លោកអគ្គនាយក ឈន សាណាត ផ្តាំផ្ញើរដល់មន្ត្រីពន្ធនាគារខេត្តត្បូងឃ្មុំទាំងអស់ត្រូវលើកកម្ពស់ក្រមសីលធម៌វិជ្ជាជីវៈ និងស្មារតីទទួលខុសត្រូវ

(ត្បូងឃ្មុំ)៖ លោកឧត្តមអគ្គានុរក្ស.១ ឈន សាណាត អគ្គនាយក នៃអគ្គនាយកដ្ឋានពន្ធនាគារ នាព្រឹកថ្ងៃទី២៣ ខែកក្កដា ឆ្នាំ២០២៥ បានអញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានពន្ធនាគារខេត្តត្បូងឃ្មុំ ដោយមានការចូលរួមពីលោក ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ អភិបាលរង នៃគណៈអភិបាលខេត្តត្បូងឃ្មុំ អគ្គនាយករង ប្រធានសាលាដំបូងខេត្ត ព្រះរាជអាជ្ញានៃអយ្យការអមសាលាដំបូងខេត្ត ប្រធាននាយកដ្ឋាន ស្នងការរងនៃស្នងការដ្ឋាននគរបាលខេត្ត មេបញ្ជាការរង កងរាជអាវុធហត្ថខេត្ត មេបញ្ជាការរងតំបន់ប្រតិបត្តិការសឹករងខេត្ត និងអង្គភាពពាក់ព័ន្ធជុំវិញខេត្ត។

លោកអគ្គនាយកបានផ្តាំផ្ញើរដល់មន្ត្រីពន្ធនាគារខេត្តត្បូងឃ្មុំទាំងអស់៖ *ត្រូវយកចិត្តទុកដាក់ បន្តដឹកនាំ រក្សាឱ្យបាននូវស្ថានភាពជាវិជ្ជមាន នៃការគ្រប់គ្រងអង្គភាព និងរក្សាឱ្យបាននូវប្រព័ន្ធគ្រប់គ្រង តាមភារកិច្ចដែលបានបែងចែក និងការទទួលខុសត្រូវ ដើម្បីធានាដល់និរន្តរភាព និងប្រសិទ្ធភាពការងារ។
*ត្រូវបន្តពង្រឹង និងរក្សាសាមគ្គីភាពផ្ទៃក្នុង ដោយតម្កល់ប្រយោជន៍របស់អង្គភាពជាធំ លើកកម្ពស់ក្រមសីលធម៌វិជ្ជាជីវៈ និងស្មារតីទទួលខុសត្រូវ ជាមួយនឹងភាពម្ចាស់ការលើភារកិច្ចរបស់ខ្លួន។*បន្តយកចិត្តទុកដាក់បង្កើនការយល់ដឹង ពង្រឹងលើកកម្ពស់ការអនុវត្តច្បាប់ និងលិខិតបទដ្ឋាន គតិយុត្ត ដែលជាមូលដ្ឋានធានាឱ្យការងារដឹកនាំជំនាញប្រកបដោយភាពត្រឹមត្រូវ។*ពង្រឹងកិច្ចការពារធានាសន្តិសុខ សុវត្ថិភាព បង្កើនការយកចិត្តទុកដាក់ត្រួតពិនិត្យ ឆែកឆេរ រកវត្ថុសម្ភារៈហាមឃាត់។*ត្រូវអនុវត្តការងារដឹកនាំ គ្រប់គ្រង ដោយមានរបបប្រជុំ របបរាយការណ៍ទៀងទាត់ ធ្វើការត្រួតពិនិត្យ តាមដាន វាយតម្លៃ និងតម្រង់ទិសជាប្រចាំ ដើម្បីធានាដល់ប្រសិទ្ធភាពការងារ ព្រមជាមួយគោលនយោបាយលើកទឹកចិត្ត ជូនរង្វាន់ ដោយឈរលើសច្ចៈភាព និងតម្លាភាព។*បន្តយកចិត្តទុកដាក់ថែរក្សាសុខភាព អនាម័យ ទាំងក្នុងអគារ និងបន្ទប់ឃុំឃាំង និងនៅក្នុងបរិវេណពន្ធនាគារ ត្រូវធានាឱ្យមាននូវរបៀបរៀបរយ សណ្តាប់ធ្នាប់ និងបរិស្ថានល្អ។
*ត្រូវស្វ័យសិក្សារៀនសូត្របង្កើនចំណេះដឹង ធ្វើការផ្សព្វផ្សាយច្បាប់ លិខិតបទដ្ឋានគតិយុត្ត គោលនយោបាយរាជរដ្ឋាភិបាល ក្រសួងមហាផ្ទៃ និងគោលការណ៍ ឬសេចក្តីណែនាំរបស់ អគ្គនាយកដ្ឋាន ដល់មន្ត្រីក្រោមឱវាទ និងចាត់ចែងអនុវត្តឱ្យមានប្រសិទ្ធភាពខ្ពស់។

គួរបញ្ជក់ថា លោកឧត្តមអគ្គានុរក្សថ្នាក់លេខ២ ម៉ុង ម៉េងអ៊ាន់ ត្រូវបានចូលកាន់មុខតំណែងជាប្រធានពន្ធនាគារថ្មី នៃខេត្តត្បូងឃ្មុំ ជំនួសលោកឧត្តមអគ្គានុរក្សថ្នាក់លេខ២ តាម វៃ ដែលត្រូវចូលនិវត្តន៍បន្ទាប់ពីរូបលោកបានបម្រើការងារក្នុងបុព្វហេតុវិស័យពន្ធនាគារអស់រយៈពេលយូរកន្លងមក៕