មិនមែនជាលើកទី១ទេ សម្រាប់ស្រុកស្អាង, ករណីទូកដរមិនប្រយ័ត្នបណ្តាលឱ្យរថយន្តធ្លាក់ចូលទឹកទន្លេបាសាក់នេះ

(កណ្តាល)៖ វាមិនមែនជាលើកទី១ទេ សម្រាប់ករណីទូកដរនៅស្រុកស្អាងក្រោមការដឹកនាំរបស់លោក ជឺ គឹមហៃ អភិបាលស្រុក ដែលបណ្ដាលឲ្យរថយន្តអ្នកធ្វើដំណើរធ្លាក់ចូលទន្លេបាសាក់ព្រោះតែខ្វះការប្រុងប្រយ័ត្ន។

ជាក់ស្ដែងនៅពេលថ្មីៗនេះ មានហេតុការណ៍គ្រោះថ្នាក់ទូកចម្លងមិនមានសម្ភារៈគ្រប់គ្រាន់បានបណ្ដាលឲ្យរថយន្ត Toyota ព្រុសមួយគ្រឿងរអិលធ្លាក់ចូលក្នុងទន្លេកាលពីវេលាម៉ោង១០៖៤០នាទីព្រឹកថ្ងៃទី១៧ ខែមេសា ឆ្នាំ២០២៥ នៅចំណុចកំពង់ចម្លងស្វាយតានី ត្រើយខាងកើត ស្ថិតក្នុងភូមិពោធិកណ្តាល ឃុំត្រើយស្លា ស្រុកស្អាង ខេត្តកណ្តាល។

ហេតុការណ៍នេះ មានមនុស្សប្រុសស្រី០៣នាក់រួមមាន៖១.ឈ្មោះ ឈឿន វាសនា ភេទប្រុស អាយុ៣១ឆ្នាំជនជាតិខ្មែរ ត្រូវជាប្តី មុខរបរជាងម៉ាស៊ីនត្រជាក់ អ្នកបេីកបររថយន្ត។ ២.ឈ្មោះ ឯក កេង ភេទស្រី អាយុ៣២ឆ្នាំ ជនជាតិខ្មែរ ត្រូវជាប្រពន្ធ មុខរបរមេផ្ទះ។៣.ឈ្មោះ ម៉ុង ចំរេីន ភេទប្រុស អាយុ ២០ឆ្នាំ ជនជាតិខ្មែរ មុខរបរជាជាងម៉ាស៊ីនត្រជាក់។ អ្នកទាំង៣ នៅភូមិព្រៃផ្តៅ ឃុំព្រៃផ្តៅ ស្រុកព្រៃកប្បាស ខេត្តតាកែវ ។

អ្នកទាំង៣បានធ្វើដំណើរមកលេងឪពុកម្តាយ នៅភូមិព្រែកសៅ ឃុំស្វាយប្រទាល ស្រុកស្អាង ខេត្តកណ្តាល ហើយសំណាងល្អដែលមិនមានគ្រោះថ្នាក់ដល់អាយុជីវិត៕