ការសង់សំណង់រំលោភដីច្រាំងទន្លេមេគង្គនៅចំណុចភូមិព្រែកតូច លោកមេឃុំព្រែកទម្លាប់បើកដៃឲ្យមិត្តភក្ដិលោកសង់ ខណៈលោកអភិបាលស្រុកលើកដែកតម្រូវឲ្យម្ចាស់ធ្វើច្បាប់ស្នើសុំសាងសង់ទៅក្រសួងធនធានទឹកស្របតាមនីតិវិធី

(កណ្ដាល)៖ បន្ទាប់ពីមេឃុំព្រែកទម្លាប់ លោក ងី សាវី បានបដិសេធថា លោកមិនបានសាងសង់សំណង់រឹងមាំរំលោភដីច្រាំងទន្លេមេគង្គនៅចំណុចភូមិព្រែកតូច ឃុំព្រែកទម្លាប់ ស្រុកលើកដែក ខេត្តកណ្ដាលនោះទេ ហើយលោកបានបញ្ជាក់ថា សំណង់នោះគឺជារបស់មិត្តភក្កិរបស់លោក។

លោក ចាប ច័ន្ទវិទ្យា អភិបាលស្រុកលើកដែកបានឲ្យអង្គភាព The Mirror News ដឹងថា ករណីនេះ ស្រុកបានចុះធ្វើកំណត់ហេតុរួចរាល់ហើយ និងបានរាយការណ៍ទៅឯកឧត្តមអភិបាលខេត្តរួចហើយផងដែរ។ ទីតាំងនេះពិនិត្យជាក់ស្តែងជាដីលំនៅដ្ឋានដែលមានផ្ទះជាច្រើនរស់នៅស្របតាមមាត់ទន្លេ។

លោកអភិបាលស្រុកបានឲ្យដឹងទៀតថា កន្លងទៅក៏មានការបាក់ដីចូលទន្លេជាប្រចាំផងដែរ។ ទីតាំងជាក់ស្តែងនេះ ពិនិត្យលើផ្លូវច្បាប់គឺស្ថិតក្នុងដីចំណីផ្លូវ និងចំណីទន្លេ។

លោក ចាប ច័ន្ទវិទ្យា បានបន្តថា ការកសាងទប់ច្រាំងនេះក៏មិនបានចូលដល់ការប៉ះពាល់ដល់ច្រាំងនោះទេ គ្រាន់ការពារកុំឲ្យបាក់ដីបន្តទៀតប៉ុណ្ណោះ។ ករណីនេះ ឯកឧត្តមអភិបាលខេត្តក៏បានទទួលព័ត៌មាន និងស្នើឲ្យម្ចាស់ទីតាំងធ្វើច្បាប់ស្នើសុំសាងសង់ទៅកាន់ក្រសួងធនធានទឹកស្របតាមនីតិវិធី។

គួរជម្រាបជូនថា ពាក់ព័ន្ធអ្នកលួចសាងសង់សំណង់រឹងមាំរំលោភដីច្រាំងទន្លេមេគង្គនៅចំណុចភូមិព្រែកតូចខាងលើនេះ បើតាមកំណត់ហេតុដែល The Mirror News ទទួលបានគឺលោក ចាប ច័ន្ទវិទ្យា អភិបាលស្រុកលើកដែកកាលពីថ្ងៃទី៣១ ខែឧសភា ឆ្នាំ២០២៥ បានចាត់តាំងលោក ម៉ន សិលា អនុប្រធានការិយាល័យនីតិកម្ម និងសម្រុះសម្រួលវិវាទមូលដ្ឋានស្រុក ចុះទៅពិនិត្យទីតាំងដីលំនៅឋានមួយកន្លែងកំពុងធ្វើសកម្មភាពសាងសង់ សំណង់របង ស្ថិតនៅភូមិព្រែកតូច ឃុំ ព្រែកទន្លាប់ ស្រុកលើកដែក ខេត្តកណ្តាល ដោយមានសមាសភាពចូលរួម៖ លោក ប៉ែន ចាន់ប៊ុនថាន់ អនុប្រធានការិ.សេដ្ឋកិច្ច និងអភិវឌ្ឍន៍សហគមន៍, លោក ងី សារី មេឃុំព្រែកទន្លាប់និងលោក សុខ បូ មេភូមិព្រែកតូច។

