អង្គភាព​ The Mirror News សុំកែតម្រូវខ្លឹមសារដែលបានចុះផ្សាយកាលពីថ្ងៃទី៥​ ខែមេសា ឆ្នាំ២០២៥ថា «ការលក់ដូរលើចិញ្ចើមផ្លូវសាធារណៈ នៅមាត់ទន្លេក្រុងតាខ្មៅ ខេត្តកណ្តាល គ្មានសណ្តាប់ធ្នាប់ និង របៀបរៀបរយ»

(កណ្ដាល)៖ រដ្ឋបាលខេត្តកណ្ដាលបានចេញសេចក្ដីជូនដំណឹងលេខ៖ ០០៦/២៦សជណ ចុះថ្ងៃទី០៥​ ខែមករា ឆ្នាំ២០២៦ថា ការចុះផ្សាយរបស់គេហទំព័រ The Mirror News ដែលមានខ្លឹមសារថា «ការលក់ដូរលើចិញ្ចើមផ្លូវសាធារណៈ នៅមាត់ទន្លេក្រុងតាខ្មៅ ខេត្តកណ្តាល គ្មានសណ្តាប់ធ្នាប់ និង របៀបរៀបរយ» ពុំមែនជាការពិតទេ និងបានស្នើឱ្យគេហទំព័រ The Mirror News កែតម្រូវខ្លឹមសារដែលបានចុះផ្សាយកាលពីថ្ងៃទី៥ ខែមេសា ឆ្នាំ២០២៥ នោះវិញ។ នេះបើតាមសេចក្ដីជូនដំណឹងដែលបណ្ដាញសារព័ត៌មាន The Mirror News ទើបទទួលបាននៅព្រឹកថ្ងៃទី១៤​ ខែមករា ឆ្នាំ២០២៦នេះ។

រដ្ឋបាលខេត្តកណ្ដាលបានបញ្ជាក់ថា រដ្ឋបាលខេត្តបានប្រគល់ភាកិច្ចជូនរដ្ឋបាលក្រុងតាខ្មៅ សហការជាមួយកងកម្លាំងមានសមត្ថកិច្ច និងរដ្ឋបាលសង្កាត់តាខ្មៅ ចុះអនុវត្តការងារជាញឹកញាប់ ស្របតាមការងារជាសមត្ថកិច្ចរបស់ខ្លួន រួមមានការចុះផ្សព្វផ្សាយអំពីបរិស្ថានអនាម័យ ការចុះរៀបចំសណ្តាប់ធ្នាប់ នៅទីតាំងជាក់ស្តែង ហើយមានម្តងម្កាលក្នុង ករណីមិនរាងចាលក៏ឈានដល់ការចាប់យករទេះលក់ដូរទុកជាការ ព្រមានផងដែរ។

រដ្ឋបាលខេត្តបានបញ្ជាក់បន្តថា កន្លងមក រដ្ឋបាលក្រុង-សង្កាត់ បានចេញសេចក្តីជូនដំណឹង ព្រមទាំងបានចុះចែកផ្សព្វផ្សាយដល់ដៃ អាជីវករ និងផ្សព្វផ្សាយតាមរយៈឧបករណ៍បំពងសំឡេងចាក់តាមរថយន្ត រួមមានសេចក្តីជូនដំណឹងលេខ ១៦២២/២២ ស.ជ.ណ ចុះថ្ងៃទី៤ ខែតុលា ឆ្នាំ២០២២ របស់រដ្ឋបាលសង្កាត់តាខ្មៅ ស្តីពីការកំណត់ពេលវេលា ការធ្វើអាជីវកម្ម លក់ដូរ នៅតាមផ្លូវសំខាន់ៗ ក្នុងសង្កាត់តាខ្មៅ, សេចក្តីជូនដំណឹងលេខ ០៥៧/២៣ ស.ជ.ណ ចុះថ្ងៃទី១៧ ខែមករា ឆ្នាំ២០២៣ របស់រដ្ឋបាលសង្កាត់តាខ្មៅ ស្តីពីការកំណត់ពេលវេលាការធ្វើអាជីវកម្មលក់ដូរ នៅតាមដងផ្លូវសំខាន់ៗ ក្នុងសង្កាត់តាខ្មៅ, សេចក្តីជូនដំណឹងចុះថ្ងៃទី២៣ ខែឧសភា ឆ្នាំ២០២៤ របស់រដ្ឋបាលក្រុងតាខ្មៅ ស្តីពីការរៀបចំ សណ្តាប់ធ្នាប់ របៀបរៀបរយសាធារណៈ និងបរិស្ថាន អនាម័យ នៅចំណុចសួនច្បារមាត់ទន្លេបាសាក់ ក្រុងតាខ្មៅ និងសេចក្តីជូនដំណឹងលេខ ០២១/២៥ ស.ត.ខ ចុះថ្ងៃទី៣១ ខែមករា ឆ្នាំ២០២៥ របស់រដ្ឋបាលសង្កាត់តាខ្មៅ ស្តីពីការរៀបចំសណ្តាប់ធ្នាប់ របៀបរៀបរយតាមសួនច្បារមាត់ទន្លេបាសាក់។

