សម្តេចតេជោ ហ៊ុន សែន បញ្ជាឱ្យបណ្តេញលោកស្រី ធី សុវណ្ណាថា ចេញពីគណបក្សប្រជាជនកម្ពុជានិងបានបញ្ជាឱ្យបញ្ចប់តំណែងពីអភិបាលរងក្រុងអរិយក្សត្រ

(ភ្នំពេញ)៖ ប្រធានគណបក្សប្រជាជនកម្ពុជា និងប្រធានព្រឹទ្ធសភាកម្ពុជា សម្តេចតេជោ ហ៊ុន សែន នៅព្រឹកថ្ងៃទី៣ ខែសីហា ឆ្នាំ២០២៥នេះ បានបញ្ជាឱ្យលោក គួច ចំរើន​​ បណ្តេញលោកស្រី ធី សុវណ្ណាថា ចេញពីគណបក្សប្រជាជនកម្ពុជា ហើយសម្ដេចតេជោក៏បានបញ្ជាឱ្យលោក​​ ស សុខា រដ្ឋមន្ត្រីមហាផ្ទៃបញ្ចប់តំណែងលោកស្រីពីអភិបាលរងក្រុងអរិយក្សត្រ ព្រមទាំងដកក្របខ័ណ្ឌរដ្ឋទាំងអស់ បន្ទាប់ពីលោកស្រីបង្ហោះផ្សព្វផ្សាយព័ត៌មានបំពុល ប៉ះពាល់ដល់កងទ័ព។

ខាងក្រោមនេះជាសំណេររបស់សម្តេចតេជោ ហ៊ុន សែន បង្ហោះក្នុងបណ្តាញទំនាក់ទំនងសង្គមផ្លូវការមានខ្លឹមសារទាំងស្រុងដូច្នេះ៖

យើងគ្មានពេលអប់រំមន្ត្រី ដែលគ្មានវិន័យក្នុងពេល ដែលកិច្ចការជាតិកំពុងទាមទារយើងដោះស្រាយនោះឡើយ។ ម្តងហើយម្តងទៀត ធី សុវណ្ណថា បាន
បង្ហោះសារតាម Facebook ដែលមានចរិតមិនសមស្រប។ ខ្ញុំផ្ទាល់បានហៅទូរស័ព្ទប្រាប់គាត់ឲ្យលុបចោល នៅអត្ថបទ២កាលពីប៉ុន្មានថ្ងៃមុន ថ្ងៃនេះគាត់បង្ហោះសារប៉ះពាល់ ដល់កងទ័ពក្នុងពេលកងទ័ពកំពុងការពារទឹកដី។

ខ្ញុំបានប្រាប់ទៅ ឯ.ឧ គួច ចំរើន ប្រធានគណបក្សខេត្តកណ្តាល ឲ្យបណ្តេញចេញពីគណបក្សប្រជាជនកម្ពុជា។ ខ្ញុំបានប្រាប់ទៅ ឯ.ឧ ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃឲ្យបញ្ចប់មុខតំណែង ធី សុវណ្ណថា ពីអភិបាលរងក្រុងអរិយក្សត្រ និងបណ្តេញចេញពីក្របខ័ណ្ឌរដ្ឋទាំងអស់។

ក្នុងឋានៈជាប្រធានគណបក្សកាន់អំណាច ខ្ញុំមានសិទ្ធិនិងធ្វើបែបនេះ ដើម្បីរក្សាវិន័យបក្សសម្រាប់មន្ត្រីដែលជាសមាជិកបក្សទាំងអស់៕