មន្ទីរសាធារណការ និងដឹកជញ្ជូនខេត្តកណ្ដាល និងខេត្តព្រះសីហនុ ផ្ញើលិខិតចូលរួមរំលែកមរណទុក្ខ ជូនលោក ប៉ែត សារ៉ាត់

(កណ្ដាល)៖ ក្នុងបរិយាកាសប្រកបដោយសេចក្តីក្រៀមក្រំ និងអាឡោះអាល័យជាទីបំផុត មន្ទីរសាធារណការ និងដឹកជញ្ជូនខេត្តកណ្ដាល ព្រមទាំងមន្ទីរសាធារណការ និងដឹកជញ្ជូនខេត្តព្រះសីហនុ បានផ្ញើលិខិតចូលរួមរំលែកមរណទុក្ខ ជូនលោក ប៉ែត សារ៉ាត់ អនុប្រធានមន្ទីរសាធារណការ និងដឹកជញ្ជូនខេត្តកណ្ដាល និងលោកស្រី ព្រមទាំងក្រុមគ្រួសារ ចំពោះមរណភាពរបស់ ឧបាសក ប៉ែត ត្រៀក ដែលត្រូវជាឪពុកបង្កើត ឪពុកក្មេក និងជាជីតា។

ឧបាសក ប៉ែត ត្រៀក បានទទួលមរណភាពកាលពីថ្ងៃសុក្រ ទី១៤ ខែសីហា ឆ្នាំ២០២៦ វេលាម៉ោង ៦:៥៥នាទីព្រឹក ក្នុងជន្មាយុ ៨៩ឆ្នាំ ដោយជរាពាធ។

ក្នុងលិខិតរំលែកមរណទុក្ខ ថ្នាក់ដឹកនាំ មន្ត្រីរាជការ និងបុគ្គលិកនៃមន្ទីរសាធារណការ និងដឹកជញ្ជូនខេត្តកណ្ដាល បានសម្តែងនូវសេចក្តីសោកស្តាយ និងក្រៀមក្រំយ៉ាងក្រៃលែង ចំពោះការបាត់បង់បុព្វការីជនដ៏មានគុណធម៌ ដែលបានលះបង់កម្លាំងកាយចិត្តចិញ្ចឹមបីបាច់ថែរក្សា អប់រំទូន្មានបុត្រធីតា និងក្រុមគ្រួសារ រហូតក្លាយជាធនធានដ៏មានតម្លៃសម្រាប់សង្គមជាតិ។

ជាមួយគ្នានេះ មន្ទីរសាធារណការ និងដឹកជញ្ជូនខេត្តព្រះសីហនុ ក៏បានចូលរួមសម្តែងនូវសមានចិត្ត និងការសោកស្តាយយ៉ាងជ្រាលជ្រៅ ដោយចាត់ទុកការចូលរួមរំលែកទុក្ខនេះ ជាការផ្តល់កម្លាំងចិត្តដល់ក្រុមគ្រួសារសព ក្នុងវេលាដ៏សោកសង្រេង និងបាត់បង់ដ៏ធំធេង។

ជាការឆ្លើយតប លោក ប៉ែត សារ៉ាត់ និងភរិយា ព្រមទាំងក្រុមគ្រួសារ បានសម្តែងនូវសេចក្តីកតញ្ញូ និងអំណរគុណយ៉ាងជ្រាលជ្រៅបំផុត ចំពោះថ្នាក់ដឹកនាំ មន្ត្រីរាជការ និងបុគ្គលិកនៃមន្ទីរសាធារណការ និងដឹកជញ្ជូនខេត្តកណ្ដាល និងខេត្តព្រះសីហនុ ដែលបានផ្ញើលិខិត និងសារចូលរួមរំលែកមរណទុក្ខ ព្រមទាំងផ្តល់កម្លាំងចិត្តដល់ក្រុមគ្រួសារ ក្នុងគ្រាដ៏លំបាកនេះ។

លោក ប៉ែត សារ៉ាត់ និងក្រុមគ្រួសារ បានចាត់ទុកទឹកចិត្តដ៏ប្រពៃ និងមនោសញ្ចេតនាដ៏ថ្លៃថ្លារបស់ថ្នាក់ដឹកនាំ និងមន្ត្រីរាជការ នៃមន្ទីរទាំងពីរ ជាកិត្តិយស និងជាកម្លាំងចិត្តដ៏ធំធេង ដែលមិនអាចកាត់ថ្លៃបាន។

លោក ប៉ែត សារ៉ាត់ និងក្រុមគ្រួសារ បានប្រណិប័តន៍ជូនពរដល់ថ្នាក់ដឹកនាំ មន្ត្រីរាជការ និងបុគ្គលិកនៃមន្ទីរសាធារណការ និងដឹកជញ្ជូនខេត្តកណ្ដាល និងខេត្តព្រះសីហនុ ព្រមទាំងក្រុមគ្រួសារ សូមប្រកបដោយសិរីសួស្តី ជ័យមង្គល វិបុលសុខ និងពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ក្នុងឱកាសដ៏សែនសោកសៅនេះ សូមឧទ្ទិសបួងសួងដល់ដួងវិញ្ញាណក្ខន្ធ ឧបាសក ប៉ែត ត្រៀក សូមបានទៅកាន់សុគតិភព កុំបីឃ្លៀងឃ្លាតឡើយ៕