មេប៉ូលិសខេត្តកណ្ដាលនៅតែដាក់បទបញ្ជាឲ្យស្រាវជ្រាវចាប់ក្រុមក្មេងទំនើងបង្ហោះម៉ូតូនៅលើផ្លូវក្រវ៉ាត់ក្រុងទី៣ ដែលនៅសល់ប៉ុន្មាននាក់ទៀត បើពួកគេមិនព្រមចូលខ្លួនទៅបំភ្លឺនៅអធិការដ្ឋាននគរបាលស្រុកស្អាង

(កណ្ដាល)៖ នៅទីបំផុត, បន្ទាប់ពីលោកឧត្ដមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្ដាលកាលពីថ្ងៃទី២១ ខែមេសា ឆ្នាំ២០២៥ បានបង្ហោះសារណែនាំឲ្យក្រុមអ្នកបង្ហោះម៉ូតូនៅលើផ្លូវមហាវិថីស៊ីជិនពីង ជាផ្លូវក្រវ៉ាត់ក្រុងទី៣ មានស្លាកលេខម៉ូតូកណ្តាល 1AB-8446 ត្រូវចូលខ្លួនទៅអធិការដ្ឋាននគរបាលស្រុកស្អាងយ៉ាងយូរ២៤ម៉ោងលើ២៤ម៉ោង ហើយបើអ្នកក្លាហានជាសិស្សវិទ្យាល័យហ៊ុន សែន ស្អាង ដែលបានបង្ហោះម៉ូតូនៅលើផ្លូវមហាវិថីស៊ីជិនពីងមិនចូលខ្លួនទេ សមត្ថកិច្ចនឹងចាត់វិធានការតាមផ្លូវច្បាប់ហើយ។

កម្លាំងជំនាញនៅថ្ងៃទី២១ ខែមេសា ឆ្នាំ២០២៥បានស្រាវជ្រាវរហូតចាប់ឃាត់ខ្លួនបានក្រុមក្មេងទំនើងចំនួន២នាក់៖ ទី១. ឈ្មោះ សែម-ខេមរិន្ទ និងទី២. ឈ្មោះ សុភាព រក្សា ពាក់ព័ន្ធបទល្មើស ក្មេងទំនើងបង្ហោះម៉ូតូនៅលើផ្លូវមហាវិថីស៊ីជិនពីង ជាផ្លូវក្រវ៉ាត់ក្រុងទី៣។

ជុំវិញករណីក្មេងទំនើងបង្ហោះម៉ូតូខាងលើនេះ នៅព្រឹកថ្ងៃទី២២ ខែមេសា ឆ្នាំ២០២៥នេះ លោកឧត្ដមសេនីយ៍ទោស្នងការបានឲ្យដឹងថា នៅតែដាក់បទបញ្ជាឲ្យកម្លាំងជំនាញបន្តស្រាវជ្រាវចាប់ក្រុមក្មេងទំនើងបង្ហោះម៉ូតូនៅលើផ្លូវក្រវ៉ាត់ក្រុងទី៣ ដែលនៅសល់ប៉ុន្មាននាក់ទៀត បើពួកគេមិនព្រមចូលខ្លួនទៅបំភ្លឺនៅអធិការដ្ឋាននគរបាលស្រុកស្អាង។

ជាក់ស្ដែងនៅលើទំព័រហ្វេសប៊ុកលោកឧត្ដមសេនីយ៍ទោ ឈឿន សុចិត្ត បានលើកឡើងថា ក្រុមក្មួយៗយកវីដេអូរចាស់មកកាត់តបញ្ចូលសម្លេងបំពុលសង្គម ក្មួយៗនៅសល់ប៉ុន្មាននាក់ទៀត ឆាប់ចូលខ្លួនមកអធិការដ្ឋាននគរបាលស្រុកស្អាង ដើម្បីធ្វើការបំភ្លឺឆ្លើយតបជាមួយសាធារណជនកុំឲ្យមានការភាន់ច្រឡំ។

ជាមួយលោកស្នងការបានថ្លែងអំណរគុណនិងកោតសរសើរដល់កងកម្លាំងនគរបាលនៃអធិការដ្ឋានស្រុកស្អាង និងកម្លាំងនគរបាលជំនាញនៃស្នងការដ្ឋាននគរបាលខេត្តកណ្ដាលផងដែរ៕