកណ្ដាល ដែលមើលទៅ ឃើញថា មានសកម្មភាពកំពុងដំណើរការយ៉ាងសកម្ម មានកម្មករប្រមាណជា៥០នាក់ ក្នុងនោះ មានទាំងជនបរទេស ជាជនជាតិបង់ក្លាដែសជាង២០នាក់ទៀតផង។

ជុំវិញករណីខាងលើនេះ លោក អ៊ឹម ប៊ុនថុល អភិបាលរងស្រុកស្អាងបានឆ្លើយប្រាប់អ្នកកាសែតនៅថ្ងៃទី២២ ខែមករា ឆ្នាំ២០២៦នេះថា ក្រុមហ៊ុនសំណង់ខាងលើនេះ បានដាក់ពាក្យសុំទៅដល់មន្ទីរជំនាញរួចហើយ។

ពាក់ព័ន្ធការសាងសង់អត់ទាន់មានច្បាប់នេះដែរ លោក អ៊ឹម ប៊ុនថុល បាននិយាយថា នេះគឺជាការយោគយល់និងជាការលើកទឹកចិត្តដល់អ្នកវិនិយោគ។ ការលើក ទឹកចិត្តចំពោះការរកស៊ីនៅក្នុងប្រទេស។

បើតាមប្រភពនៅកន្លែងសំណង់ខាងលើនេះបានខ្សឹបឱ្យដឹងថា ថៅកែជនជាតិចិនបានចេញទៅក្រៅប្រទេសបាត់ហើយ ហើយសំណង់នេះក៏មិនទាន់មានការអនុញ្ញាតច្បាប់ ជាផ្លូវការនៅឡើយដែរ។ លោកបន្តថា ខាងកម្មករដឹងតែពីធ្វើការងារប៉ុណ្ណោះ ហើយមានកម្មករប្រហែលជិត៥០នាក់ ក្នុងនោះក៏មានជនជាតិបង់ក្លាដែសជាង២០នាក់ផងដែរ។

ប្រភពពីអ្នកចេះ យល់ដឹងពីផ្នែកច្បាប់និយាយឱ្យដឹងថា ការលើកឡើងរបស់លោក អ៊ឹម ប៊ុលថុល អភិបាលរងស្រុកស្អាង មិនមែនជាការត្រឹមត្រូវទេ។ អ្វីដែលសំខាន់គឺត្រូវគោរពច្បាប់ឲ្យបានម៉ត់ចត់ ហើយការសុំច្បាប់ដើម្បីសាងសង់ក៏មិនមែនជាបញ្ហាដែលត្រូវខកខាន ឬអូសបន្លាយនោះដែរ៕