លោក ប៉ែន បូណា ប្រាប់ឱ្យប្រជាពលរដ្ឋប្រុងប្រយ័ត្នព័ត៌មានក្លែងក្លាយ ដោយពិនិត្យ ពិច័យ ផ្ទៀងផ្ទាត់ និងសូមទទួលយកតែព័ត៌មានពីប្រភពផ្លូវការតែប៉ុណ្ណោះនេះ ទើបជាព័ត៌មានពិត!
(ភ្នំពេញ)៖ នៅនឹងថ្ងៃទី៣ នៃសង្គ្រាមឈ្លានពានរបស់ថៃមកលើដែនអធិបតេយ្យរបស់កម្ពុជា នាព្រឹកថ្ងៃទី២៦ ខែកក្កដា ឆ្នាំ២០២៥នេះ លោក ប៉ែន បូណា រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គភាពអ្នកនាំពាក្យរដ្ឋាភិបាលបានអំពាវនាវដល់ប្រជាពលរដ្ឋឱ្យប្រុងប្រយ័ត្នអំពីព័ត៌មានក្លែងក្លាយ ដោយសូមពិនិត្យ និងផ្ទៀងផ្ទាត់ព័ត៌មានពីប្រភពផ្លូវការ ទើបជាព័ត៌មានពិត។
លោក ប៉ែន បូណា បានអំពាវនាវថា «សូមបងប្អូនប្រជាពលរដ្ឋទទួលយកព័ត៌មាន ដោយប្រយ័ត្នប្រយែងពីព្រោះថា មួយរយៈពេលចុងក្រោយនេះ មានព័ត៌មានក្លែងក្លាយច្រើន ដូចនេះមុននិងបងប្អូនទទួលព័ត៌មាន សូមពិនិត្យពិច័យ ផ្ទៀងផ្ទាត់ ហើយសូមទទួលយកតែព័ត៌មានពីប្រភពផ្លូវការតែប៉ុណ្ណោះនេះទើបជាព័ត៌មានពិត»។
គួរបញ្ជាក់ថា ជុំវិញបញ្ហាជម្លោះព្រំដែន កម្ពុជា-ថៃ ដោយយោធាថៃ បានបើកការវាយប្រហារមកលើកម្ពុជាជាច្រើនទីតាំង ដោយមានការប្រើប្រាស់អាវុធធុនធ្ងរ និងយន្តហោះចម្បាំង F-16 ផងដែរ។ ទីតាំទាំងនោះ រួមមាន៖ តំបន់ភ្នំទ្រព្យ, តាថាវ, ភ្នំខ្មោច, អូរផ្កាស្នេហ៍, មុំបី, ប្រាសាទតាមាន់ធំ ,ប្រាសាទតាក្របី, វត្តអារាម ,មណ្ឌលសុខភាព ,ភូមិឋានប្រជាពលរដ្ឋ និងប្រាសាទព្រះវិហារ។ តែទោះជាយ៉ាណាប៉ុន្មានថ្ងៃមកនេះ គឺមានព័ត៌មានក្លែងក្លាយជាច្រើន បានបង្ហោះលើបណ្តាញសង្គម ពាក់ព័ន្ធនឹងសភាពការរណ៍នៅតាមព្រំដែន និងបញ្ហាជម្លោះនេះ ដែលធ្វើឱ្យមានការយល់ច្រឡំ ដូចនេះសូមប្រជាពលរដ្ឋប្រុងប្រយ័ត្នអំពីព័ត៌មានក្លែងក្លាយ និងសូមពិនិត្យ និងផ្ទៀងផ្ទាត់ព័ត៌មានពីប្រភពផ្លូវការ។
គួរជម្រាបថា ការផ្ទុះអាវុធរវាងកម្ពុជា-ថៃ បានកើតឡើងនៅព្រឹកថ្ងៃទី២៤ ខែកក្កដា ឆ្នាំ២០២៥ នៅចំណុចប្រាសាទតាមាន់ធំ ខេត្តឧត្តរមានជ័យ ដោយបានរាលដាលទៅកាន់តំបន់សមរភូមិផ្សេងទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះ បានកើតឡើងបន្ទាប់ពីភាគីថៃ បានផ្ទុះអាវុធមុននៅចំណុចប្រាសាទតាមាន់ធំ៕