ក្រុមចោរ៤នាក់លួចឡាននៅក្នុងបុរីលឹមឈាងហាក់ ត្រូវបានកម្លាំងប៉ូលិសព្រហ្មទណ្ឌចាប់វ៉ៃខ្នោះបានអស់ហើយ!

(ភ្នំពេញ)៖ កម្លាំងនគរបាលជំនាញព្រហ្មទណ្ឌនៃអធិការដ្ឋាននគរបាលខណ្ឌដង្កោដឹកនាំដោយលោកឧត្តមសេនីយ៍ត្រី ប៊ុន សត្យា ស្នងការរង ទទួលផែនការងារនគរបាលព្រហ្មទណ្ឌ និងលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោស្រាវជ្រាវបង្ក្រាបបានករណីលួចរថយន្តចំនួន១គ្រឿង ឈាន់ដល់ការឃាត់ខ្លួនជនសង្ស័យបានចំនួន៤នាក់។ នេះបើតាមប្រភពដែលអង្គភាព The Mirror News ទទួលបាននៅថ្ងៃទី៦​ ខែមករា ឆ្នាំ២០២៦នេះ។

ប្រភពបញ្ជាក់ថា ជនសង្ស័យទាំង៤នាក់៖ ១-ឈ្មោះ ឈឹម បូរ៉ា ភេទប្រុស អាយុ៣៧ឆ្នាំ ជនជាតិខ្មែរ ។ ២-ឈ្មោះ លី រ៉ាវី ភេទប្រុស អាយុ២៨ឆ្នាំ ជនជាតិខ្មែរ ស្នាក់នៅសង្កាត់ច្រាំងចំរេះទី១ ខណ្ឌឬស្សីកែវ រាជធានីភ្នំពេញ។ ៣-ឈ្មោះ ពៅ ពេជ្រ ភេទប្រុស អាយុ២៧ឆ្នាំ ជនជាតិខ្មែរ ស្នាក់នៅភូមិទ្រា១ សងា្កត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។ និង៤-ឈ្មោះ ប្រាក់ អុល ភេទប្រុស អាយុ២៣ឆ្នាំ ជនជាតិខ្មែរ ស្នាក់នៅភូមិទ្រា១ សងា្កត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។ រួមជាមួយវត្ថុតាង៖ រថយន្ត០១គ្រឿងម៉ាក Prius ពណ៌ខៀវ សេរីឆ្នាំ២០០៦ ពាក់ផ្លាកលេខភ្នំពេញ2BK-0148 មានលេខតួ JTDKB20U367081254 លេខម៉ាស៊ីន1NZU051712 ។

គួរបញ្ជាក់ថា កាលពីថ្ងៃទី០៤ ខែមករា ឆ្នាំ២០២៦ វេលាម៉ោង២១៖៣០នាទី ជនរងគ្រោះឈ្មោះ គ្រី រីកូ ភេទប្រុស អាយុ៤៦ឆ្នាំ បានទុករថយន្ត០១គ្រឿង ម៉ាក Prius នៅមុខផ្ទះលេខ៣៥B ផ្លូវលេខ២B បុរីលឹមឈាងហាក់ ស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ដោយបានចាក់សោទ្វាររថយន្តត្រឹមត្រូវ រួចជនរងគ្រោះក៏បានចូលសម្រាកក្នុងផ្ទះ ។ លុះរហូតដល់វេលាម៉ោង០៤៖១៥នាទី ថ្ងៃទី០៥ ខែមករា ឆ្នាំ២០២៦ ជនរងគ្រោះបានក្រោកពីដេកចេញទៅមើលរថយន្ត ស្រាប់តែបាត់រថយន្តពីកន្លែងទុក ហើយជនរងគ្រោះក៏បានមករាយការណ៍ប្រាប់សមត្ថកិច្ច ប៉ុស្តិ៍នគរបាលរដ្ឋបាលដង្កោ ឱ្យជួយអន្តរាគមន៍។

សមត្ថកិច្ចក៏បានចុះធ្វើការស្រាវជ្រាវតាមជំនាញគឺឃើញសកម្មភាពជនសង្ស័យលួចរថយន្តរបស់ជនរងគ្រោះនៅវេលាម៉ោង០២៖២៥នាទី យប់អធ្រាត្រថ្ងៃទី០៥ ខែមករា ឆ្នាំ២០២៦ រួចសមត្ថកិច្ចក៏បានចុះសហការជាមួយស្នងការដ្ឋាននគរបាលខេត្តកំពត ធ្វើការឃាត់ខ្លួនជនសង្ស័យបានចំនួន៤នាក់ ខាងលើ រួមនិងវត្ថុតាង បញ្ជូនមកអធិការដ្ឋាននគរបាលខណ្ឌដង្កោដើម្បីចាត់លារតាមនីតិវិធី៕