អភិបាលស្រុកខ្សាច់កណ្ដាលព្រមានឲ្យបញ្ឈប់បោះសំរាមតាមផ្លូវជាតិលេខ៨ ប្រយ័ត្ន គេទៅហៅដល់ផ្ទះ ឬបានល្បីតាមហ្វេសប៊ុក កាម៉េរ៉ាតាមដានរួចហើយ!

(កណ្ដាល)៖ លោក ចេង ឌីណា អភិបាលស្រុកខ្សាច់កណ្ដាល នៅថ្ងៃទី១៥ ខែសីហា ឆ្នាំ២០២៦ បានបង្ហោះសារព្រមានយ៉ាងម៉ឺងម៉ាត់ដល់ប្រជាពលរដ្ឋ និងអ្នកធ្វើដំណើរទាំងអស់ ឱ្យបញ្ឈប់ការបោះចោលសំរាមពាសវាលពាសកាល តាមបណ្តោយផ្លូវជាតិលេខ៨ និងតាមទីសាធារណៈនានា ក្នុងភូមិសាស្ត្រស្រុកខ្សាច់កណ្ដាល។

លោកអភិបាលស្រុកបានបញ្ជាក់ថា «សូមប្រយ័ត្ន គេទៅហៅដល់ផ្ទះ ឬបានល្បីតាមហ្វេសប៊ុក» ខណៈកាម៉េរ៉ាសុវត្ថិភាពសម្រាប់តាមដាន និងកំណត់អត្តសញ្ញាណអ្នកបំពាន ត្រូវបានបំពាក់រួចហើយ ហើយនឹងបន្តដាក់បន្ថែមទៀត នៅតាមទីតាំងសំខាន់ៗ។

ការព្រមាននេះ គឺជាសារដាស់តឿនជាមុន ដើម្បីឱ្យប្រជាពលរដ្ឋចូលរួមរក្សាអនាម័យ បរិស្ថាន និងសោភ័ណភាពសាធារណៈ ជាពិសេសតាមដងផ្លូវជាតិលេខ៨ ដែលជាផ្លូវសំខាន់មួយក្នុងមូលដ្ឋាន។

លោកអភិបាលស្រុកបានស្នើឱ្យប្រជាពលរដ្ឋ កុំបោះសំរាមតាមដងផ្លូវ ទីសាធារណៈ ឬទីកន្លែងដែលមិនមែនជាកន្លែងប្រមូលសំរាម ហើយត្រូវចូលរួមទុកដាក់សំរាមឱ្យបានត្រឹមត្រូវ ដើម្បីរក្សាស្រុកខ្សាច់កណ្ដាលឱ្យមានអនាម័យ ស្អាត និងមានសណ្តាប់ធ្នាប់។

សារព្រមាននេះ ក៏ជាការបញ្ជាក់ថា យុគសម័យ “បោះចោលហើយគ្មានអ្នកឃើញ” កំពុងត្រូវបញ្ចប់ ព្រោះប្រព័ន្ធកាម៉េរ៉ាត្រូវបានប្រើប្រាស់ជាមធ្យោបាយតាមដាន និងជំរុញការគោរពសណ្តាប់ធ្នាប់សាធារណៈ។

លោក ចេង ឌីណា បានបញ្ចប់សារដោយថ្លែងថា «សូមជូនដំណឹងជាមុន សូមអរគុណ»៕