អភិបាលក្រុងអរិយក្សត្របញ្ជាក់ច្បាស់ថា ក្រោយព្យុះចប់ខាងមុខនេះ រដ្ឋបាលក្រុង និងមន្ទីរសាធារណការ និងដឹកជញ្ជូនខេត្តនឹងធ្វើការជួសជុលសម្រួលជូនបងប្អូនប្រជាពលរដ្ឋហើយ!

(កណ្ដាល)៖ ក្រោយទទួលបានព័ត៌មានពីប្រជាពលរដ្ឋដែលបានធ្វើការបង្ហោះនៅលើបណ្ដាញសង្គមហ្វេសប៊ុកនៅថ្ងៃនេះ ពាក់ព័ន្ធផ្លូវខូចនៅក្នុងក្រុងអរិយក្សត្រ លោក ចាន់ តារា អភិបាលក្រុងនិងជាប្រធានគណៈបញ្ជាការឯកភាពក្រុងអរិយក្សត្របានបំភ្លឺជូនភ្លាមៗនៅថ្ងៃនេះថា «ចំពោះករណីផ្លូវក្នុងក្រុងអរិយក្សត្រនេះ រដ្ឋបាលក្រុង និងមន្ទីរសាធារណការ និងដឹកជញ្ជូនខេត្តនឹងចុះធ្វើការជួសជុលកែលម្អឱ្យបានស្អាតល្អ សម្រួលដល់ការអ្វើដំណើរ ក្រោយស្ថានភាពអាកាសធាតុល្អប្រសើរ នាពេលខាងមុខឆាប់ៗនេះ»។ លោកអភិបាលបានប្រាប់ឱ្យអង្គភាព The Mirror News ដឹងនៅល្ងាចនេះថា ក្រោយព្យុះចប់ខាងមុខនេះ រដ្ឋបាលក្រុង និងមន្ទីរសាធារណការ និងដឹកជញ្ជូនខេត្តនឹងធ្វើការជួសជុលសម្រួលជូនបងប្អូនប្រជាពលរដ្ឋហើយ។

ជុំវិញផ្លូវខូចនេះ ក៏មានមតិលើកឡើងផ្សេងៗគ្នាផងដែរ ដោយអ្នកខ្លះបានលើកឡើងថា សូមអរគុណដល់ថ្នាក់ដឹកនាំក្រុងអរិយក្សត្រក៏ដូចថ្នាក់ដឹកនាំគ្រប់លំដាប់ថ្នាក់ដែលយកចិត្តទុកដាក់អំពីសុខទុក្ខរបស់ប្រជាពលរដ្ឋដែលរស់នៅក្នុងមូលដ្ឋានក្រុងអរិក្សត្រទាំងមូល។ អ្នកខ្លះបានលើកឡើងថា យក​គ្រឿងចក្រឈូសបណ្តោះអាសន្នសិនទៅ​ ឈូសថេីរៗ​សំរួលសិន​ ចាំមេឃរាំងចាំចាត់ការវា។​ រីឯអ្នកខ្លះទៀតក៏បានលើកឡើងថា បាទអរគុណ អរគុណណាស់ ដល់ថ្នាក់ដឹកនាំគ្រប់លំដាប់ថ្នាក់ដែលបានយកចិត្តទុកដាក់អំពីសុខទុក្ខរបស់ប្រជាពលរដ្ឋដែលរស់នៅទាំងមូលនៃក្រុងអរិយក្សត្រនេះ៕