ស្ត្រីក្រីក្រម្នាក់សុំឲ្យអភិបាលខេត្តកណ្ដាលជួយរកយុត្តិធម៌ពាក់ព័ន្ធករណីកូនចៅលោក ជៀម ខូយ ចៅសង្កាត់តាខ្មៅបានបំផ្លិចបំផ្លាញទ្រព្យសម្បត្តិ ជេរប្រមាថជាសាធារណៈ គំរាមកំហែង និងប្រើអំពើហិង្សាលើគាត់

(កណ្ដាល)៖ ស្ត្រីម្នាក់ត្រូវបានគេស្គាល់ថា ឈ្មោះ សោម សុភា បានអះអាងថា ជាប្រជាជនក្រីក្រម្នាក់ នៅក្នុងសង្កាត់តាខ្មៅ ក្រុងតាខ្មៅ ខេត្តកណ្តាលបានស្នើសុំឲ្យលោក គួច ចំរើន អភិបាលខេត្តកណ្តាលជួយរកយុត្តិធម៌ពាក់ព័ន្ធករណីកូនចៅរបស់លោក ជៀម ខូយ ចៅសង្កាត់តាខ្មៅបានបំផ្លិចបំផ្លាញទ្រព្យសម្បត្តិ ជេរប្រមាថជាសាធារណៈ គំរាមកំហែង និងបានប្រើអំពើហិង្សាលើរូបគាត់កាលពីវេលាម៉ោង៣៖៣៥នាទីរសៀល ថ្ងៃទី១៨ ខែមេសា ឆ្នាំ២០២៥ នៅចំណុចក្រោយសួនកុមារ ក្រុងតាខ្មៅ។ នេះបើតាមប្រភពដែលអង្គភាព The Mirror News ទទួលបាននៅថ្ងៃទី២០ ខែមេសា ឆ្នាំ២០២៥នេះ។

បើតាមប្រភពបន្តថា ខណៈស្ត្រីរងគ្រោះឈ្មោះ សោម សុភា បានកំពុងអង្គុយលក់ដូរបន្តិចបន្តួចនៅចំណុចក្រោយសួនកុមារក្រុងតាខ្មៅ ក៏មានជនស្លៀកពាក់សុីវិលចំនួន៣នាក់ ជាកូនចៅរបស់លោក ជៀម ខូយ ចៅសង្កាត់តាខ្មៅបានប្រព្រឹត្តបទល្មើសមកលើរូបគាត់ ដោយបានបំផ្លិចបំផ្លាញទ្រព្យសម្បត្តិរបស់គាត់ ជេរប្រមាថគាត់ជាសាធារណៈគំរាមកំហែង និងបានប្រើអំពើហិង្សាលើរូបគាត់ទៀតផង។

បើតាមសំណេររបស់ស្ត្រីរងគ្រោះបានបញ្ជាក់ថា នៅចន្លោះម៉ោង៣៖៣៥នាទីរសៀលថ្ងៃទី១៩ ខែមេសា ឆ្នាំ២០២៥ គាត់បានទៅប្តឹងឲ្យចៅសង្កាត់តាខ្មៅជួយ តែអ្វីដែលគាត់ហួសចិត្តគឺទទួលបានពាក្យសម្ដីដែលមិនមានក្រមសីលធម៌ នឹងមិនចេះច្បាប់ទាល់តែសោះ។លោកស្រី សោម សុភា បានបន្តថា គាត់បានសុំឲ្យចៅសង្កាត់តាខ្មៅហៅជនបង្កហេតុដែលជាកូនចៅរបស់គាត់មកសួរនាំ ទល់មុខ រកខុសត្រូវ តែចៅសង្កាត់បែរជាប្រើពាក្យសម្តី អសីលធម៌ នឹងមិនចេះច្បាប់មកលើរូបគាត់។

១. ប៉ុស្តិ៍រដ្ឋបាលនគរបាលថា គ្រាន់តែគេជេរបញ្ចោរប៉ុណ្ណឹងប្តឹងគេដែរ ២. រដ្ឋបាលប៉ុស្តិ៍ថា គ្រាន់តែគេយកអុីវ៉ាន់យើងបោះចោលបន្តិចបន្ទួចប៉ុណ្ណោះ ប្តឹងគេដែរ។ ៣. ស្ត្រីម្នាក់ធ្វើការនៅសាលាសង្កាត់ថា គ្រាន់តែគេគំរាមចង់វ៉ៃនឹងប្តឹងគេដែរ។ ៤. ចៅសង្កាត់តាខ្មៅមិនបានបំពេញតួនាទីដូចថតបង្ហោះនោះទេ ប្រើពាក្យសំដីមិនសមរម្យជាមនុស្សចាស់ ហើយមិនស្តាប់ហេតុផល។ មិនព្រមដោះស្រាយពិសេសដេញគាត់ឲ្យចេញទៀត។ យោងតាមពាក្យសម្តីអសីលធម៌ នឹងមិនចេះច្បាប់ទាំងអស់ ខាងលើកនេះ ស្ត្រីរងគ្រោះសុំអង្វរដល់លោក គួច ចំរើន អភិបាលខេត្ត កណ្តាល មេត្តាជួយណែនាំចៅសង្កាត់តាខ្មៅផង។ ក្នុងនាមជា អ្នកបំរើប្រជាជន តើចៅសង្កាត់ត្រូវមានក្រមសីលធម៌យ៉ាងម៉េច ខ្លះ ដើម្បីកុំឲ្យប៉ះពាល់ដល់ថ្នាក់លើ។ ខ្លួនជាមន្រ្តីថ្នាក់ក្រោមត្រូវបំរើ ប្រជាជនឲ្យបានល្អ មិនមែនប្រើពាក្យសម្តីដូចអ្នកមិនបានចូល សាលារៀននោះទេ។ នេះជាការលើកឡើងរបស់លោកស្រី សោម សុភា។

លោកស្រី សោម សុភា សង្ឃឹមថា លោកអភិបាលខេត្តកណ្ដាលនឹងជួយរកយុត្តិធម៌ជូនប្រជាជនស្លូតត្រង់ដោយមិនលំអៀង៕