តុលាការខេត្តកណ្ដាលសម្រេចឃុំខ្លួនអតីតបុគ្គលិកធនាគារម្នាក់ឈ្មោះ ផង់ ចិន្ទ្រា ពាក់ព័ន្ធករណីករណីចេញសែកអត់លុយ!

(កណ្តាល)៖ ចៅក្រមស៊ើបសួរសាលាដំបូងខេត្តកណ្តាល លោក ស៊ាង ណារ៉ា បានចេញដីកាបង្គាប់ឱ្យឃុំខ្លួនបណ្តោះអាសន្ននូវឈ្មោះ ផង់ ចិន្ទ្រា ពី «បទមិនបំពេញកាតព្វកិច្ចចំពោះឧបករណ៍អាចជួញដូរបាន»  ប្រព្រឹត្តនៅភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី០៥ ខែវិច្ឆិកា ឆ្នាំ២០២៤។ នេះបើតាមប្រភពច្បាស់ការណ៍ដែលអង្គភាព The Mirror News ទើបទទួលបាននៅព្រឹកថ្ងៃទី២៩ ខែឧសភា ឆ្នាំ២០២៥នេះ។

ប្រភពបានបញ្ជាក់ថា ការសម្រេចឱ្យឃុំខ្លួនជាបណ្តោះអាសន្នជនត្រូវចោទឈ្មោះ ផង់ ចិន្ទ្រា  តាមសំណុំរឿងព្រហ្មទណ្ឌលេខ ១០៦៨ អ.ក ចុះថ្ងៃទី២៨ ខែឧសភា ឆ្នាំ២០២៥ របស់តំណាងអយ្យការអមសាលាដំបូងខេត្តកណ្តាល។ និងតាមដីកាសន្និដ្ឋានបញ្ជូនរឿងឱ្យស៊ើបសួរលេខ ៨០៦ ដកសស/២៥ ចុះថ្ងៃទី២៨ ខែឧសភា ឆ្នាំ ២០២៥ របស់តំណាងអយ្យការអមសាលាដំបូងខេត្តកណ្តាល។

គួរជម្រាបជូនថា ជនត្រូវចោទម្នាក់នេះឈ្មោះ ផង់ ចិន្ទ្រា ភេទប្រុស អាយុ ៤៥ឆ្នាំ ជនជាតិខ្មែរ សញ្ជាតិខ្មែរ ទីកន្លែង កំណើតនៅភូមិបាគូរ ឃុំបាគូ ស្រុកកណ្តាលស្ទឹង ខេត្តកណ្តាល និងមានទីលំនៅមុនពេលឃាត់ខ្លួននៅភូមិ ព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ(អតីតជាបុគ្គលិកធនាគារអេស៊ីលីដា) បានប្រព្រឹត្តបទល្មើសព្រហ្មទណ្ឌដែលមានចែង និងផ្តន្ទាទោសតាមបញ្ញត្តិមាត្រា២៣១ កថាខណ្ឌទី៣ នៃច្បាប់ស្តីពីឧបករណ៍អាចជួញដូរបាន និង ប្រតិបត្តិការទូទាត់សងប្រាក់៕