ធ្លាប់ជាប់គុកព្រៃសម្ដងហើយ មិនរាងចាល, ជនជាតិវៀតណាមម្នាក់ ត្រូវបានកម្លាំងប៉ូលិសក្រុងតាខ្មៅចាប់ឃាត់ខ្លួនពាក់ព័ន្ធករណីគ្រឿងញៀន!

(កណ្ដាល)៖ ដោយទទួលបានបទបញ្ជាពីលោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ ដឹកនាំបញ្ជាឱ្យកម្លាំងជំនាញចុះបង្រ្កាបករណីរក្សាទុក និងជួញដូរដោយខុសច្បាប់នូវសារធាតុញៀន ដោយឃាត់ខ្លួនបានជនសង្ស័យម្នាក់ឈ្មោះ ង្វៀង យ៉ាំងថាយ ហៅ សុខ ថាយ ភេទប្រុស អាយុ២៨ឆ្នាំ ជនជាតិវៀតណាម រស់នៅភូមិលេខ២ សង្កាត់ស្វាយរលំ ក្រុងតាខ្មៅ ខេត្តកណ្តាល​ មានមុខរបរមិនពិតប្រាកដ ដោយមានផ្ទុកសារធាតុញៀនវិជ្ជមាន(+) កាលពីវេលាម៉ោង១២៖០០នាទី ថ្ងៃសុក្រ ថ្ងៃទី៥ ខែធ្នូ ឆ្នាំ២០២៥​ នៅចំណុចផ្លូវបេតុង ស្ថិតនៅភូមិលេខ២ សង្កាត់ស្វាយរលំ ក្រុងតាខ្មៅ ខេត្តកណ្តាល។

ប្រភពពីលោកអធិការបានឱ្យដឹងថា ជនសង្ស័យខាងលើ ធ្លាប់ជាប់ពន្ធនាគារព្រៃស​ ចំនួន០១លើក ជាប់រយៈពេល៩ខែ ពីបទ រក្សាទុកដោយខុសច្បាប់នូវសារធាតុញៀន។

ដោយឡែកចំពោះវត្ថុតាងចាប់យកបានរួមមាន៖  ១-ថ្នាំញៀនចំនួន០៣កញ្ចប់ ទម្ងន់០,២៨ក្រាម និង២-ម៉ូតូម៉ាក Honda Click ពណ៌ស លេខតួMH1JM5114KK217422 លេខម៉ាស៊ីន លេខតួ​MH1JM5114KK217422 ពាក់ស្លាកលេខ ភ្នំពេញ 1JJ-2403 ចំនួន០១គ្រឿង។

លោកអធិការបន្តឱ្យដឹងថា នៅថ្ងៃកើតហេតុខាងលើ កម្លាំងប៉ុស្តិ៍នគរបាលរដ្ឋបាលស្វាយរលំបានចេញល្បាតដល់ចំណុចកើតហេតុខាងលើ ក៏បានប្រទះឃើញជនសង្ស័យកំពុងជិញម៉ូតូម្នាក់ឯង ដោយមានការសង្ស័យកម្លាំងយើងក៏បានសួរនាំ និងត្រួតពិនិត្យឃើញថ្នាំញៀនចំនួន០៣កញ្ចប់ដែលជនសង្ស័យដាក់ក្នុងកញ្ចប់បារីម៉ាក HERO លាក់ទុកក្នុងឃ្លុបម៉ូតូផ្នែកខាងមុខ។

នៅចំពោះមុខសមត្ថកិច្ចជនសង្ស័យបានឆ្លើយសារភាពថា ថ្នាំញៀនចំនួន០៣កញ្ចប់ដែលសមត្ថកិច្ចឆែកឃើញគឺពិតជារបស់ខ្លួនដែលបានទិញពីបុរសឈ្មោះ ខ្លា អាយុប្រហែល២៨ឆ្នាំ នៅម្តុំព្រែកតាំងហ៊ុន ស្ថិតនៅភូមិលេខ១ សង្កាត់ស្វាយ ក្រុងតាខ្មៅ ខេត្តកណ្តាល ក្នុងតម្លៃ១៥,០០០៛(មួយម៉ឺនប្រាំពាន់រៀល)ដើម្បីយកទៅប្រើប្រាស់ និងចែកចាយបន្តពិតប្រាកដមែន។

ជនសង្ស័យរួមនិងវត្ថុតាំងបានបញ្ជូនមកផ្នែកជំនាញនៃអធិការដ្ឋាននគរបាលក្រុងតាខ្មៅដើម្បីកសាងសំណុំរឿងចាត់កាតាមនីតិវិធីនៃច្បាប់៕