នៅព្រឹកនេះ លោកស្រី សៅ សុភ័ណ ត្រូវបានអភិបាលខេត្តកណ្ដាលប្រកាសឱ្យកាន់មុខតំណែងជា «អភិបាលរងនៃគណៈអភិបាលក្រុងអរិយក្សត្រ ខេត្តកណ្តាល» ជាផ្លូវការហើយ!

(កណ្ដាល)៖ លោក គួច ចំរើន អភិបាលខេត្តកណ្ដាល និងលោក នូ សាខន ប្រធានក្រុមប្រឹក្សាខេត្ត នាព្រឹកថ្ងៃទី១៨ ខែធ្នូ ឆ្នាំ២០២៥នេះ បានអញ្ជើញប្រកាសលោកស្រី សៅ សុភ័ណ ឋានន្តរស័ក្តិអនុមន្ត្រី ថ្នាក់លេខ២ ឱ្យកាន់មុខតំណែងជា «អភិបាលរងនៃគណៈអភិបាលក្រុងអរិយក្សត្រ ខេត្តកណ្តាល» ជាផ្លូវការ។

នាឱកាសនោះ លោក ចាន់ តារា អភិបាលក្រុងអរិយក្សត្រលើកឡើងថា ជាមួយនឹងលទ្ធផលសម្រេចបាន រដ្ឋបាលក្រុងអរិយក្សត្រក៏នៅជួបការលំបាក ខ្វះខាត និងបញ្ហាប្រឈមមួយចំនួនទៀតដែលត្រូវខិតខំយកចិត្តទុកដាក់ដោះស្រាយ កែលម្អ និងពុះពារអនុវត្តបន្តទៀត។ បើទោះបីជាមានការខិតខំប្រឹងប្រឹងរបស់អាជ្ញាធរ និងកងកម្លាំងគ្រប់លំដាប់ថ្នាក់ ប៉ុន្តែបទល្មើសព្រហ្មទណ្ឌ បញ្ហាគ្រឿងញៀន និងគ្រោះថ្នាក់ចរាចណ៍នៅតែបន្តកើតឡើង មន្ត្រីនគបាលនៅតាមប៉ុស្តិ៍រដ្ឋបាល មិនទាន់គ្រប់តាមតម្រូវការ ការផ្តល់ព័ត៌មានមិនទាន់ហេតុការណ៍ និងមួយចំនួនមិនហ៊ានរាយការណ៍ជូនសមត្ថកិច្ច។

លោកអភិបាលក្រុងបន្តថា ការតបណ្តាញទឹកស្អាតមិនទាន់ គ្រប់១០០% ធនធានថវិកានៅថ្នាក់ក្រោមជាតិ មិនទាន់ឆ្លើយតបទៅនឹងតម្រូវការដ៏ច្រើននៅមូលដ្ឋាន សំរាមនៅតែជាបញ្ហាប្រឈមខ្លាំងសម្រាប់ក្រុងអរិយក្សត្រ។

ជាមួយនោះ លោក​ ចាន់ តារា បានបញ្ជាក់ថា ក្នុងនាមរដ្ឋបាលក្រុង សូមប្តេជ្ញាថា ខិតខំបន្តអនុវត្តការងារដែលនៅសេសសល់ ស្របតាម កម្មវិធីនយោបាយ និងយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាល ក្នុងការរួមចំណែកដ៏ធំធេង ក្នុងការរក្សាបាននូវ សន្តិសុខ សណ្តាប់ធ្នាប់ ស្ថេរភាពនយោបាយសង្គម និងបង្កើនគុណភាពនៃការផ្តល់សេវា ប្រកបដោយគណនេយ្យភាព និងតម្លាភាព។

នៅក្នុងពិធីប្រកាសនេះ លោកគួច ចំរើន អភិបាលខេត្តកណ្ដាលបានផ្ដាំផ្ញើដល់អង្គពិធីទាំងមូល ក៏ដូចជាថ្នាក់ដឹកនាំរដ្ឋបាលក្រុងអរិយក្សត្រត្រូវរួបរួមសាមគ្គី ជាពិសេសការផ្ដល់តម្លៃទៅដល់កម្លាំងស្ត្រី។ ជាក់ស្ដែងការតែងតាំង លោកស្រី សៅ សុភ័ណ ជាអភិបាលរងក្រុងអរិយក្សត្រ នៅពេលនេះគឺ ជាការលើកកម្ពស់យេនឌ័រ។ ជាងនេះទៅទៀត ការខិតខំរួមចំណែករបស់មន្ត្រីរាជការ,កងកម្លាំងប្រដាប់អាវុធនៅក្រុងអរិយក្សត្រក្នុងការអនុអនុវត្តគោលនយោបាយរបស់រាជរដ្ឋាភិបាលឲ្យបានជោគជ័យ។

នៅក្នុងពិធីប្រកាសនេះ លោកស្រី សៅ សុភ័ណ ដែលជាអភិបាលរងថ្មី ក៏បានប្ដេជ្ញាចិត្តនឹងចូលរួមចំណែកជាមួយថ្នាក់ដឹកនាំនៃរដ្ឋបាលក្រុងអរិយក្សត្រ ក៏ដូចជា រដ្ឋបាលខេត្តកណ្ដាលនិងជាពិសេសគោរពអនុវត្តន៍គោលនយោបាយរបស់រាជរដ្ឋាភិបាល, ក្រសួងមហាផ្ទៃក្នុងការធ្វើឲ្យកាន់តែប្រសើរឡើងនូវគ្រប់វិស័យក្នុងក្រុងអរិយក្សត្រ៕