ក្រុមPMខេត្តកណ្ដាលចាប់និងបញ្ជូនខ្លួនជនសង្ស័យម្នាក់ទៅញាត់គុកពាក់ព័ន្ធគ្រឿងញៀន

(កណ្តាល)៖ កម្លាំងកងរាជអាវុធហត្ថក្រុងតាខ្មៅ កាលពីថ្ងៃទី២២ ខែឧសភា ឆ្នាំ២០២៥ បន្ទាប់ពីទទួលបានព័ត៌មានពីប្រជាពលរដ្ឋថា មានករណីជួញដូរដោយខុសច្បាប់នូវសារធាតុញៀន ស្ថិតក្នុងសង្កាត់តាខ្មៅ ក្រុងតាខ្មៅ ខេត្តកណ្តាល។

ដោយមានការដឹកនាំចង្អុលបង្ហាញផ្ទាល់ពីលោក ឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោកព្រះរាជអាជ្ញាអមសាលាដំបូងខេត្ត កម្លាំងជំនាញបានចុះដល់ទីកន្លែងជាក់ស្តែងឃាត់ខ្លួនជនសង្ស័យចំនួន០១នាក់ យកមកអង្គភាពដើម្បីសាកសួរ។

កម្លាំងជំនាញបានចាប់បានវត្ថុតាងរួមមាន៖ ថ្នាំញៀន(ម៉ាទឹកកក) ចំនួន ៥កញ្ចប់, ទូរស័ព្ទ១គ្រឿង។

ជនសង្ស័យ និងវត្ថុតាងត្រូវបានសមត្ថកិច្ចកងរាជអាវុធហត្ថខេត្តកណ្តាល បានកសាងសំណុំរឿង បញ្ជូនទៅសាលាដំបូងខេត្តតាមនីតិវិធី។ នេះបើតាមប្រភពពីទំព័រហ្វេសប៊ុករបស់កងរាជអាវុធហត្ថខេត្តកណ្ដាល។

ប្រភពបានបញ្ជាក់ថា បច្ចុប្បន្ន ជនសង្ស័យត្រូវបានកម្លាំងជំនាញកងរាជអាវុធហត្ថខេត្តកណ្ដាលបញ្ជូនទៅឃុំខ្លួនតាមដីកាបង្គាប់ឲ្យឃុំខ្លួនបណ្ដោះអាសន្នរបស់សាលាដំបូងខេត្តកណ្ដាលហើយ៕