ឃាត់ខ្លួនជនជាតិចិននិងខ្មែរបាន២២នាក់ នៅក្រុងច្បារមន ខេត្តកំពង់ស្ពឺ ពាក់ព័ន្ធលួចបើកល្បែងស៊ីសងខុសច្បាប់

(កំពង់ស្ពឺ)៖ លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺបានបញ្ជាឱ្យកម្លាំងជំនាញនគរបាលព្រហ្មទណ្ឌកម្រិតធ្ងន់-ស្រាលបានឆ្មក់ចូលទីតាំងលេងល្បែងស៊ីសងដោយខុសច្បាប់ (លេងបៀ) នៅផ្លូវជាតិលេខ៤ ភូមិសំបួរ សង្កាត់ច្បារមន ក្រុងច្បារមន ខេត្តកំពង់ស្ពឺ ដោយឃាត់ខ្លួនបានអ្នកលេងបានចំនួន២២នាក់ (ស្រី១២នាក់) ជនជាតិចិន៧នាក់ (ស្រី១នាក់)។​ នេះបើតាមប្រភពដែល The Mirror News ទទួលបាននៅថ្ងៃទី៥ ខែវិច្ឆិកា ឆ្នាំ២០២៥នេះ។

នៅក្នុងប្រតិបត្តិការកាលពីថ្ងៃទី៣ ខែវិច្ឆិកា ឆ្នាំ២០២៥ សមត្ថកិច្ចដកហូតវត្ថុតាងសរុបមាន តុសម្រាប់លេងបៀចំនួន៣, កៅអី២០, កាក់ដូរលុយ២៣០កាក់, ទូរស័ព្ទដៃ២០គ្រឿង, បៀ២កេស ស្មើនឹង៣៣៦ហ៊ូរ, រថយន្ត១គ្រឿង, ម៉ូតូ៤គ្រឿង និងសម្ភារ លុយមួយចំនួនទៀត ។

បច្ចុប្បន្នមនុស្ស និងសម្ភារទាំងបាននាំយកមករក្សាទុកនៅស្នងការនគរបាលខេត្តកំពង់ស្ពឺ ដើម្បីធ្វើការសាកសួរ និងបញ្ជូនទៅកាន់សាលាដំបូងខេត្តកំពង់ស្ពឺ៕