Breaking News៖ កម្លាំងPMលើផ្ទៃប្រទេសចាប់ខ្លួនខ្មាន់កាំភ្លើងដែលបាញ់ប្រហារស្លាប់៣នាក់ និងរបួសធ្ងន់ម្នាក់ នៅស្រុកបន្ទាយមាសបានហើយ នៅខេត្តតាកែវ

(កំពត)៖ កម្លាំងកងរាជអាវុធហត្ថលើផ្ទៃប្រទេសបានស្រាវជ្រាវរហូតឈានដល់ការបង្ក្រាបចាប់ឃាត់ខ្លួនខ្មាន់កាំភ្លើងម្នាក់ដែលបាញ់ប្រហារបណ្ដាលឲ្យមនុស្សស្លាប់៣នាក់ នៅស្រុកបន្ទាយមាស ខេត្តកំពត កាលពីយប់ថ្ងៃទី២០ ខែកញ្ញា ឆ្នាំ២០២៥ហើយ នៅថ្ងៃទី២២ ខែកញ្ញា ឆ្នាំ២០២៥នេះ  នៅក្នុងភូមិសាស្ដ្រខេត្តតាកែវ។

លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានប្រាប់ឱ្យអ្នកកាសែតដឹងថា បន្ទាប់ពីស្រាវជ្រាវក្រោយថ្ងៃកើតហេតុ នៅពេលនេះជនដៃដល់ដែលជាខ្មាន់កាំភ្លើងឈ្មោះ អ៊ុំ វុទ្ធី ត្រូវកម្លាំងស្នងការដ្ឋាននគរបាលខេត្តកំពត សហការជាមួយកងរាជអាវុធហត្ថលើផ្ទៃប្រទេស បង្ក្រាបបានហើយនៅស្រុកបាទី ខេត្តតាកែវ។

បើតាមលោកឧត្តមសេនីយ៍ទោ ម៉ៅ ច័ន្ទមធុរិទ្ធ, ក្រៅពីខ្មាន់កាំភ្លើងខាងលើ ប្រពន្ធរបស់ជនដៃដល់រូបនេះ ក៏ត្រូវបានសមត្ថកិច្ច នៃស្នងការដ្ឋាននគរបាលខេត្តកំពត ឃាត់ខ្លួនផងដែរ ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត ចាត់ការតាមផ្លូវច្បាប់។

គួរជម្រាបជូនថា នៅយប់ថ្ងៃកើតហេតុ ក្រុមជនរងគ្រោះកំពុងជួបជុំគ្នាហូបចុក ពេលនោះក៏មានឆ្កែមួយក្បាលចូលទៅក្នុងវង់ហូបចុក ស្រាប់តែជនរងគ្រោះយកកំប៉ុងស្រាគប់ទៅលើឆ្កែ ហើយប្រពន្ធរបស់ខ្មាន់កាំភ្លើងបានចោទថា កំប៉ុងស្រាដែលជនរងគ្រោះគប់នោះត្រូវខ្លួន ក្រោយមកក៏ឈ្លោះប្រកែកគ្នាមួយប្រាវ។ មួយសន្ទុះក្រោយមក ប្រពន្ធរបស់ខ្មាន់កាំភ្លើងយកសាច់រឿងមកប្រាប់ប្ដី ដែលជាខ្មាន់កាំភ្លើង ហើយខ្មាន់កាំភ្លើងបានដើរចេញពីផ្ទះទៅបាញ់រះលើក្រុមជនរងគ្រោះតែម្ដង។ដោយហេតុការណ៍នេះ បានបណ្ដាលឲ្យមនុស្សស្លាប់ចំនួន៣នាក់ (ស្រី២នាក់ ប្រុសម្នាក់) និងរងរបួសធ្ងន់ម្នាក់៕