ក្រោយមកក្រុមការងារខាងលើបានចុះដល់ទីតាំងជាក់ស្តែងពិនិត្យឃើញថា ពិតជាមានក្រុមជាងចំនួន៦នាក់ កំពុងធ្វើសម្មភាពលាយបេតុចាក់ក្រវ៉ាត់ធ្នឹមរបងទប់ដីមិនឲ្យហូរច្រោះទៅភាគីជាប់ព្រំ។ បន្ទាប់មកក្រុមការងារបានហៅមេជាងមកសួរនាំរកម្ចាស់ទីតាំង ភ្លាមនោះ ម្ចាស់ដីឈ្មោះ កែ ម៉ូលី ភេទប្រុស អាយុ៥៦ឆ្នាំ ទីលំនៅបច្ចុប្បន្នភូមិលេខ៨ សង្កាត់ចតុមុខ ខ័ណ្ឌដូនពេញ រាជធានី ភ្នំពេញបានមកដល់ជួបជាមួយក្រុមការងារខាងលើ និងបានឲ្យដឹងថា លោកបានទិញដីនេះពីឈ្មោះ ឈន សុខ ភេទស្រី រស់នៅភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល មានទំហំ ទទឹង ២៣,៥ ម៉ែត្រ បណ្តោយ ផ្លូវជាតិលេខ១៤ទល់ទន្លេ មានលិខិតផ្ទេរសិទ្ធិ ប្រើប្រាស់ និងអស្រ័យផល លេខ៨៤២៣/២៤ចុះថ្ងៃទី៣១ ខែធ្នូ ឆ្នាំ២០២៤ ចុះហត្ថលេខាដោយលោកមេឃុំព្រែកទន្លាប់។

បន្ទាប់មកក្នុងឆ្នាំ២០២៥ លោកមានបំណងសាងសង់របង និងរៀបចំចាក់ក្រវ៉ាត់ឆ្នើមបាតខាងក្រោមដើម្បីទប់ដីកំឲ្យហូច្នោះទៅអ្នកជិតខាង និងការពារកំឲ្យបាក់ច្រាំងទន្លេផង ពេលនោះលោកបានទៅសុំការអនុញាតនៅសាលាឃុំ ព្រែកទន្លាប់ជួបលោកមេឃុំបានពន្យល់ណែនាំលោកថាចំណុចដីដែលបានទិញនោះពិតជាដីដែលប្រជាពលរដ្ឋរស់នៅ កាន់កាប់ប្រើប្រាស់អាស្រ័យផលរាប់ឆ្នាំកន្លងមកហើយមែន តែមិនអាចធ្វើប្លង់កម្មសិទ្ធិបានទេដោយស្ថានភាពជាក់ ស្តែងទីតាំងដីនេះចូលទៅក្នុងចំណីទន្លេ និងចំណីផ្លូវជាតិលេខ១៤ទាំងស្រុងទៅហើយ ដូចនេះមិនអាចចេញ លិខិតអនុញាតអោយសាងសង់សំណង់អ្វីឡើយ។

បើតាមលោក ងី សារី មេឃុំព្រែកទន្លាប់បានឲ្យដឹងថាកន្លងមកឈ្មោះ កែ ម៉ូលី ពិតជាបានមកជួបហើយ ស្នើសុំលិខិតអនុញាតសាងសង់ដូចការរៀបរាប់ខាងលើពិតប្រាកដមែនតែដោយមូលហេតុទីតាំងដីរបស់ប្រជាពល រដ្ឋស្ទើតែទាំងស្រុងដែលរស់នៅតាមបណ្តោយផ្លូវជាតិលេខ១៤ជួរខាងទន្លេ មិនអាចធ្វើបណ្ណកម្មសិទ្ធិបានឡើយ ចំពោះលិខិតអនុញាតសាងសង់អ្វីផ្សេងក៏មិនអាចចេញជូនបានដែរ ជាប្រភេទដីចំណីទន្លេ និងចំណីផ្លូវ។

បើតាមលោក មិន សិលា អនុប្រធានការិយាល័យនីតិកម្ម និងសម្រុះ សម្រួលវិវាទមូលដ្ឋានស្រុកបានឲ្យដឹងថា ចំពោះការសាងសចរបស់ឈ្មោះ កែ ម៉ូលី ជាប្រភេទសំណង់រឹងមានក្រវ៉ាត់ជុំញចាក់បេតុងនិងរៀបឥដ្ឋម្ភៃធ្វើជាជញ្ជាំងរបងមានទំហំទទឹង២៣,៥ម៉ែត្រ បណ្តោយ២០ម៉ែត្រ ទល់នឹងច្រាំងទន្លេ ការសាងសង់បានប្រហែល៣០% សង់លើដីចំណីផ្លូវ និងចំណីទន្លេទាំងស្រុង។ ចំពោះករណីនេះប្រជាពលរដ្ឋដែលរស់នៅតាមបណ្តោយផ្លូវជាតិលេខ១៤ជួរខាងទន្លេ បានកាន់កាប់ ប្រើប្រាស អាស្រ័យផល និងបានសង់លំនៅដ្ឋានអស់រយៈកាលជាច្រើនឆ្នាំកន្លងមកហើយនោះ សុំឲ្យនៅរក្សាដដែល ក្នុង ករណីចង់ជួសជុល កែលំអ ឬសាងសង់សំណង់បន្ថែមថ្មី តម្រូវឲ្យធ្វើកិច្ចសន្យាទទួលខុសត្រូវលើគុណភាពសំណង់ ផលប៉ះពាល់ផ្សេងៗ ជាមួយអាជ្ញាធរមូលដ្ឋាន ឬការិយាល័យជំនាញពាក់ព័ន្ធជាមុនសិន ជៀសវាងថ្ងៃក្រោយប៉ះពាល់ដល់គម្រោងអភិវឌ្ឍន៍ហេដ្ឋារចនាសម្ព័ន្ធរបស់រាជរដ្ឋាភិបាល៕