មេបក្សកម្លាំងជាតិឃុំពុកឫស្សីព្រមាន គំរាមប្ដឹងចាប់ពលរដ្ឋដាក់គុក និងពិន័យលុយ២០លានរៀល ព្រោះតែពលរដ្ឋហាមមិនឲ្យដាក់ផ្លាកគណបក្សកម្លាំងជាតិនៅមុខផ្ទះរបស់ពួកគាត់ ដោយគ្មានការអនុញ្ញាត

(កណ្ដាល)៖ ប្រធានគណបក្សកម្លាំងជាតិឃុំពុកឫស្សី ស្រុកខ្សាច់កណ្ដាល ខេត្តកណ្ដាល លោក ជាម សុខុន ព្រមាន និងគំរាមពលរដ្ឋឲ្យដកពាក្យបណ្ដឹងវិញ ក្រោយពលរដ្ឋប្ដឹងសុំអន្ដរាគមន៍ពីអាជ្ញាធរ ដោយសារគណបក្សនេះលើកផ្លាកនៅពីមុខផ្ទះពួកគាត់ដោយគ្មានការអនុញ្ញាត។

បើតាមប្រភពថា ប្រធានគណបក្សកម្លាំងជាតិឃុំពុកឫស្សី លោក ជាម សុខុន បានគំរាមកំហែងប្រជាពលរដ្ឋ កាលពីថ្ងៃទី២ ខែឧសភា ឆ្នាំ២០២៥ ដោយបានប្រើសំឡេងធ្ងន់ៗថា ប្រសិនបើអ្នកណាហ៊ានប៉ះពាល់ ឬដកផ្លាកគណបក្សដែលបក្ខពួករបស់ខ្លួនដាក់នៅមុខផ្ទះពលរដ្ឋនោះ លោកនឹងប្ដឹងចាប់ដាក់ពន្ធនាគារ និងពិន័យលុយចំនួន២០លានរៀលថែមទៀតផង។ ដោយឡែក ចំពោះពលរដ្ឋដែលប្ដឹងលោកកាលពីម្សិលមិញ លោកបានប្រាប់ឲ្យដកពាក្យបណ្ដឹងវិញជាបន្ទាន់ បើមិនដូច្នេះទេ លោកនឹងប្ដឹងបកវិញជាក់ជាមិនខានឡើយ។

បើតាមប្រភពបានឲ្យដឹងថា លោក ឡូយ សារឹម អាយុ៤៧ឆ្នាំ ជាប្រជាពលរដ្ឋរស់នៅភូមិអញ្ជែងក្រោម ឃុំពុកឬស្សី ស្រុកខ្សាច់កណ្ដាល ខេត្តកណ្ដាល បានដាក់ពាក្យបណ្ដឹងទៅកាន់អាជ្ញាធរ ដើម្បីសុំការអន្តរាគមន៍ចំពោះការលើកផ្លាកគណបក្សកម្លាំងជាតិ នៅមុខផ្ទះរបស់ពួកគាត់ ដោយគ្មានការអនុញ្ញាត និងមិនពេញចិត្តពីលោកដែលជាម្ចាស់ផ្ទះ។

ប្រភពបានឲ្យដឹងទៀតថា មានមនុស្សប៉ុន្មាននាក់របស់បក្សកម្លាំងជាតិ កាលពីថ្ងៃទី១ ខែឧសភា ឆ្នាំ២០២៥ បានទៅលើកផ្លាកគណបក្សរបស់ក្រុមខ្លួននៅមុខផ្ទះប្រជាពលរដ្ឋដែលធ្វើឲ្យប្រជាពលរដ្ឋសម្ដែងការខឹងសម្បារ និងមិនពេញចិត្តជាខ្លាំង។

ប្រភពបន្ថែមថា ខណៈពេលក្រុមមនុស្សរបស់បក្សកម្លាំងជាតិបានកំពុងលើកផ្លាក ពួកគាត់បានទៅហាមឃាត់ ដើម្បីបញ្ឈប់សកម្មភាព ប៉ុន្តែសកម្មជនគណបក្សនេះ មិនបញ្ឈប់ឡើយ ពីសំណាក់បុគ្គលឈ្មោះ ជាម សុខខុន។ ក្រោយមកប្រជាពលរដ្ឋបានទៅដាក់ពាក្យបណ្ដឹងទៅកាន់អាជ្ញាធរ ដើម្បីជួយអន្តរាគមន៍ និងបញ្ឈប់សកម្មភាព នៃការលើកស្លាកគណបក្សកម្លាំងជាតិ ដោយហេតុថា ពួកគាត់មិនពេញចិត្តនឹងមិនអនុញ្ញាតឲ្យមានការលើកស្លាកគណបក្សមួយនេះឡើយ។

លោក ឡូយ សារឹម បានអះអាងថា កាពីថ្ងៃទី៣០ ខែមេសា ឆ្នាំ២០២៥ មានឈ្មោះ ជាម សុខខុន តំណាងគណបក្សកម្លាំងជាតិឃុំពុកប្ញស្សី បានមកទំនាក់ទំនងសុំដាក់ផ្លាកគណបក្សកម្លាំងជាតិមុខដីរបស់លោក តែលោកមិនបានយល់ព្រមទេ ស្រាប់តែនៅថ្ងៃទី១ ខែឧសភា ឆ្នាំ២០២៥ វេលាម៉ោង ២រសៀល ជៀម សុខខុន និងបក្ខពួកមួយក្រុម ប្រមាណ១០នាក់ នាំគ្នាមកជីកបង្គោលរៀបឥដ្ឋ លើកផ្លាកគណបក្សកម្លាំងជាតិ នៅលើដីចំហៀងខាងត្បូងមុខផ្ទះលោក ទោះបីលោកប្រាប់និងមានកម្លាំងនគរបាលហាមឃាត់ឲ្យផ្អាក ក៏នៅតែបន្តធ្វើរួចរាល់ដែរ។

ដើម្បីកុំឲ្យសាធារណៈជនយល់ច្រឡំថា លោក និងគ្រួសារ ជាសមាជិកគណបក្សកម្លាំងជាតិ លោកស្នើសុំលោកអភិបាលស្រុកខ្សាច់កណ្តាល មេត្តាអន្តរាគមន៍រុះរើផ្លាកគណបក្សកម្លាំងជាតិចេញឲ្យផុតពីដីមុខផ្ទះរបស់លោកផង៕