ក្រុមប៉ូលិសក្រុងតាខ្មៅក្របួចបានក្រុមចោរលួចយ៉ាងសកម្មបាន៤នាក់ដើម្បីបញ្ជូនទៅតុលាការឱ្យផ្ដន្ទាទោសតាមច្បាប់ហើយ!

(កណ្ដាល)៖ អនុវត្តតាមបទបញ្ជាលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលកម្លាំងជំនាញនៃអធិការដ្ឋាននគរបាលក្រុងតាខ្មៅ ដឹកនាំដោយលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ ធ្វើការបង្ក្រាបឃាត់ខ្លួនបានជនសង្ស័យចំនួន៤នាក់ពាក់ព័ន្ធករណីលួចយ៉ាងសកម្មនៅក្នុងមូលដ្ឋានក្រុងតាខ្មៅ ខេត្តកណ្ដាល។

ក្រុមជនសង្ស័យទាំង៤នាក់ខាងលើ ដែលគនរបាលក្រុងតាខ្មៅ ចាប់ឃាត់ខ្លួន៖ ១. ឈ្មោះ ដួង រដ្ឋា ភេទប្រុស អាយុ២៩ឆ្នាំ ជនជាតិខ្មែរ ទីលំនៅភូមិលេខ៥ សង្កាត់ស្វាយរលំ ក្រុងតាខ្មៅ ខេត្តកណ្តាល ពាក់ព័ន្ធករណីអំពើលួចម៉ូតូចំនួន២លើក។ ២. ឈ្មោះ យ៉ុល​ កេង​ ភេទប្រុស អាយុ ៣៧ឆ្នាំ ជនជាតិខ្មែរ សញ្ជាតិខ្មែរ រស់នៅភូមិព្រែកសំរោង១ សង្កាត់តាខ្មៅ ក្រុងតាខ្មៅ ខេត្តកណ្តាល ពាក់ព័ន្ធករណីប្រើប្រាស់គ្រឿងញៀន។ ៣.ឈ្មោះ នី បូរ៉ា ហៅស្កូវ ភេទប្រុស អាយុ៣២ឆ្នាំ ជនជាតិខ្មែរឥស្លាម មុខរបរ មិនពិតប្រាកដ ទីលំនៅបច្ចុប្បន្នភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល (អនុវត្តដីកាបង្គាប់ឧ្យចាប់ខ្លួនរបស់សាលាដំបូងខេត្តកណ្តាលចំនួន០២ដីកា ពាក់ព័ន្ធករណីជួញដូរដោយខុសច្បាប់នូវសារធាតុញៀន )។៤.ឈ្មោះ រឹទ្ធា ព្រែក ហៅ អាសាមបី ភេទប្រុស អាយុ២៥ឆ្នាំ ជនជាតិខ្មែរ សញ្ជាតិខ្មែរ រស់នៅភូមិបត្តជី សង្កាត់តាក្តុល ក្រុងតាខ្មៅ ខេត្តកណ្តាល ករណីប្រើប្រាស់ដោយខុសច្បាប់នូវសារធាតុញៀន និង ធ្លាប់ជាប់ពន្ធធនាគារចំនួន៥ដង ។

បច្ចុប្បន្នជនសង្ស័យបានបញ្ជូនសំណុំរឿងចាត់កាតាមនីតិវិធីនៃច្បាប់៕