រដ្ឋបាលខេត្តកណ្ដាលបានបញ្ជាក់ទៀតថា ទោះបីជាមានការចេញនូវលិខិតជូនដំណឹងខាងលើ និងការធ្វើសកម្មភាពចុះរៀបចំជាក់ស្តែងពិតមែនក៏ដោយ គឺនៅតែមានអ្នកលក់ដូរមួយចំនួន មិនបានចូលរួមសហការ និងលក់ដូរមិនមានសណ្តាប់ធ្នាប់ នៅពេល ដែលកម្លាំងរៀបចំសណ្តាប់ធ្នាប់ដកចេញវិញ ឬពេលម៉ោងសម្រាកពីការងារជាដើម ហើយករណីនេះ រដ្ឋបាល ក្រុង-សង្កាត់តាខ្មៅ នឹងពិនិត្យសិក្សា រៀបចំជាផែនការ សកម្មភាពការងារបន្ថែម ដើម្បីចាត់ចែងរៀបចំឱ្យសណ្តាប់ធ្នាប់ កាន់តែមានភាពល្អប្រសើរជាងមុនបន្ថែមទៀត។

រដ្ឋបាលខេត្តបានបញ្ជាក់បន្ថែមថា ចំពោះករណីលើកឡើងថា “បានត្រឹមតែចាត់បុរសចំណាស់ម្នាក់ឱ្យ ទៅប្រមូលយកលុយពីអាជីវករតែប៉ុណ្ណោះ” គឺរដ្ឋបាលក្រុង-សង្កាត់តាខ្មៅ មិនដែលបានពាក់ព័ន្ធនឹងករណីនោះទេ ហើយតាមការស្រាវជ្រាវឃើញថា កន្លងមក គឺមានខាងក្រុមហ៊ុន ស៊ីន ទ្រី ដែលបានចាត់បុគ្គលិករបស់ខ្លួន ប្រមូល ថវិកាថ្លៃសេវាប្រមូលសំរាមពីការលក់ដូរចល័តស្របតាមតម្លៃ ក្នុងប្រកាសអន្តរក្រសួងលេខ ១៩៥ ប្រក.ប.ស្ថ ចុះថ្ងៃទី៦ ខែមិថុនា ឆ្នាំ២០១៨ របស់ក្រសួងបរិស្ថាន ក្រសួងសេដ្ឋកិច្ច និងហិរញ្ញវត្ថុ និងក្រសួងមហាផ្ទៃ។

គួររំលឹកជូនថា កាលពីថ្ងៃទី០៥ ខែមេសា ឆ្នាំ២០២៥ បណ្ដាញសារព័ត៌មាន​ The Mirror News បានចុះផ្សាយដោយមានខ្លឹមសារទាំងស្រុងថា «បញ្ហាការលក់ដូរលើចិញ្ចើមផ្លូវ រំលោភលើចំណីផ្លូវសាធារណៈ និងភាពអាណាធិបតេយ្យនៅមាត់ទន្លេក្រុងតាខ្មៅ តើគេបង់លុយឲ្យលោកចៅហ្វាយក្រុងនិងចៅសង្កាត់តាខ្មៅមួយថ្ងៃប៉ុន្មានរៀល ទើបមិនរៀបចំឲ្យមានសណ្ដាប់?

