លោកឧត្តមសេនីយ៍ សំ តុលា៖ លោកព្រិន្ទបាលទោ រិន វសនា បានចូលរួមប្រយុទ្ធយ៉ាងអង់អាចក្លាហាននិងស្វិតស្វាញ ប្រឆាំងជាមួយពួកចោរឈ្លានពាន ដែលបានបង្ហាញគំរូវីរភាពដល់យុវជននិងប្រជាពលរដ្ឋខ្មែរគ្រប់រូបត្រូវចងចាំនូវគុណូបការៈដ៏ថ្លៃថ្លានេះ
(កណ្តាល)៖ លោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្ដាល នៅថ្ងៃចន្ទ ទី២៨ ខែកក្កដា ឆ្នាំ២០២៥នេះ បានដឹកនាំប្រតិភូបញ្ជាការដ្ឋានកងរាជអាវុធហត្ថខេត្តចូលគោរពវិញ្ញាណក្ខន្ធសពព្រឹន្ទបាលទោ រិន វាសនា នាយរងក្រុមទី២ កងអនុសេនាតូចដឹកជញ្ជូន វរសេនាតូច៣៩៣ កងពលតូចអន្តរាគមន៍លេខ ៩ នៃកងពលធំអន្តរាគមន៍លេខ ៣ ដែលបានពលីជីវិតនៅលើសមរភូមិប្រយុទ្ធទិសមុំបី ខេត្តព្រះវិហារ កាលពីថ្ងៃអាទិត្យទី២៧ ខែកក្កដា ឆ្នាំ២០២៥ ក្នុងជន្មាយុ ២៨ឆ្នាំ។ ដោយសពតម្កល់ធ្វើបុណ្យតាមប្រពៃណីព្រះពុទ្ធសាសនា នៅភូមិចំការត្រាច ឃុំដំណាក់អំពិ់ល ស្រុកអង្គស្នួល ខេត្តកណ្តាល។
ក្នុងឱកាសដ៏សែនក្តុកក្តួលនោះ លោកឧត្តមសេនីយ៍មេបញ្ជាការក៏បាននាំយកបច្ច័យនិងគ្រឿងឧបភោគបរិភោគ ចូលរួមបុណ្យដល់ក្រុមគ្រួសារសពផងដែរ។ លោកបានថ្លែងថា ការពលីកម្មរបស់លោក ព្រឹន្ទបាលទោ រិន វាសនា គឺជាការបាត់បង់នូវឧត្តមស្វាមី ជាឪពុក ជាកូន ដែលប្រកបដោយព្រហ្មវិហារធម៌ជាទីគោរពស្រលាញ់បំផុត ដែលបានបូជាកម្លាំងកាយ កម្លាំងចិត្ត បញ្ញា ស្មារតី ក្នុងការចិញ្ចឹមបីបាច់ថែរក្សា និងផ្តល់ដំបូន្មានល្អៗ ដល់កូន ក្មួយ ឱ្យក្លាយទៅជាធនធានមនុស្សដ៏មានតម្លៃ ប្រកបដោយគុណធម៌ នៅក្នុងសង្គមជាតិ ជាពិសេសគឺបាត់បង់ឥស្សរជនស្នេហាជាតិដ៏ឧត្តុងឧត្តម ដែលបានរួមចំណែកយ៉ាងធំធេង ក្នុងការប្រយុទ្ធតស៊ូជាមួយចោរកំពុងធ្វើការឈ្លានពានមកលើដែនអធិបតេយ្យភាពរបស់កម្ពុជាយើង។
លោកឧត្តមសេនីយ៍ សំ តុលា បានបន្តថា លោកព្រិន្ទបាលទោ រិន វសនា បានចូលរួមប្រយុទ្ធយ៉ាងអង់អាចក្លាហាននិងស្វិតស្វាញ ប្រឆាំងជាមួយពួកចោរឈ្លានពាន ដែលបានបង្ហាញគំរូវីរភាពដល់យុវជននិងប្រជាពលរដ្ឋខ្មែរគ្រប់រូបត្រូវចងចាំនូវគុណូបការៈដ៏ថ្លៃថ្លានេះ។
ស្ថិតក្នុងសមានទុក្ខដ៏ក្រៀមក្រំលោកមេបញ្ជាការ ព្រមទាំងនាយ នាយរង និងពលអាវុធហត្ថខេត្តកណ្តាលទាំងអស់បានចូលរួមរំលែកទុក្ខជាមួយលោកស្រី យុន វ៉ាន់ឌី ព្រមទាំងក្រុមគ្រួសារ និងសូមបួងសួង ដល់តេជៈបារមី នៃព្រះពុទ្ធ ព្រះធម៌ ព្រះសង្ឃ តាមជួយថែរក្សាដួងវិញ្ញាណក្ខន្ធរបស់លោក ព្រឹន្ទបាលទោ រិន វាសនា ឲ្យបានទៅសោយសុខក្នុងឋានសុគតិភព កុំបីឃ្លៀងឃ្លាតឡើយ។
គួរជម្រាបជូនថា ឪពុកនិងកូនជាយោធិនអង់អាចក្លាហាន ប្រយុទ្ធជាមួយសត្រូវនៅជួរមុខដើម្បីការពារជាតិទឹកដី! តែឪពុកត្រូវជូនដំណើរកូនទៅឋានសុគតិភពមុន! សូមគោរពដឹងគុណ ចងចាំ!៕
