ចៅហ្វាយខេត្ត សរ សុពុត្រា៖ ប្រាប់ច្រើនដងហើយ នៅតែមិនជឿ ចង់ធ្វើក្មេងទំនើងនៅខេត្តស្ទឹងត្រែង លទ្ធផលគឺដូចក្នុងរូបភាពខាងក្រោម ជូនជ្រាប!

(ស្ទឹងត្រែង)៖ លោក សរ សុពុត្រា អភិបាលខេត្តស្ទឹងត្រែងនៅថ្ងៃទី២៩ ខែឧសភានេះបានបង្ហោះសារបែបព្រមាននៅលើទំព័រហ្វេសប៊ុកថា ប្រាប់ច្រើនដងហើយ នៅតែមិនជឿ ចង់ធ្វើក្មេងទំនើងនៅខេត្តស្ទឹងត្រែង លទ្ធផលគឺដូចក្នុងរូបភាពខាងក្រោម ជូនជ្រាប។

លោក សរ សុពុត្រា បានបន្តថាក្នុងនាមប្រធានគណៈបញ្ជាការឯកភាពរដ្ឋបាលខេត្តស្ទឹងត្រែង លោកសូមថ្លែងនូវការកោតសរសើរចំពោះកម្លាំងជំនាញនៃស្នងការដ្ឋាននគរបាលខេត្តស្ទឹងត្រែង ដែលបានអនុវត្តតាមបទបញ្ជា បើកការស្រាវជ្រាវរកក្រុមក្មេងទំនើងដែលបង្កការរំខានដល់សេចក្តីសុខរបស់ប្រជាពលរដ្ឋ។

លោកអភិបាលខេត្តបានបន្ថែមថា បន្ទាប់ពីទទួលបានព័ត៌មានពីករណីមានក្រុមក្មេងទំនើង ដេញកាប់គ្នា នៅទីសាធារណៈ លោកបានឱ្យគោលការណ៍ទៅលោកឧត្តមសេនីយ៍ទោស្នងការនគរបាលខេត្តធ្វើយ៉ាងណាគឺបង្ក្រាបក្រុមនេះឱ្យបានជាដាច់ខាត។

លោកចៅហ្វាយខេត្តរូបនេះបន្តទៀតថា កម្លាំងជំនាញ ប្រើរយៈពេលមិនដល់២៤ម៉ោងផង យើងបង្ក្រាបក្រុមនេះ បានជាហូរហែរ ចំពោះក្រុមដែលនៅសេសសល់ រួមទាំងក្រុមបង្ហោះម៉ូតូ និងក្រុមកែបំពង់ស៊ីម៉ាំងម៉ូតូ បើដឹងខ្លួន សូមចូលខ្លួនមកសារភាព ឬបញ្ឈប់សកម្មភាពជាបន្ទាន់ បើមិនដូច្នោះទេ ច្បាប់នឹងមិនលើកលែងឱ្យឡើយ។

នៅលើទំព័រហ្វេសប៊ុករបស់លោកដដែល លោកបានថ្លែងអំណរគុណចំពោះកិច្ចសហការក្នុងការផ្តល់ព័ត៌មានទាន់ពេលវេលាពីបងប្អូនប្រជាពលរដ្ឋ ដោយសេចក្តីគោរព៕