ឈ្មួញបានកំពុងធ្វើសកម្មភាពជីកដីប្រឡាយលក់ដោយគ្មានការអនុញ្ញាតយ៉ាងអាណាធិបតេយ្យនៅឃុំសំរោងលើ ខណៈចៅហ្វាយស្រុកអង្គស្នួលថា ឥឡូវបើមានបញ្ហាច្រើន លោកឲ្យផ្អាកសិន!

(កណ្ដាល)៖ ឈ្មួញមួយចំនួនបានកំពុងធ្វើសកម្មភាពជីកដីប្រឡាយសាធារណៈយកទៅលក់ដោយគ្មានការអនុញ្ញាតច្បាស់លាស់យ៉ាងអាណាធិបតេយ្យស្ថិតនៅក្នុងឃុំសំរោងលើ ស្រុកអង្គស្នួល ខេត្តកណ្ដាល។ នេះបើតាមប្រភពដែលអង្គភាព The Mirror News ទទួលបាននៅថ្ងៃទី៧ ខែឧសភា ឆ្នាំ២០២៥នេះ។

ប្រភពពីប្រជាពលរដ្ឋក្នុងមូលដ្ឋានសំរោងលើបាននិយាយថា ការជីកដីនេះ បានបំផ្លាញបរិស្ថាន ធ្វើឲ្យផ្លូវជាតិ និងផ្លូវជាសាធារណៈខូចខាត និងប៉ះពាល់ដល់សេដ្ឋកិច្ចពលរដ្ឋក្នុងតំបន់។

ប្រភពបានខ្សឹបឲ្យដឹងថា សកម្មភាពឈ្មួញជីកដីនេះ កំពុងដំណើរការក្រោមការយល់ព្រម ឬការដឹងឮពីមន្ត្រីមូលដ្ឋានមួយចំនួន ដោយមានការផ្តល់កម្រៃឲ្យមន្ត្រីទាំងនេះ ដើម្បីអាចអនុវត្តសកម្មភាពបានដោយគ្មានអង្គភាពណាអាចរារាំងបាន។

ប្រជាពលរដ្ឋបានអំពាវនាវទៅក្រសួងធនធានទឹកនិងឧតុនិយម ក្រសួងបរិស្ថាន និងអាជ្ញាធរមូលដ្ឋានឲ្យចូលមកពិនិត្យសកម្មភាពនេះយ៉ាងឆាប់រហ័ស។ ពួកគេចង់ឲ្យមានការចាត់ចែងច្បាស់លាស់ក្នុងការការពារសម្បត្តិសាធារណៈ និងធ្វើឲ្យមានយុត្តិធម៌ចំពោះពលរដ្ឋដែលរងផលប៉ះពាល់។

ទាក់ទិនរឿងរ៉ាវជីកដីលក់យ៉ាងអាណាធិបតេយ្យខាងលើនេះ ប្រភពពីមន្ត្រីមូលដ្ឋានបានបង្ហើបឲ្យដឹងថា រឿងការជីកដីហ្នឹង ឥឡូវរញ៉េរញ៉ៃណាស់ ហើយលោកចៅហ្វាយស្រុកក៏ដឹងរឿងហ្នឹងដែរ។

ជុំវិញករណីខាងលើនេះ លោក នូ សុវណ្ណារិទ្ធ អភិបាលស្រុកអង្គស្នួលបានប្រាប់ឲ្យ The Mirror News ដឹងនៅរសៀលនេះថា ចំពោះការងារហ្នឹង ចាំមើលលោកសួរទៅឃុំសិន ព្រោះកន្លងមក លោកប្រគលឲ្យឃុំ និងដោយខាងអាវុធហត្ថមានតម្រូវការយកអាចម៍ដីទៅចាក់ទៅបន្ទាយថ្មី។ លោកបន្តថា លោកអនុញ្ញាតឲ្យតែការស្ដារ ជួយប្រជាពលរដ្ឋ និងការបំពេញជូនរដ្ឋបាលទេ។

លោកអភិបាលស្រុកបានបញ្ជាក់ឲ្យដឹងយ៉ាងនេះទៀតថា ឥឡូវបើមានបញ្ហាច្រើន លោកឲ្យផ្អាកសិន ចាំឲ្យមានឯកសារត្រឹមត្រូវសិន ព្រោះអត់មានឯកសារអនុញ្ញាតពីលោកឯណាទេ។

ប្រជាពលរដ្ឋស្នើសុំឲ្យអាជ្ញាធរមូលដ្ឋានបញ្ឈប់សកម្មភាពឈ្មួញជីកដីប្រឡាយយកទៅលក់ភ្លាមៗ ហើយធ្វើការពិនិត្យសកម្មភាពទាំងនោះ ដើម្បីការពារកុំឲ្យមានការបំផ្លាញបរិស្ថាន និងទ្រព្យសម្បត្តិសាធារណៈបន្ថែមទៀត៕