រដ្ឋបាលឃុំល្អៀងគួរបំភ្លឺឲ្យច្បាស់ ពាក់ព័ន្ធតួនាទី ឈ្មោះមន្ត្រីឃុំដែលយកឈ្មោះចៅហ្វាយខេត្តទៅគំរាមគំហែងអ្នកសារព័ត៌មាន!

(ត្បូងឃ្មុំ)៖ រដ្ឋបាលឃុំល្អៀងបំភ្លឺថា ក្រោយពីបានឃើញបណ្តាញព័ត៌មានជាច្រើនបន្តផ្សព្វផ្សាយពាក់ព័ន្ធទៅនឹងដំណើរការដេញថ្លៃគម្រោងមូលនិធិឃុំល្អៀង នាព្រឹកថ្ងៃទី១៣ ខែឧសភា ឆ្នាំ២០២៥កន្លងទៅនេះ ដែលធ្វើឱ្យមានការភាន់ច្រឡំ និងប៉ះពាល់ដល់រដ្ឋបាលឃុំ ក៏ដូចជាប៉ះពាល់កិត្តិយស និងសេចក្តីថ្លៃថ្នូររបស់មន្ត្រីថ្នាក់ខេត្ត មន្ត្រីថ្នាក់ស្រុក និងក្រុមប្រឹក្សាឃុំទាំងមូល។ នេះបើតាមសេចក្ថីបំភ្លឺដែលអង្គភាព The Mirror News ទទួលបាននៅព្រឹកថ្ងៃទី១៥ ខែឧសភា ឆ្នាំ២០២៥នេះ។

រដ្ឋបាលឃុំបំភ្លឺទៀតថា បុគ្គលឈ្មោះ ចិន ចាន់រដ្ឋា បានចូលមកធ្វើសកម្មភាពអុកឡុកថតបង្ហោះផ្សព្វផ្សាយដោយគ្មានការអនុញ្ញាត ពីរដ្ឋបាលឃុំឡើយ។ យោងសេចក្តីណែនាំរបស់រដ្ឋបាលខេត្តត្បូងឃ្មុំលេខ០១០/២៤ សណន.តឃ ចុះថ្ងៃទី១៦ ខែតុលា ឆ្នាំ២០២៤ ស្តីពីការពង្រឹងការរៀបចំ និងការអនុវត្តកិច្ចលទ្ធកម្មគម្រោងមូលនិធិឃុំ សង្កាត់ ក្នុងខេត្តត្បូងឃ្មុំ រដ្ឋបាលខេត្តត្បូងឃ្មុំបានចេញសេក្តីណែនាំដល់អ្នកសារព័ត៌មានទាំងអស់ ដែលអាចចូលសង្កេតការណ៍ការដេញថ្លៃ បាន ត្រូវស្ថិតក្រោមការត្រួតពិនិត្យ និងការជ្រើសរើសអ្នកសារព័ត៌មានដែលមានអាជីពមានក្រមសីលធម៌វិជ្ជាជីវៈ រួចហើយចេញប័ណ្ណសម្គាល់ដើម្បីអនុញ្ញាតឱ្យចូលសង្កេតការណ៍ក្នុងដំណើរការដេញថ្លៃ។ ក្នុងករណីអ្នកសារព័ត៌មានណាមួយ មិនគោរព ហើយប្រព្រឹត្តបំពានល្មើសទៅនឹងការណែនាំនេះ រដ្ឋបាលខេត្តនឹងចាត់វិធានការណ៍តាមច្បាប់ជាធរមាន។

នៅក្នុងសេចក្ដីបំភ្លឺបន្ថែមទៀតថា ដោយផ្អែកលើសេចក្តីណែនាំនេះ ទើបរដ្ឋបាលឃុំល្អៀង មិនអនុញ្ញាតឱ្យបុគ្គលអ្នកសារព័ត៌មានរូបនេះ ចូលមកថតបង្ហោះផ្សព្វផ្សាយ ព្រោះបុគ្គលអ្នកសារព័ត៌មានខាងលើ មិនបានបង្ហាញអាជ្ញាបណ្ណដែលមានសុពលភាពមកក្រុមការងារ ទើបក្រុមការងារមិនអនុញ្ញាតឱ្យចូល គឺបុគ្គលសារព័ត៌មានខាងលើបានចុះថតបង្ហោះ ផ្សព្វផ្សាយដោយគ្មានការអនុញ្ញាត ដែលបណ្តាលឱ្យមន្ត្រីសាលាខេត្តបានធ្វើការសួរនាំសម្របស្រមូលជាច្រើនដង ដោយកាយវិការសមរម្យ តែបុគ្គលខាងលើនេះ មិនបានសហការធ្វើតាមការណែនាំ ព្រមទាំងធ្វើការប្រមាថមកលើមន្ត្រីរាជការ និងក្រុមការងាររៀបចំសណ្តាប់ធ្នាប់ក្នុងបរិវេនសាលាឃុំ ដែលជាហេតុធ្វើឱ្យមន្ត្រីសាលាខេត្តមានការមិន សប្បាយចិត្ត និងបានប្រើពាក្យ សម្ដីបណ្តេញឱ្យអ្នកសារព័ត៌មានខាងលើចេញពីបរិវេនសាលាឃុំ។

ពាក់ព័ន្ធសេចក្ដីបំភ្លឺរបស់រដ្ឋបាលឃុំខាងលើនេះ សាធារណជនបានលើកជាសំណួរថា តើរដ្ឋបាលឃុំល្អៀងមានបានចេញសេចក្ដីជូនដំណឹងជាសាធារណៈស្ដីពីការដេញថ្លៃគម្រោងមូលនិធិឃុំល្អៀងនិងបង្ហាញតារាងឈ្មោះអ្នកសារព័ត៌មានដែលមានសិទ្ធិចូលរួមសង្កេតការណ៍ទេ? តើភាពច្រង៉ែងច្រង៉ាងរបស់មន្ត្រីរដ្ឋបាលឃុំល្អៀងចំពោះអ្នកសារព័ត៌មាននេះជារបៀបរបបនៃកិច្ចសហការជារវាងស្ថាបនរដ្ឋនិងអ្នកសាេព័ត៌មានឬ? តើក្រមសីលធម៌វិជ្ជាជីវៈក្នុងនាមលោកជាមន្ត្រីបម្រើរាស្ត្រមានពាក្យសម្ដី កាយវិការបែបដូចក្នុងវិដេអូឬរូបភាពដែលត្រូវបានគេផ្សព្វផ្សាយនោះឬយ៉ាងដូចម្ដេច? តើការយកឈ្មោះចៅហ្វាយខេត្តទៅគំរាមគំហែងអ្នកសារព័ត៌មានបែបណា តើលោកយល់ឃើញដូចម្ដេច? តើមន្ត្រីរដ្ឋបាលឃុំដែលមានកាយវិការច្រង៉ែងច្រង៉ាងនោះមានឈ្មោះអ្វី មានតួនាទីជាអ្វី ហេតុអ្វីរដ្ឋបាលឃុំមិនបញ្ជាក់ឲ្យច្បាស់លាស់?

សាធារណជនសំនូមពរឲ្យរដ្ឋបាលឃុំខាងលើជួយបំភ្លឺពីសកម្មភាព កាយវិការនិងពាក្យសម្ដីអសីលធម៌ គ្មានក្រមសីលធម៌របស់មន្ត្រីរដ្ឋបាលឃុំនៅក្នុងវិដេអូដែលត្រូវបានគេផ្សព្វផ្សាយឲ្យសាធារណជនយល់ច្បាស់ផង៕