អាជ្ញាធរស្រុកខ្សាច់កណ្ដាលនិងមន្ត្រីជំនាញមន្ទីរបរិស្ថានខេត្តកណ្តាលជម្រុញឲ្យក្រុមហ៊ុន ស៊ិន ទ្រី ត្រូវមានវិធានការទប់ស្កាត់កុំឱ្យមានការឆេះបន្តទៀត និងត្រូវរៀបចំដាំដើមឈើនៅតាមផ្លូវចូល និងជុំវិញទីតាំងរណ្តៅឱ្យបានច្រើន

(កណ្ដាល)៖ អាជ្ញាធរស្រុកខ្សាច់កណ្ដាលនិងមន្ត្រីជំនាញមន្ទីរបរិស្ថានខេត្តកណ្តាលកាលពីថ្ងៃទី២៥ ខែមេសា ឆ្នាំ២០២៥ បានជម្រុញឲ្យក្រុមហ៊ុន ស៊ិន ទ្រី ត្រូវមានវិធានការទប់ស្កាត់កុំឱ្យមានការឆេះបន្តទៀត និងត្រូវរៀបចំដាំដើមឈើនៅតាមផ្លូវចូល និងជុំវិញទីតាំងរណ្តៅឱ្យបានច្រើន។ 

ការជម្រុញបែបនេះ ក្នុងពេលដែល លោក អាន គូរ៉ា ប្រធានការិយាល័យនៃមន្ទីរបរិស្ថានខេត្តកណ្ដាលនិងតំណាងរដ្ឋបាលស្រុកខ្សាច់កណ្តាល អាជ្ញាធរឃុំពុកឫស្សី ភូមិអញ្ជែងលើ និងតំណាងក្រុមហ៊ុន ស៊ីន ទ្រី បានចុះធ្វើការត្រួតពិនិត្យនៅទីតាំងឆេះរណ្តៅចាក់សំរាមរបស់ក្រុមហ៊ុន ស៊ីន ទ្រី នៅភូមិអញែងលើ ឃុំពុកឫស្សី ស្រុកខ្សាច់កណ្តាល ខេត្តកណ្តាល។ នេះបើតាមប្រភពអង្គភាព The Mirror News ទទួលបាននៅថ្ងៃទី១៤ ខែឧសភា ឆ្នាំ២០២៥។

បើតាមប្រភពច្បាស់ការណ៍ពីអាជ្ញាធរស្រុកខ្សាច់កណ្ដាលបានឲ្យអង្គភាព The Mirror News ដឹងថា មានប្រជាពលរដ្ឋរស់នៅក្បែរទីតាំងខាងលើចំនួន២០នាក់ដែលបានកំពុងប្រកបរបររើសអេតចាយ។ហើយការឆេះសំរាមខាងលើនេះ ភាគច្រើនគឺបណ្ដាលមកពីអ្នករើសអេតចាយពេលយប់ជាអ្នកដុត។ 

ប្រភពបន្តថា ពាក់ព័ន្ធការឆេះនេះ ក្រុមហ៊ុនក៏បានយកម៉ាស៊ីនបូមទឹកដើម្បីបាញ់ពន្លត់បណ្តោះអាសសន្នដែរ ហើយរដ្ឋបាលស្រុកខ្សាច់កណ្តាលក៏បានយកឡានទឹកជួយបាញ់ពន្លត់ហើយកន្លងមករដ្ឋបាលស្រុក និងរដ្ឋបាលឃុំ តែងតែណែនាំដល់ប្រជាពលរដ្ឋដែលរស់នៅទីនោះ កុំឲ្យដុតសំរាមផងដែរ។

ទាក់ទិនករណីនេះ តំណាងអាជ្ញាធរឃុំពុកឫស្សី និងស្រុកខ្សាច់កណ្តាលបានស្នើឱ្យក្រុមហ៊ុន ស៊ិន ទ្រី ជួយកែសម្រួលផ្លូវចូលចាក់សំរាមឱ្យដល់ក្នុង ផុតពីមាត់រណ្តៅ និងត្រូវបន្ថែមម៉ាស៊ីនបូមទឹកដើម្បីពន្លត់ភ្លើងពេលមានការឆេះ។ ហើយឃើញថាបច្ចុប្បន្នក្រុមហ៊ុនមានម៉ាស៊ីនបូមទឹកតែមួយគ្រឿងសំរាប់បូមទឹក។អាជ្ញាធរមូលដ្ឋានក៏បានណែនាំឲ្យក្រុមហ៊ុនត្រូវរុញសំរាមដែលមាននៅលើផ្លូវ និងមាត់រណ្តៅ ឱ្យចូលក្នុងរណ្តៅឱ្យផុត និងត្រូវមានអ្នកឃ្លាំមើល ឬអ្នកប្រចាំការ និងរាយការណ៍មកអាជ្ញាធរមានសមត្ថកិច្ច ពាក់ព័ន្ធជាប្រចាំនៅទីតាំងរណ្តៅ។ 

បើតាមតំណាងមន្ទីរបរិស្ថានខេត្តកណ្តាលបានលើកឡើងថាក្រុមហ៊ុនត្រូវមានវិធានការទប់ស្កាត់កុំឱ្យមានការឆេះបន្តទៀត។ ហើយក្រុមហ៊ុនត្រូវរៀបចំដាំដើមឈើនៅតាមផ្លូវចូល និងជុំវិញទីតាំងរណ្តៅឱ្យបានច្រើន។ លោកបន្តថា ករណីឆេះនេះ បណ្តាលមកពីអ្នករើសអេតចាយតែងតែដុតដើម្បីងាយស្រួលក្នុងការរើស និងពេលខ្លះអាចឆេះពីក្រោមមកដោយការអាកាសធាតុក្តៅខ្លាំង រួមទាំងភ្លើងដែលនៅក្នុង ធ្វើឱ្យឆេះឡើងវិញ៕