ល្បែងស៊ីសងឆ្នោតយួននៅឃុំអម្ពិល ស្រុកកំពង់សៀម ខេត្តកំពង់ចាមនឹងអាចជះឥទ្ធិពលអាក្រក់ដល់ប្រជាជននៅតាមមូលដ្ឋាននិងសង្គមជាតិ បើមេប៉ូលិសស្រុក មេប៉ូលិសខេត្តមិនទប់ស្កាត់ឬបង្ក្រាបឲ្យអស់ទេ

(កំពង់ចាម)៖ ក្នុងពេលថ្មីៗនេះ យើងអាចសង្កេតឃើញបានថា ល្បែងស៊ីសងឆ្នោតយួន(កន្ទុយលេខ)បានក្លាយជាសកម្មភាពពេញនិយមនៅឃុំអម្ពិល ស្រុកកំពង់សៀម ខេត្តកំពង់ចាម។ ល្បែងនេះគឺជាប្រភេទល្បែងស៊ីសងខុសច្បាប់ ដោយពឹងផ្អែកលើសំណាង ដែលភាគច្រើនប្រជាពលរដ្ឋសង្ឃឹមថា នឹងអាចរកប្រាក់ចំណូលយ៉ាងឆាប់រហ័ស។ ទន្ទឹមនឹងនោះ វាក៏មានផលប៉ះពាល់យ៉ាងធ្ងន់ធ្ងរដល់ជីវភាពសង្គម និងសេដ្ឋកិច្ចផងដែរ។

តាមសេចក្ដីរាយការណ៍ថា អ្នកលេងឆ្នោតយួនសព្វថ្ងៃគឺឆ្លារណាស់ គេអាចនាំគ្នាលេងដោយចាក់ឆ្នោតតាមប្រព័ន្ធទូរសព្ទ ប្រព័ន្ធអេឡិកត្រូនិក និងតាមបណ្ដាញសង្គមផ្សេងៗ ជាហេតុដែលធ្វើឲ្យអាជ្ញាធរយកលេសបានថា ពិបាកបង្ក្រាបណាស់ ស្មុគស្មាញណាស់។ សេចក្តីរាយការណ៍បន្តថា នៅខេត្តកំពង់ចាម មានមេឆ្នោតល្បីល្បាញ១រូបឈ្មោះ អ៊ី ណារិន បាននឹងកំពុងបោះទីតាំងនៅភូមិជង្ហុក ឃុំអម្ពិល ស្រុកកំពង់សៀម ខេត្តកំពង់ចាមមួយទីតាំងទៀតទន្ទឹមមានទីតាំងមួយចំនួនដែលអាជ្ញាធរមានសមត្ថកិច្ចមិនទាន់បានបង្ក្រាបនៅឡើយ។ ហើយក្នុងមួយថ្ងៃៗមេឆ្នោតខាងលើនេះប្រមូលបានលុយយ៉ាងសន្ធឹកសន្ធាប់ ដោយសារតែមេឆ្នោតរូបនេះមានបណ្ដាញទំនាក់ទំនងកូនកញ្ច្រែងច្រើនក្នុងការប្រមូលអតិថិជន។ កូនកញ្ជ្រែងសព្វថ្ងៃមិនលំបាកនោះទេ គឺគ្រាន់តែចាំទទួលទូរសព្ទ ដែលអ្នកចាក់ផ្ញើលេខនិងចំនួនទឹកប្រាក់តាមប្រព័ន្ធបណ្ដាញសង្គមតេឡេក្រាម និងការទូតទាត់សាច់ប្រាក់តាមប្រព័ន្ធធនាគារ។ សេចក្ដីរាយការណ៍បានបន្ថែមថា ពាក់ព័ន្ធករណីខាងលើនេះ សមត្ថកិច្ចបានដឹងទីតាំងល្បែងឆ្នោតកន្ទុយលេខរបស់មេឈ្មោះ ណា រិន នេះច្បាស់លាស់ណាស់ តែនគរបាលស្រុកកំពង់សៀមមិនចាត់វិធានការមេកន្ទុយលេខដ៏ធំនេះនៅឡើយ។ ដោយមេឆ្នោត ណារិន នៅតែមានលទ្ធភាពក្នុងការប្រមូលប្រាក់យ៉ាងច្រើនសន្ធឹកសន្ធាប់ក្នុងមួយថ្ងៃៗពីតាមកូនកញ្ច្រែងនានា ក្នុងមូលដ្ឋានខេត្តកំពង់ចាមតែម្ដង។

ប្រភពបានឲ្យដឹងដែរថា មូលហេតុដែលធ្វើឲ្យល្បែងឆ្នោតនេះកាន់តែមានអំណាចលើប្រជាជនគឺដោយសារតែភាពងាយស្រួលក្នុងការលេង ការផ្សព្វផ្សាយតាមទូរស័ព្ទ និងការបង្កើនសេចក្តីសង្ឃឹមចំពោះការរកប្រាក់។ ប៉ុន្តែចំពោះជីវិតពិតប្រាកដ វាធ្វើឲ្យមនុស្សជាច្រើនបាត់បង់ទ្រព្យសម្បត្តិ ធ្វើឲ្យមានបំណុល និងបង្កផលប៉ះពាល់ដល់គ្រួសារ។ មនុស្សដែលខ្ចីលុយគេទៅលេង ឬលក់ទ្រព្យសម្បត្តិដើម្បីទៅលេងល្បែងស៊ីសង ដែលជាហេតុអាចនាំឲ្យមានជម្លោះក្នុងគ្រួសារ បណ្តាលឲ្យមានអំពើហិង្សា និងអាចកើតមានអំពើឧក្រិដ្ឋកម្មទៀតផង។ ម្យ៉ាងទៀត សង្គមទាំងមូលក៏ទទួលរងផលប៉ះពាល់ផងដែរ។ ការលេងឆ្នោតយួនបានបង្កឲ្យមានផលបះពាល់ដល់សេដ្ឋកិច្ច ដោយសារមនុស្សមួយចំនួនត្រូវបានបោះបង់ការងារព្រោះតែជឿលើសំណាងជំនួសការខិតខំធ្វើការ។ នេះអាចបង្កឲ្យធ្លាក់ចុះនូវផលិតភាព និងការអភិវឌ្ឍសេដ្ឋកិច្ចជាតិ។ កាន់តែអាក្រក់ទៅទៀត ប្រសិនបើសកម្មភាពនេះមិនត្រូវបានគ្រប់គ្រង ឬផ្អាក ឬបង្ក្រាបឲ្យទាន់ពេលទេវានឹងអាចនាំឲ្យមានជំនឿខុសលើការរកស៊ីស្របច្បាប់ និងបង្កការខាតបង់ទុនវិនិយោគក្នុងស្រុកទៀតផង។

សាធារណជនស្នើសុំឲ្យអាជ្ញាធរមូលដ្ឋានខេត្តកំពង់ចាមគួរតែត្រូវអនុវត្តវិធានការឲ្យមានប្រសិទ្ធភាព ដើម្បីបង្រ្កាប និងគ្រប់គ្រងល្បែងស៊ីសងខុសច្បាប់ឲ្យអស់ពីមូលដ្ឋានរបស់ខ្លួន៕