(កណ្ដាល)៖ មាត់ទន្លេក្រុងតាខ្មៅគួរតែជាតំបន់អភិវឌ្ឍន៍ល្អ ស្អាត អនាម័យ និងមានសណ្តាប់ធ្នាប់ ដើម្បីជាសួនច្បារសាធារណៈ និងកន្លែងទាក់ទាញទេសចរណ៍។ ទោះជាយ៉ាងណា ការចម្អិនចំណីអាហារផ្សេងៗនិងការលក់ដូរដោយមិនមានការរៀបចំល្អនៅលើចិញ្ចើមផ្លូវពិតជាបានបណ្តាលឲ្យមានភាពអាណាធិបតេយ្យ ដែលប៉ះពាល់ដល់សណ្តាប់ធ្នាប់សាធារណៈ សណ្ដាប់ធ្នាប់ទីក្រុង និងបរិស្ថានរស់នៅយ៉ាងពិតប្រាកដ។ នេះបើតាមប្រភពពីប្រជាពលរដ្ឋដែលស្រឡាញ់សណ្ដាប់ធ្នាប់សាធារណៈប្រាប់ឲ្យអង្គភាព The Mirror News ដឹងកាលពីល្ងាចថ្ងៃទី៤ ខែមេសា ឆ្នាំ២០២៥ម្សិលមិញនេះ។

ប្រភពបានបន្តថា ការលក់ដូរលើចិញ្ចើមផ្លូវដោយគ្មានការគ្រប់គ្រងឲ្យបានត្រឹមត្រូវ ហើយឃើញតែមានបុរសចំណាស់ម្នាក់ជិះម៉ូតូម៉ាក ភីស៊ីអិច ពណ៌ស ដើរតែប្រមូលយកលុយពីក្រុមអ្នកលក់ដូរដែលសង្ស័យអាចជាថ្នូរនឹងការធ្វើមិនដឹងមិនឮឬយ៉ាងណា វាពិតជាបានបណ្តាលឲ្យបាត់បង់សណ្ដាប់ធ្នាប់ផ្លូវសាធារណៈ និងអាចបណ្ដាលឲ្យមានគ្រោះអាសន្នចំពោះចរាចរណ៍ដោយប្រការណាមួយទៀតផង។ ព្រោះផ្លូវដែលគួរតែអាចប្រើប្រាស់សម្រាប់អ្នកថ្មើរជើងនិងយានយន្ត ត្រូវបានកាន់កាប់ដោយអ្នកលក់ដូរ។ អ្នកថ្មើរជើងត្រូវបង្ខំឲ្យដើរលើទ្រូងផ្លូវឬសាច់ផ្លូវដែលបង្កឲ្យមានហានិភ័យខ្ពស់នៃគ្រោះថ្នាក់ចរាចរណ៍។ ហើយម្យ៉ាងទៀតការដាក់តុ និងរទេះលក់យ៉ាងអាណាធិបតេយ្យបានធ្វើឲ្យមានភាពរញ៉េរញ៉ៃជាខ្លាំង។

ប្រភពពីអ្នកដើរលេងកំសាន្តតាមមាត់ទន្លេតាខ្មៅបានឲ្យដឹងដែរថា មាត់ទន្លេគួរតែជាតំបន់មានអនាម័យ និងទាក់ទាញ ប៉ុន្តែដោយសារការលក់ដូរយ៉ាងធូររលុងបានបណ្តាលឲ្យមានគំនរសំរាម និងប៉ះពាល់ដល់បរិស្ថាន។ ព្រោះធុងសំរាមមិនមានការគ្រប់គ្រងបានល្អ បណ្ដាលឲ្យមានក្លិនស្អុយ មានសំរាម និងទឹកស្អុយលេចធ្លាយចេញពីចំណីអាហារកាកសំណល់បង្កឲ្យបរិស្ថានកាន់តែអាក្រក់។ ម្យ៉ាងទៀតអ្នកលក់មួយចំនួនចម្អិនម្ហូបអាហារមិនមានលិខិតអនុញ្ញាត និងមិនមានការកំណត់ផ្លូវការឲ្យបានត្រឹមនោះទេ។

ប្រភពបានបន្ថែមថា អាជ្ញាធរក្រុងតាខ្មៅមិនមានការគ្រប់គ្រងយ៉ាងតឹងរ៉ឹងលើបញ្ហាខាងលើនេះ ហើយការអនុញ្ញាតឲ្យមានការលក់ដូរបែបនេះបានប៉ះពាល់ដល់រដ្ឋបាលទីក្រុងតាខ្មៅ ឬមួយអាជ្ញាធរមិនមានផែនការច្បាស់លាស់សម្រាប់ការបែងចែកតំបន់លក់ដូរទេ?។

