ប៉ូលិសស្រុកបាណន់ចាប់ចោរលួចគោបានម្នាក់ ខណៈកំពុងតាមក្របួចម្នាក់ទៀតយកមកផ្ដន្ទាទោស!

(បាត់ដំបង)៖ កាលពីថ្ងៃទី០៧ ខែមេសា ឆ្នាំ២០២៥ នៅចន្លោះវេលាម៉ោងប្រហែល១៧៖០០នាទី ដល់ម៉ោង០៧៖០០នាទី នៅចំណុចអូរអន្លក់ ស្ថិតក្នុងភូមិបឹងប្រី ឃុំស្នឹង ស្រុកបាណន់ ខេត្តបាត់ដំបង មានករណីជនសង្ស័យមិនស្គាល់អត្តសញ្ញាណបានធ្វើសកម្មភាពលួចដឹកសត្វគោមេចំនួន០២ក្បាល ជារបស់ជនរងគ្រោះឈ្មោះ សុខ សាវាត នៅភូមិបឹងប្រី ឃុំស្នឹង ស្រុកបាណន់ ខេត្តបាត់ដំបងយកទៅបាត់។

ក្រោយពីទទួលបណ្តឹងពីជនរងគ្រោះកម្លាំងនៃអធិការដ្ឋាននគរបាលស្រុកបាណន់ រួមជាមួយកម្លាំងប៉ុស្តិ៍នគរបាលរដ្ឋបាលស្នឹង នៃអធិការដ្ឋាននគរបាលស្រុកបាណន់ បានសហការជាមួយកម្លាំងអធិការដ្ឋាននគរបាលស្រុករតនមណ្ឌល ដឹកនាំដោយលោកវរសេនីយ៍ទោ ហេង បារាំង អធិការនគរបាលស្រុកបាណន់ បានចុះធ្វើការស៊ើបអង្កេតស្រាវជ្រាវ រហូតដល់ថ្ងៃទី០៩ ខែមេសា ឆ្នាំ២០២៥ វេលាម៉ោង០៧៖៣០នាទីព្រឹក ឈានដល់ការនាំខ្លួនជនសង្ស័យម្នាក់ ឈ្មោះ អែម លួន ហៅប៉ុក ភេទប្រុស អាយុ៤៣ឆ្នាំ មានទីលំនៅភូមិបឹងអំពិល ឃុំស្នឹង ស្រុករតនមណ្ឌល ខេត្តបាត់ដំបង មុខរបរកាប់សាច់គោលក់ យកមកសាកសួរនៅអធិការដ្ឋាននគរបាលស្រុកបាណន់។

ក្រោយពីបានសាកសួរជនសង្ស័យខាងលើ បានឆ្លើយសារភាពថា មុនពេលកើតហេតុវេលាម៉ោងប្រហែល១៧៖០០នាទី មានឈ្មោះ ឡី ភេទប្រុស (មិនស្គាល់ត្រកូល និងអាសយដ្ឋាន) បានមកនិយាយជាមួយខ្លួនថា ចង់បានគោឬអត់ ហើយខ្លួនប្រាប់ថា ចង់បាន ពេលនោះឈ្មោះ ឡី ក៏បានប្រាប់ខ្លួនឲ្យទៅចាំនៅចំណុចទំនប់បាក់ភូមិបឹងអំពិល ឃុំស្ដៅ ស្រុករតនមណ្ឌល ខេត្តបាត់ដំបង លុះនៅវេលាម៉ោងប្រហែល ២០៖៣០នាទី ឈ្មោះ ឡី ក៏បានដឹកគោមកចំនួន០២ក្បាល ហើយខ្លួនក៏បានដើរដេញពីក្រោយរហូតដល់ផ្ទះម៉ោងប្រហែល ១២រំលងអាធ្រាត ទើបធ្វើការកាប់ និងពន្លះយកសាច់លក់តែម្ដង។

ករណីនេះ សមត្ថកិច្ចកំពុងស្រាវជ្រាវរកជនសង្ស័យម្នាក់ទៀតដែលកំពុងគេចខ្លួន រីឯជនសង្ស័យខាងលើ ត្រូវបានកម្លាំងនគរបាលស្រុកបាណន់កសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី៕