រដ្ឋបាលខេត្តស្វាយរៀងបំភ្លឺរឿងរ៉ឺម៉កម៉ូតូដឹកទ្រុងមានមនុស្សនៅខាងក្នុង!

(ស្វាយរៀង)៖ នៅពេលថ្មីៗនេះ ក្រោយមានការបង្ហោះផ្សាយវីដេអូ តាមបណ្តាញសង្គមហ្វេសប៊ុក (Facebook) និងតិតុក (TikTok) ការបញ្ចេញមតិ (Comment) និងការចែករំលែក (Share) ព្រមទាំងបណ្តាញសារព័ត៌មានមួយចំនួន ពាក់ព័ន្ធករណី រ៉ឺម៉កម៉ូតូដឹកទ្រុងមានមនុស្សនៅខាងក្នុងទ្រុង ស្ថិតនៅក្រុងបាវិត ខេត្តស្វាយរៀង។ នៅថ្ងៃទី១០ ខែមករា ឆ្នាំ២០២៦នេះ រដ្ឋបាលខេត្តស្វាយរៀងបញ្ជាក់ថា បន្ទាប់ពីទទួលបានព័ត៌មានដែលបានបង្ហោះ អធិការដ្ឋាននគរបាលក្រុងបាវិត បានចុះធ្វើការស្រាវជ្រាវ និងបានរកឃើញម្ចាស់ទ្រុងខាងលើ និងបានសាកសួរព័ត៌មានគាត់បានបំភ្លឺថា ទ្រុងដែលបានដឹកនេះ គឺគាត់ធ្វើដើម្បីទុកចិញ្ចឹមសត្វទេ តែនៅពេលដឹកយកមកទុកនៅផ្ទះ ដោយសាររ៉ឺម៉កតូចជិះមិនអស់គ្នា កម្មករដែលដឹកទ្រុងមកនាំគ្នាចូលអង្គុយក្នុងទ្រុង។ នៅពេលដឹកមកផ្ទះតាមផ្លូវក៏មានអ្នកថតបង្ហោះធ្វើឱ្យមានការភ័នច្រឡំ។

បន្ទាប់ពីសាកសួរ និងស្តាប់ការបំភ្លឺរបស់ម្ចាស់ទ្រុងខាងលើរួចមក អាជ្ញាធរបានធ្វើការអប់រំ ណែនាំគាត់ កុំឱ្យដឹកទ្រុងដោយមានមនុស្សជិះខាងក្នុងបែបនេះទៀត នាំឱ្យសាធារណជនមានការភ័នច្រឡំ៕