ក្រុមPMខេត្តកណ្ដាលតាមចាប់មនុស្ស២នាក់យកទៅញាត់គុក ពាក់ព័ន្ធករណីឆបោកនិងក្លែងបន្លំឯកសារសាធារណៈ

(កណ្ដាល)៖ ក្រុមមន្ត្រីជំនាញកងរាជអាវុធហត្ថខេត្តកណ្តាលបានតាមចាប់និងឃាត់ខ្លួនជនសង្ស័យចំនួន២នាក់តាមដីកាបង្គាប់ឲ្យចាប់ខ្លួនពីបទឆបោក និងក្លែងបន្លំឯកសារសាធារណៈយកទៅដាក់ពន្ធនាគារខេត្តកណ្ដាលហើយ។ នេះបើតាមប្រភពដែលបណ្ដាញសារព័ត៌មាន The Mirror News ទទួលបាននៅថ្ងៃទី២៥ ខែមេសា ឆ្នាំ២០២៥នេះ។

ប្រភពបានឲ្យសឹងថា ដោយយោងតាមការដឹកនាំចង្អុលបង្ហាញផ្ទាល់ពីលោកឧត្តមសេនីយ៍ត្រី សំ តុលា មេបញ្ជាការខេត្តកណ្ដាល និងមានការសម្របសម្រួលនីតិវិធីពីលោកព្រះរាជអាជ្ញាអមសាលាដំបូងខេត្តកណ្តាល និងព្រះរាជអាជ្ញាអមសាលាដំបូងរាជធានីភ្នំពេញ កាលពីថ្ងៃទី២០ ខែមេសា ឆ្នាំ២០២៥កន្លងទៅថ្មីៗនេះ កម្លាំងជំនាញកងរាជអាវុធហត្ថខេត្តកណ្តាលដឹកនាំដោយលោក ប្រធានមន្ទីរស្រាវជ្រាវនិងបង្ក្រាបបទល្មើសបានសហការជាមួយកម្លាំងកងរាជអាវុធហត្ថខណ្ឌច្បារអំពៅចុះអនុវត្តដីកាបង្គាប់ឲ្យចាប់ខ្លួន ចេញដោយលោកចៅក្រមស៊ើបសួរនៃសាលាដំបូងខេត្តកណ្ដាលឃាត់ខ្លួនជនសង្ស័យចំនួន២នាក់ ពីបទ«ឆបោកនិងក្លែងបន្លំឯកសារសាធារណៈ» ស្ថិតក្នុងខណ្ឌច្បារអំពៅ រាជធានីភ្នំពេញ។

គួរជម្រាបថា ជនសង្ស័យត្រូវបានសមត្ថកិច្ចកងរាជអាវុធហត្ថខេត្តកណ្តាលបញ្ជូនទៅឃុំខ្លួននៅពន្ធនាគារខេត្តកណ្តាលតាមនីតិវិធីហើយ៕