លោកឧត្ដមសេនីយ៍ស្នងការ ឈឿន សុចិត្ត៖ ផលិតផលចំនួន៤ មុខក្នុងចំណោមផលិតផ្សេងទៀត ដែលយកទៅពិសោធន៍ និងធ្វើតេស្ត ដែលម្ចាស់ក្រុមហ៊ុន Love Riya ផ្សាយលក់ គឺជាការបោកប្រាស់ ក្លែងក្លាយ

(កណ្ដាល)៖ លោកឧត្ដមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្ដាលបានបញ្ជាក់ថា ក្រោយពីមន្រ្តីនគរបាលយុត្តិធម៌ នៃស្នងការដ្ឋាននគរបាលខេត្តកណ្តាលធ្វើការឃាត់ខ្លួនម្ចាស់ផលិតផលឡេ និងផលិតមួយចំនួនទៀត មានការវែកញ៉ែកបកស្រាយលើកហេតុផលនេះ ហេតុផលនោះ ដោយមានអ្នកអបអរសាទរច្រើនលើសលប់ និងមានមួយក្រុមតូច មិនទទួលយកនូវការអនុវត្តច្បាប់របស់មន្រ្តីនគរបាលជំនាញ។

លោកស្នងការ ឈឿន សុចិត្ត បានបញ្ជាក់បន្ថែមថា ផលិតផលចំនួន៤ មុខក្នុងចំណោមផលិតផ្សេងទៀត ដែលយកទៅពិសោធន៍ និងធ្វើតេស្ត ដែលម្ចាស់ក្រុមហ៊ុនខាងលើ Live ផ្សាយលក់ គឺជាការបោកប្រាស់ ក្លែងក្លាយ ហើយមានសារធាតុហាមឃាត់លើស ខុសពីច្បាប់អនុញ្ញាត ធ្វើឲ្យប៉ះពាល់សុខភាពយ៉ាងខ្លាំងដល់អ្នកប្រើប្រាស់។

លោកឧត្ដមសេនីយ៍ទោស្នងការបានមានប្រសាសន៍ទៀតថា ជារួម គួរនាំគ្នាអាណិតដល់អ្នកជឿចាញ់បោក ខំប្រឹងរកលុយមកទិញផលិតផលរបស់ក្រុមហ៊ុនខាងលើយកមកប្រើប្រាស់ ដែលប៉ះពាល់ដល់សុខភាពដោយមិនដឹងខ្លួនពីមួយថ្ងៃទៅមួយថ្ងៃ។

ពាក់ព័ន្ធករណីខាងលើនេះ លោកឧត្ដមសេនីយ៍ទោ ឈឿន សុចិត្ត ស្នើសុំឲ្យបញ្ឈប់ការលើកឡើងដោយគ្មានមូលដ្ឋានច្បាស់លាស់ ដែលបាននឹងកំពុលបំពុលសង្គម។

គួររំលឹកថា នៅថ្ងៃទី១៤ ខែសីហា ឆ្នាំ ២០២៥ នៅចំណុចបុរីML ស្ថិតក្នុងភូមិកំពង់ សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល​កម្លាំងសមត្ថកិច្ចនៃស្នងការដ្ឋាននគរបាលខេត្តកណ្តាលបានចុះទៅធ្វើការឃាត់ខ្លួនឈ្មោះ ឆេង​ ស្រីរ័ត្ន ហៅ Love Riya  រួចបញ្ជូនមកសាលាដំបូង និងអយ្យការអមសាលាដំបូងខេត្តកណ្តាល ដើម្បីចាត់ការតាមនីតិវិធីច្បាប់​ ដោយបច្ចុប្បន្នជនត្រូវចោទឈ្មោះ ឆេង ស្រីរ័ត្ន កំពុងត្រូវបាននៅក្នុងពន្ធនាគារខេត្តកណ្ដាល៕