ប្រភពបន្តថា ការអនុញ្ញាតឲ្យមានភាពធូររលុងបែបនេះ បានបង្ហាញពីការមិនមានការគ្រប់គ្រងល្អ និងអាចបណ្តាលឲ្យមានភាពអយុត្តិធម៌ក្នុងការចែកសិទ្ធិអាជីវកម្ម។ ហើយក៏មិនមានការពិន័យ ឬផែនការដកហូតអ្នកលក់ដែលស្ថិតនៅតំបន់មិនអនុញ្ញាតទៀតផង។

ប្រភពផ្សេងទៀតបានឲ្យដឹងថា ដើម្បីស្ដារសណ្តាប់ធ្នាប់នៅមាត់ទន្លេ អាជ្ញាធរគួរតែមានវិធានការត្រឹមត្រូវ ដោយគួរកំណត់តំបន់អាជីវកម្ម បែងចែកលំនៅដ្ឋាន អាជីវកម្ម និងផ្លូវសាធារណៈឲ្យបានច្បាស់លាស់។ បង្កើនការគ្រប់គ្រងសណ្តាប់ធ្នាប់ ដាក់អនុលោមន័យលើការលក់ដូរដោយបែងចែកតំបន់ពិសេសសម្រាប់អាជីវកម្ម។ អនុវត្តបទបញ្ជាថ្មី ការប្រកាសបទបញ្ជាជាផ្លូវការដើម្បីដាក់ពិន័យលើអ្នកលក់ដែលមិនអនុវត្តស្តង់ដារ។ ឬបង្កើតកន្លែងលក់ដូរត្រឹមត្រូវ បើសិនជាអាជ្ញាធរចង់ផ្តល់ឱកាសដល់អ្នកលក់ គួរតែមានទីតាំងពិសេសសម្រាប់ពួកគេដែលមិនប៉ះពាល់ដល់សណ្តាប់ធ្នាប់ទីក្រុង។

ប្រភពពីអ្នកដើរហាត់ប្រាណបានឲ្យដឹងដែរថា ការលក់ដូរលើចិញ្ចើមផ្លូវនៅមាត់ទន្លេក្រុងតាខ្មៅបានប៉ះពាល់យ៉ាងខ្លាំងដល់សណ្តាប់ធ្នាប់ទីក្រុង បរិស្ថាន និងសុវត្ថិភាពសាធារណៈ។ អាជ្ញាធរគួរមានវិធានការច្បាស់លាស់ ដើម្បីស្ដារសណ្តាប់ធ្នាប់ និងធ្វើឲ្យទីក្រុងអភិវឌ្ឍតាមផ្លូវត្រឹមត្រូវ។ ប្រសិនបើមិនមានការរៀបចំល្អ ទីតាំងមាត់ទន្លេនឹងបន្តមានភាពអាណាធិបតេយ្យ និងបាត់បង់ឱកាសអភិវឌ្ឍន៍អនាគត។

ជុំវិញភាពគ្មានសណ្ដាប់ធ្នាប់ខាងលើនេះ សាធារណជនបានសំនូមពរយ៉ាងទទូចស្នើសុំឲ្យចៅហ្វាយខេត្តកណ្ដាល លោក គួច ចំរើន មេត្តាជួយដាក់បទបញ្ជាឲ្យតឹងរ៉ឹង និងជួយអន្តរាគមន៍រំដោះយកចិញ្ចើមផ្លូវសាធារណៈមកវិញឲ្យខាងតែបានផង និងជួយជំរុញឲ្យចៅហ្វាយក្រុងតាខ្មៅ លោក ឃឹម សំភារ និងលោកចៅសង្កាត់តាខ្មៅដែលកំពុងមានរឿងមិនល្អជាប់ខ្លួនឲ្យចុះរៀបចំសណ្ដាប់ អនាម័យ បរិស្ថានតាមមាត់ទន្លេតាខ្មៅឲ្យបានប្រសើរឡើងវិញផង និងស្នើសុំជួយដាក់ពិន័យដល់បុរសម្នាក់ដែលជិះម៉ូតូ ភី ស៊ី អិច ដើរយកលុយគេតាមកន្លែងលក់ដូររៀងរាល់ថ្ងៃ រាប់ខែ រាប់ឆ្នាំមកហើយ និងប្រមូលបានលុយរាប់សិបលានរៀលមកហើយ ដែលប្រភពខ្សឹបឲ្យដឹងថា ជាកូនចៅ ជាដៃជើងរបស់ចៅសង្កាត់តាខ្មៅតែម្ដង៕»