រឿងប្រជាពលរដ្ឋ១០គ្រួសារសុំបើកផ្លូវកែងបន្ថែម នៅភូមិព្រែកអញ្ចាញ ឃុំពោធិ៍បាន ស្រុកកោះធំ ត្រូវបានលោក ហាក់ សុខមករា អភិបាលរងខេត្តកណ្ដាលដោះស្រាយបញ្ចប់ហើយ!

(កណ្តាល)៖  អភិបាលរងខេត្តកណ្ដាល លោក ហាក់ សុខមករា នៅព្រឹកថ្ងៃទី២៣ ខែធ្នូ ឆ្នាំ ២០២៥នេះ បានដឹកនាំមន្ត្រីជំនាញ និងអាជ្ញាធរស្រុកកោះធំ ចុះមកដោះស្រាយសម្របសម្រួលដល់ទីតាំងដីទំនាស់លើករណីប្រជាពលរដ្ឋចំនួន ១០គ្រួសារ ដែលបានស្នើសុំអន្តរាគមន៍ជួយបើកផ្លូវកែងបន្ថែមលើផ្លូវដែលបានបើករួចមានទំហំ ២.៥ម៉ែត្រ ស្ថិតនៅក្នុងភូមិព្រែកអញ្ចាញ ឃុំពោធិ៍បាន ស្រុកកោះធំ។

លោកអភិបាលរងខេត្តបានធ្វើការសម្របសម្រួលដើម្បីបញ្ចប់វិវាទរួចមក ភាគីទំនាស់ទាំងសងខាងបានឯកភាពគ្នាបញ្ចប់ទំនាស់នៅលើទីតាំងស្នើសុំបើកផ្លូវជាក់ស្តែង ដោយស្នាមញញឹម ក្រោមនយោបាយឈ្នះឈ្នះ ហើយបានយល់ព្រមផ្តិតមេដៃដើម្បីបញ្ចប់វិវាទ នៅចំពោះមុខអាជ្ញាធខេត្ត និងស្រុក ឃុំ។ ក្នុងការចុះដោះស្រាយនេះ មន្ត្រីជំនាញបានពិនិត្យ និងវាស់វែងបន្ថែមជូនលើផ្លូវចាស់ ជាចំណិតក្បាលដីដើម្បីឱ្យងាយស្រួលបត់រថយន្តចេញ ចូល បន្តពីផ្លូវបេតុងដែលមានរាងជាត្រីកោណ គឺប្រវែង ១ម៉ែត្រ ប្រវែងផ្លូវចូលមានប្រវែង ៣.២ម៉ែត្រ និងប្រវែងកាត់ទទឹងមានប្រវែង ៣.៤៥ម៉ែត្រ សរុបផ្ទៃក្រឡា ១.៦ម៉ែត្រការ៉េ បន្ថែមពីលើទំហំផ្លូវចាស់ដែលមានប្រវែង ២.៥ម៉ែត្រ។

លោក ហាក់ សុខមករា បានថ្លែងអំណរគុណដល់គ្រប់ភាគីជម្លោះ ដែលយល់ព្រមស្រុះស្រួលគ្នាបញ្ចប់ជម្លោះ ពីព្រោះរាល់ថ្ងៃ ជម្លោះទាំងអស់គឺស្មុគស្មាញណាស់សម្រាប់អាជ្ញាធរ ក៏ដូចជាម្ចាស់ជម្លោះ ព្រមទាំងបានផ្ដាំផ្ញើដល់ភាគីទំនាស់ទាំងពីរចាប់ពីពេលនេះទៅ ត្រូវក្លាយជាអ្នកជិតខាងភូមិផងរបងជាមួយគ្នាដ៏ល្អ ចេះយល់យោគអធ្យាស្រ័យគ្នា ចេះជួយគ្នាទៅវិញទៅមក និងត្រូវរស់នៅជាមួយគ្នាប្រកបដោយភាពសុខសាន្ត។

លោកអភិបាលរងខេត្តក៍បានធ្វើការណែនាំដល់អាជ្ញាធរស្រុកក៏ដូចជាមន្ត្រីជំនាញ ត្រូវខិតខំដោះស្រាយបញ្ហា និងសំណូមពរនានារបស់ប្រជាពលរដ្ឋឲ្យមានប្រសិទ្ធភាពខ្ពស់ ជាពិសេសបញ្ហាទំនាស់ដីធ្លីត្រូវខិតខំដោះស្រាយបញ្ចប់ឲ្យបានឆាប់រហ័សផងដែរ៕