បាត់ខ្លួនក្មេងប្រុស៣នាក់ ករណីលិចទូកងក្នុងទន្លេមេគង្គ ខណៈលោកស្នងការ ឈឿន សុចិត្ត ដឹកនាំកម្លាំងចុះពិនិត្យផ្ទាល់!

(កណ្ដាល)៖ ហេតុការណ៍ដ៏សោកសៅមួយបានកើតឡើងនៅល្ងាចថ្ងៃទី១៥ ខែសីហា ឆ្នាំ២០២៦ បន្ទាប់ពីទូក-ងខ្នាតអន្តរជាតិមួយគ្រឿង ដែលទើបស្ថាបនារួចថ្មីៗ និងមិនទាន់មានឈ្មោះផងនោះ បានលិចក្នុងទន្លេមេគង្គ បណ្ដាលឱ្យក្មេងប្រុសចំនួន៣នាក់បាត់ខ្លួន ខណៈមនុស្ស៧នាក់ផ្សេងទៀតបានហែលទឹករួច និងឡើងគោកដោយសុវត្ថិភាព។

ករណីនេះបានកើតឡើងនៅចំណុចក្នុងទន្លេមេគង្គ ស្ថិតក្នុងភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្ដាល ខណៈក្រុមក្មេងៗចំនួន១០នាក់ បាននាំគ្នាយកទូក-ងដែលទើបធ្វើរួចមកដាក់ក្នុងទន្លេ ដើម្បីអុំសាកល្បង និងលេងកម្សាន្ត។

បើតាមលោកវីរសេនីយ៍ឯក ព្រុំ សំណាង អធិការនគរបាលស្រុកកៀនស្វាយ បានឱ្យដឹងថា ពេលអុំទូកបានចម្ងាយប្រមាណ៣០ម៉ែត្រពីច្រាំង និងប្រមាណ៣០០ម៉ែត្រពីកំពង់ដរកោះប្រាក់ ស្រាប់តែមានទឹកផុល និងរលកធំៗ បណ្ដាលឱ្យអ្នកអុំទូកមានការភ័យស្លន់ស្លោ រហូតទូកបានក្រឡាប់ និងលិចចូលក្នុងទន្លេ។

ក្នុងហេតុការណ៍នោះ អ្នកអុំទូក៨នាក់បានលោតចេញពីទូកជាមុន ខណៈ២នាក់ទៀតនៅលើទូក រហូតទូកលិចទើបលោតចេញតាមក្រោយ។ បន្ទាប់មក អ្នកអុំទូកចំនួន៧នាក់បានហែលទឹករួច និងឡើងដល់គោកដោយសុវត្ថិភាព ខណៈ៣នាក់ទៀតបានបាត់ខ្លួនក្នុងទឹកទន្លេមេគង្គ។

ក្រោយទទួលបានព័ត៌មានភ្លាមៗ កម្លាំងគណៈបញ្ជាការឯកភាពរដ្ឋបាលខេត្តកណ្ដាល កម្លាំងនគរបាល អាវុធហត្ថ និងកម្លាំងអន្តរាគមន៍៩១១ បានចុះប្រតិបត្តិការស្វែងរក និងជួយសង្គ្រោះជាបន្ទាន់ ដោយប្រើប្រាស់កម្លាំង និងមធ្យោបាយសរុប ដើម្បីស្វែងរកអ្នកបាត់ខ្លួនទាំង៣នាក់។

ជាមួយគ្នានេះ លោកអភិបាលខេត្តកណ្ដាល លោកស្នងការខេត្ត លោកអភិបាលស្រុក អធិការនគរបាលស្រុក មេបញ្ជាការកងរាជអាវុធហត្ថស្រុក មេឃុំ មេភូមិ និងមន្ត្រីពាក់ព័ន្ធជាច្រើនរូប បានចុះពិនិត្យ និងដឹកនាំការងារស្វែងរកដោយផ្ទាល់នៅទីតាំងកើតហេតុ។

ប្រតិបត្តិការស្វែងរកអ្នកបាត់ខ្លួនទាំង៣នាក់ កំពុងបន្តយ៉ាងសកម្ម ដោយអាជ្ញាធរ និងកម្លាំងសមត្ថកិច្ចពាក់ព័ន្ធ ប្តេជ្ញាស្វែងរកឱ្យបានឆាប់បំផុត៕