ម្ចាស់ដីពីរនាក់ប្តីប្រពន្ធបានយល់ព្រមទទួលស្គាល់ទំហំដីរបស់ខ្លួនតាមការជួយដោះស្រាយរបស់អភិបាលខេត្តកំពង់ចាម!

(កំពង់ចាម)៖ បន្ទាប់ពីទទួលបានសំណើររបស់ពលរដ្ឋចំនួនមួយគ្រួសារនៅភូមិទី៦ សង្កាត់វាលវង់ ក្រុងកំពង់ចាម គឺលោក ឡាយ យូគង់ និងអ្នកស្រី សុខ លក្ខិណា (ប្ដីប្រពន្ធ ) ដែលបានដាក់សំណេីមករដ្ឋបាលខេត្តកំពង់ចាម នាពេលថ្មីៗនេះ ថាពួកខ្លួនបានបាត់ទំហំដីដែលគាត់បានទិញ និងអាស្រ័យផលកន្លងមកនៅរសៀលថ្ងៃទី២៥​ ខែឧសភា​ ឆ្នាំ២០២៥លោក អ៊ុន ចាន់ដា​ អភិបាលខេត្តកំពង់ចាម និងជាប្រធាន គណៈកម្មការដោះស្រាយវិវាទដីធ្លីថ្នាក់ខេត្តបានដឹក​នាំ​មន្ត្រីជំនាញជួបពិភាក្សា​ និងធ្វើការដោះស្រាយជូនតាមសំណើរខាងលើ រហូតទទួលបានជោគជ័យដោយឈរលើមាគ៌ាឈ្នះឈ្នះ។

បន្ទាប់ពីលោកអភិបាលខេត្តបានពិនិត្យ​ និងពិភាក្សាយ៉ាងលំអិតជាមួយមន្ទីរជំនាញ​ តាមរយៈបណ្ណកម្មសិទ្ធិ ដែលទទួលស្គាល់កាលពីឆ្នាំ១៩៩៨​ បញ្ជាក់ថា៖ ទំហំដីដើមកាលពីមុន​ និងទំហំដីបច្ចុប្បន្នដែលត្រូវចុះបញ្ជីដីធ្លីបំពេញបន្ថែមនេះ​ គឺមានការប្រែប្រួលពីទំរង់ដេីមបន្តិចបន្តួចប៉ុណ្ណោះ​ ទំហំដីគឺមិនបាត់បង់ទេ។ លោកក៏បានបញ្ជាក់ជូនម្ចាស់កម្មសិទ្ធិដីដែលបាន​ស្នេីសុំខាងលេី​ សម្រេចទទួលស្គាល់ទំហំ​ដែល​បានបញ្ជាក់ជូនតាមការពិភាក្សា គឺមិនអាចមានទំហំលើសនេះបានទេ។

ក្រោយពីការពន្យល់ និងការសម្រេចរបស់លោកអភិបាលខេត្ត ម្ចាស់សំណេីពីរនាក់ប្តីប្រពន្ធបានយល់ព្រមទទួលស្គាល់ទំហំដីរបស់ខ្លួន។ ជាមួយគ្នានោះ អ្នកទាំងពីរនាក់ប្តីប្រពន្ធក៏បានយល់ព្រមរុះរើសំណង់រោងដែកដែលបានសាងសង់រួចនៅលើផ្លូវសាធារណ:ដោយស្ម័គ្រចិត្ត ហើយឆាប់ៗនេះ មន្រ្តីជំនាញនឹងចុះបញ្ជីដីធ្លីបំពេញបន្ថែមជូនអ្នកទាំងពីរ ដោយបានរក្សាផ្លូវទំហំទទឹង ៨ម៉ែត្រវិញ ដើម្បីជាប្រយោជន៍សាធារណៈ៕