ស្នងការព្រៃវែងបានដាក់បទបញ្ជាឲ្យកម្លាំងនគរបាលចរាចរណ៍នៅតាមផ្លូវជាតិឃាត់អ្នកបើកឡានក្រុងជនជាតិវៀតណាមមកណែនាំ និងធ្វើកិច្ចសន្យា

(ព្រៃវែង)៖ ស្នងការនគរបាលខេត្តព្រៃវែង លោកឧត្តមសេនីយ៍ទោ ឈឿន ប៊ុនឆន បានដាក់បទបញ្ជាឲ្យកម្លាំងនគរបាលចរាចរណ៍ នៅតាមផ្លូវជាតិ ឃាត់អ្នកបើកឡានក្រុងជនជាតិវៀតណាម ដើម្បីហៅមកណែនាំ និងធ្វើកិច្ចសន្យា ពេលបើកបរតាមផ្លូវ កាត់បន្ថយគ្រោះថ្នាក់ដែលបណ្តាលឲ្យស្លាប់និងរបួស។នេះបើតាមប្រភពដែល The Mirror News ទទួលបាននៅថ្ងៃនេះ។

អ្នកប្រើប្រាស់បណ្ដាញសង្គមហ្វេសប៊ុកបានបង្ហាញសង្គមថា នៅតាមបណ្តាញសង្គម លោកឃើញបងប្អូនបង្ហោះ ដែលអ្នកបើកឡានក្រុងជនជាតិវៀតណាមខ្លះ បើកឈ្លើយ ជែងខុសគន្លង និងប្រើល្បឿនហួសកំណត់ ដែលអាចបង្កគ្រោះថ្នាក់យ៉ាងខ្លាំង។

លោកក៏សូមអរគុណចំពោះវិធានការរបស់លោកឧត្តមសេនីយ៍ស្នងការនគរបាលខេត្តព្រៃវែង ដែលជាចំណែកយ៉ាងខ្លាំងចូលរួមកាត់បន្ថយគ្រោះថ្នាក់តាមផ្លូវ ហើយក៏ជាការព្រមានដល់ជនជាតិវៀតណាមទាំងនោះកុំឲ្យព្រហើន និងត្រូវចេះគោរពច្បាប់ចរាចរណ៍របស់ប្រទេសយើងផងដែរ៕