ក្រុមប៉ូលិសក្រុងតាខ្មៅបានបង្ក្រាបឃាត់ខ្លួនជនសង្ស័យ២នាក់ពាក់ព័ន្ធករណីលួច បំផ្លិចបំផ្លាញទ្រព្យសម្បត្តិរដ្ឋ និងអ្នកទទួលផលចោលកម្ម 

(កណ្តាល)៖ បន្ទាប់ពីទទួលបានការរាយការណ៍ពីប្រជាពលរដ្ឋមានករណីបាត់ដែកទ្រទុយោទឹកស្អាត ស្ថិតនៅចំណុចស្ពាន៦០ម៉ែត្រ ភូមិបត្តាជី១ សង្កាត់ព្រែកហូរ ក្រុងតាខ្មៅ ខេត្តកណ្តាល នាថ្ងៃទី០៤ ខែមករា ឆ្នាំ២០២៦នេះ សមត្ថកិច្ចប៉ុស្តិ៍ព្រែកហូរ បានធ្វើការសហការជាមួយកម្លាំងអធិការដ្ឋាននគរបាលក្រុងតាខ្មៅ ធ្វើការស្រាវជ្រាវឈានដល់ការឃាត់ខ្លួនជនសង្ស័យចំនួនពីរនាក់ អ្នកលួច និងអ្នកទទួលផលចោរកម្ម រួមទាំងវត្ថុតាងយកមកសួរនាំ និងចាត់ការតាមនីតិវិធី។

ជនសង្ស័យទាំង០២នាក់៖ ទី១. ឈ្មោះ ឈឹន សុខខុន ភេទប្រុស អាយុ៤៤ ឆ្នាំ ជនជាតិខ្មែរ ភូមិដំណាក់សង្កែ សង្កាត់ព្រែកកំពឹសខណ្ឌដង្កោ រាជធានីភ្នំពេញ មុខរបរ មិនពិតប្រាកដ (អ្នកលួច) និងមានសារធាតុញៀនក្នុងទឹកនោម។ ទី២. ឈ្មោះ លាប សេងវ៉ាង ភេទប្រុស អាយុ៤៣ឆ្នាំ ជនជាតិខ្មែរ រស់នៅភូមិដំណាក់សង្កែ សង្កាត់ព្រែកកំពឹស ខណ្ឌដង្កោ រាជធានីភ្នំពេញ មុខរបរ ទិញអេតចាយ (ទទួលទិញផលចោរកម្ម)។

នៅចំពោះមុខសមត្ថកិច្ចជនសង្ស័យបានឆ្លើយសារភាពថារូបខ្លួនពិតជាបានធ្វើសកម្មភាពលួចដែកទ្រទុយោទឹកស្អាតពិតប្រាកដមែន ហើយយកទៅលក់នៅកន្លែងទិញអេតចាយរបស់ឈ្មោះ លាប សេងវ៉ាង មានទីតាំងភូមិព្រែកថ្លឹងសង្កាត់ព្រែកកំពឹស ខណ្ឌដង្កោ រាជធានីភ្នំពេញ លក់បានក្នុង១គីឡូ៩០០រៀល ប្រាកដមែន។

បច្ចុប្បន្នជនសង្ស័យបានឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងតាខ្មៅដើម្បីចាត់ការតាមនីតិវិធីច្បាប់៕