លោកស្នងការ ហេង សុផល ត្រូវបានអគ្គស្នងការនគរបាលជាតិកោតសរសើរពីភាពអង់អាចក្លាហានដែលត្រៀមរង់ចាំអនុវត្តបទបញ្ជារបស់រាជរដ្ឋាភិបាលដើម្បីការពាបូរណភាពទឹកដីកម្ពុជា ចំពោះបញ្ហាជម្លោះព្រំដែន កម្ពុជា-ថៃ

(កំពង់ធំ)៖ លោកឧត្តមសេនីយ៍ឯក មួង សុធា បានកោតសរសើរលោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ ដែលប្រមូលផ្ដុំកងកម្លាំង ប្រកបដោយភាពអង់អាចក្លាហាន និងបានត្រៀមលក្ខណៈរួចជាស្រេច ចំពោះសម្ភារ មធ្យោបាយ រង់ចាំអនុវត្តបទបញ្ជារបស់រាជរដ្ឋាភិបាល ការពាបូរណភាព រអធិបតេយ្យភាពទឹកដី នៃព្រះរាជាណាចក្រកម្ពុជា ចំពោះបញ្ហាជម្លោះព្រំដែន កម្ពុជា-ថៃ។

ការថ្លែងកោតសរសើររបស់លោកឧត្តមសេនីយ៍ឯក មួង សុធា អគ្គស្នងការរងនគរបាលជាតិ នៅព្រឹកថ្ងៃទី ១៦ ខែសីហា ឆ្នាំ២០២៥ ក្នុងឳកាសតំណាងលោកនាយឧត្តមសេនីយ៍ ស ថេត អគ្គស្នងការនគរបាលជាតិអញ្ជើញជាអធិបតីភាពក្នុងពិធីសំណេះសំណាល សួរសុខទុក្ខ និងត្រួតពិនិត្យសកម្មភាពការងារ នៅស្នងការដ្ឋាននគរបាលខេត្តកំពង់ធំ។

នៅក្នុងកិច្ចប្រជុំលោកឧត្តមសេនីយ៍ទោ ហេង សុផល បានរាយការណ៍ អំពីស្ថានភាព លក្ខណៈភូមិសាស្ត្រខេត្ត កិច្ចការងារ ការពារ សន្តិសុខ សុវត្ថិភាព សណ្តាប់ធ្នាប់ កិច្ចប្រតិបត្តិការ ព្រមទាំងរចនាសម្ព័ន្ធ ស្ថានភាពកងកម្លាំងនគរបាលខេត្តកំពង់ធំ និងថ្លែងអំណរគុណយ៉ាងជ្រាលជ្រៅបំផុត ចំពោះឯកឧត្តមប្រធានគណៈអធិបតី ព្រមទាំងប្រតិភូអមដំណើរ ដែលបានចំណាយពេលវេលា ដ៏មានតម្លៃ អញ្ជើញជាអធិបតីភាព នាឱកាសនេះ ។ លោកស្នងការក៏បានរំលេចអំពី ស្នាដៃ គុណបំណាច់របស់កងកម្លាំង រយៈពេលកន្លងមក សម្រេចបានជោគជ័យជាបន្តបន្ទាប់ ក្នុងបេសកកម្មការពារជាតិមាតុភូមិ នាឱកាសប្រារព្ធពិធីបុណ្យជាតិ និងអន្តរជាតិ ជាពិសេសខេត្តរៀបចំពិធីសំខាន់ៗ ក្រោមវត្តមានដ៏ខ្ពង់ខ្ពស់ពីសំណាក់ថ្នាក់ដឹកនាំ នៃព្រះរាជាណាចក្រកម្ពុជា ។

នាឳកាសនោះ លោកឧត្តមសេនីយ៍ឯក មួង សុធា ក៏បានពាំនាំនូវប្រសាសន៍ ផ្តាំផ្ញើសាកសួរសុខទុក្ខពីសំណាក់លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃលោកនាយឧត្ដមសេនីយ៍ ស ថេត អគ្គស្នងការនគរបាលជាតិជូនចំពោះកងកម្លាំងនគរបាល ដែលលះបង់កម្លាំងកាយចិត្ត សេចក្ដីផ្ទាល់ខ្លួន អនុវត្តតួនាទី ភារកិច្ច ការពារ រក្សាសន្តិសុខ សណ្តាប់ធ្នាប់ សុវត្ថិភាពសង្គម និងការផ្តល់សេវាសាធារណៈ ជូនប្រជាពលរដ្ឋ ។

លោកឧត្តមសេនីយ៍ឯឯក៏បានប្រគល់អំណោយដែលជាការឧបត្ថម្ត ដ៏ថ្លៃថ្លារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ ស ស៊ីណា ដល់ស្នងការដ្ឋាននគរបាលខេត្តកំពង់ធំ រួមមាន៖ ថវិកាចំនួន ១៦,០០០,០០០រៀល,អង្ករចំនួន ០៤ តោន, ទឹកបរិសុទ្ធ ២០០ កេស, មី ៥០ កេស,៥.ត្រីខ ២០ កេស៕