អភិបាលខេត្តកណ្ដាលដឹកនាំប្រជុំពិនិត្យ ពិភាក្សា ករណីសំណើសុំកែសម្រួលព្រំប្រទល់រដ្ឋបាលរបស់ក្រុងសំពៅពូន ស្រុកលើកដែក និងស្រុកកោះធំ 

(កណ្តាល)៖ លោក គួច ចំរើន អភិបាលខេត្តកណ្ដាល នៅព្រឹកថ្ងៃទី៨ ខែមករា ឆ្នាំ២០២៦នេះ បានអញ្ជើញដឹកនាំក្នុងកិច្ចប្រជុំពិនិត្យ ពិភាក្សា ករណីសំណើសុំកែសម្រួលព្រំប្រទល់រដ្ឋបាលរបស់ក្រុងសំពៅពូន ស្រុកលើកដែក និងស្រុកកោះធំ ដោយមានការអញ្ជើញចូលរួមពីបណ្ដាមន្ទីរអង្គភាពពាក់ព័ន្ធ អាជ្ញាធរក្រុង-ស្រុក ឃុំ-សង្កាត់ និងមន្ត្រីជំនាញផងដែរ។

លោក គួច ចំរើន បានស្នើដល់អង្គប្រជុំទាំងមូល ត្រូវរួមគ្នាផ្តល់ជាមតិយោបល និងទិន្នន័យក្នុងការកំណត់ព្រំប្រទល់របស់រដ្ឋបាល ក្រុង ស្រុក ឃុំ សង្កាត់ ដែលមិនទាន់មានភាពច្បាស់លាស់ សំដៅរួមគ្នាធ្វើការកែសម្រួលឱ្យបានសមស្រប ដើម្បីផ្តល់ភាពងាយស្រួលក្នុងការគ្រប់គ្រង និងការបម្រើសេវាសាធារណៈជូនប្រជាពលរដ្ឋបានកាន់តែមានប្រសិទ្ធភាពខ្ពស់។

លោកអភិបាលខេត្តបានជំរុញដល់អាជ្ញាធរក្រុង-ស្រុក បន្ទាប់ពីប្រជុំនេះទៅ ត្រូវចុះអនុវត្តនូវអ្វីដែលបានឯកភាពគ្នា ត្រូវធ្វើតាមនិតិវិធីដែលបានកំណត់ឱ្យបានឆាប់រហ័ស ត្រូវមាននិយាមការក្នុងការវាស់វែង ដើម្បីបញ្ជូនទៅក្រសួងមហាផ្ទៃបានទាន់ពេលវេលា៕ 8