ក្រុមPMខេត្តកណ្ដាលចាប់ឃាត់ខ្លួនមនុស្ស២នាក់យកញាត់គុកពាក់ព័ន្ធគ្រឿងញៀន

(កណ្តាល)៖ កម្លាំងកងរាជអាវុធហត្ថស្រុកកៀនស្វាយកាលពីថ្ងៃទី២ ខែមិថុនា ឆ្នាំ២០២៥ បន្ទាប់ពីទទួលបានព័ត៌មានពីប្រជាពលរដ្ឋថាមានករណីជួញដូរដោយខុសច្បាប់នូវសារធាតុញៀន ស្ថិតក្នុងឃុំដីឥដ្ឋ ស្រុកកៀនស្វាយ ខេត្តកណ្តាល។

ដោយមានការដឹកនាំចង្អុលបង្ហាញផ្ទាល់ពីលោកឧត្តមសេនីយ៍ត្រី សំ តុលា មេបញ្ជាការខេត្ត និងមានការសម្របសម្រួលនីតិវិធីពី លោកព្រះរាជអាជ្ញាអមសាលាដំបូងខេត្ត កម្លាំងជំនាញបានចុះដល់ទីកន្លែងជាក់ស្តែង ឃាត់ខ្លួនជនសង្ស័យ ចំនួន ០២នាក់ យកមកអង្គភាពដើម្បីសាកសួរ។ ដោយបានចាប់យកវត្ថុតាង៖ ថ្នាំញៀន(ម៉ាទឹកកក) ចំនួន ១កញ្ចប់, ទូរសព្ទ ០១គ្រឿង, ម៉ូតូ ០១គ្រឿង, សម្ភារប្រើប្រាស់និងវេចខ្ចប់មួយចំនួន។

ក្រោយមកជនសង្ស័យ និងវត្ថុតាងសមត្ថកិច្ចកងរាជអាវុធហត្ថខេត្តកណ្តាល បានកសាងសំណុំរឿង បញ្ជូនទៅសាលាដំបូងខេត្តតាមនីតិវិធី។

បច្ចុប្បន្នជនសង្ស័យខាងលើត្រូវបានចៅក្រមស៊ើបសួរសាលាដំបូងចេញដីកាបង្គាប់ឲ្យឃុំខ្លួនបណ្ដោះអាសន្តនៅពន្ធនាគារខេត្តកណ្ដាលហើយ៕