ឯកឧត្តម ហាក់ សុខមករា ដឹកនាំប្រតិភូចុះសួរសុខទុក្ខ និងចូលរួមរំលែកទុក្ខគ្រួសារកុមារ ២នាក់ ដែលលង់ទឹកស្លាប់

(កណ្ដាល)៖ នារសៀលថ្ងៃទី១៨ ខែសីហា ឆ្នាំ២០២៦ ឯកឧត្តម ហាក់ សុខមករា អភិបាលរងខេត្តកណ្ដាល និងជាអនុប្រធានអចិន្ត្រៃយ៍គណៈកម្មាធិការកាកបាទក្រហមកម្ពុជាសាខាខេត្តកណ្ដាល បានដឹកនាំប្រតិភូសាខាកាកបាទក្រហមខេត្ត អនុសាខាស្រុកកៀនស្វាយ និងក្រុមកាកបាទក្រហមឃុំភូមិធំ ចុះសួរសុខទុក្ខ និងចូលរួមរំលែកទុក្ខជាមួយក្រុមគ្រួសារកុមារ២នាក់ ដែលបានលង់ទឹកស្លាប់កាលពីថ្ងៃទី១៥ ខែសីហា ឆ្នាំ២០២៦។

កុមាររងគ្រោះទាំង២នាក់ រួមមាន៖
*សពទី១៖ ឈ្មោះ ឡុង សត្យា ភេទប្រុស អាយុ១៤ឆ្នាំ មានទីលំនៅភូមិភូមិធំ ឃុំភូមិធំ ស្រុកកៀនស្វាយ ខេត្តកណ្ដាល។ ឪពុកឈ្មោះ ជុំ សុផាត និងម្តាយឈ្មោះ មុត ធីតា។

*សពទី២៖ ឈ្មោះ ហួន ភិនុត ភេទប្រុស អាយុ១៤ឆ្នាំ មានទីលំនៅភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្ដាល។ ឪពុកឈ្មោះ ហួន សម្បត្តិ ខណៈម្តាយបានលែងលះគ្នា។

ក្នុងឱកាសនោះ សាខាកាកបាទក្រហមកម្ពុជាខេត្តកណ្ដាល ក៏បាននាំយកអំណោយជាសម្ភារៈប្រើប្រាស់ប្រចាំថ្ងៃ និងថវិកា ដើម្បីចូលរួមសម្រាលការលំបាករបស់គ្រួសារសពទាំង២ រួមមាន៖ អង្ករ១០០គីឡូក្រាម, មី៤កេស, ត្រីខ៤យួរ, ទឹកត្រី៤យួរ, ទឹកស៊ីអ៊ីវ៤យួរ, ទឹកសុទ្ធ១០កេស និងថវិកាចំនួន១,០០០,០០០រៀល។

សកម្មភាពនេះបង្ហាញពីការយកចិត្តទុកដាក់ និងស្មារតីមនុស្សធម៌របស់សាខាកាកបាទក្រហមកម្ពុជាខេត្តកណ្ដាល ក្នុងការចុះជួយសម្រាលទុក្ខលំបាករបស់ប្រជាពលរដ្ឋដែលជួបប្រទះគ្រោះអកុសល និងកំពុងរងទុក្ខលំបាក។

ជាមួយគ្នានេះ ឯកឧត្តម ហាក់ សុខមករា ក៏សូមចូលរួមរំលែកទុក្ខយ៉ាងក្រៀមក្រំជូនចំពោះក្រុមគ្រួសារនៃកុមាររងគ្រោះទាំង២ និងសូមឱ្យក្រុមគ្រួសារមានកម្លាំងចិត្តដើម្បីឆ្លងកាត់ទុក្ខសោកដ៏ធ្ងន់ធ្ងរនេះ៕