ក្រុមការងារតំបន់១ ផ្ញើសារលិខិតចូលរួមរំលែកទុក្ខជូនលោក ប៉ែត សារ៉ាត់ ចំពោះការបាត់បង់ឪពុកជាទីគោរពស្រឡាញ់

(កណ្ដាល)៖ ក្រុមការងារតំបន់១ ប្រចាំទីក្រុង Canberra ប្រទេសអូស្ត្រាលី បានផ្ញើសារលិខិតចូលរួមរំលែកមរណទុក្ខជូន លោក ប៉ែត សារ៉ាត់ អនុប្រធានមន្ទីរសាធារណការ និងដឹកជញ្ជូនខេត្តកណ្ដាល និងជាសមាជិកក្រុមការងារតំបន់១ ព្រមទាំងក្រុមគ្រួសារ ចំពោះមរណភាពរបស់ ឧបាសក ប៉ែត ត្រៀក ដែលត្រូវជាឪពុកបង្កើតរបស់លោក។

ឧបាសក ប៉ែត ត្រៀក បានទទួលមរណភាពនៅថ្ងៃសុក្រ ១កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៤ ខែសីហា ឆ្នាំ២០២៦ វេលាម៉ោង ៦:៥៥នាទីព្រឹក ក្នុងជន្មាយុ ៨៩ឆ្នាំ ដោយជរាពាធ។

ក្នុងសារលិខិតរំលែកទុក្ខ ក្រុមការងារតំបន់១ បានសម្តែងនូវសមានទុក្ខដ៏ក្រៀមក្រំ និងក្តីសោកស្តាយយ៉ាងជ្រាលជ្រៅ ចំពោះការបាត់បង់ឪពុកបង្កើតជាទីគោរពស្រឡាញ់ ដែលបានបូជាកម្លាំងកាយ កម្លាំងចិត្ត ក្នុងការថែរក្សា អប់រំ និងទូន្មានកូនចៅឱ្យក្លាយជាពលរដ្ឋល្អរបស់សង្គមជាតិ។

ជាមួយគ្នានេះ ក្រុមការងារតំបន់១ ក៏បានចូលរួមរំលែកទុក្ខជាមួយលោក ប៉ែត សារ៉ាត់ និងក្រុមគ្រួសារ ដោយសូមឧទ្ទិសបួងសួងដល់វិញ្ញាណក្ខន្ធ ឧបាសក ប៉ែត ត្រៀក សូមបានទៅកាន់សុខគតិភព កុំបីឃ្លៀងឃ្លាតឡើយ។

ជាការឆ្លើយតប នាព្រឹកថ្ងៃទី១៥ ខែសីហា ឆ្នាំ២០២៦ លោក ប៉ែត សារ៉ាត់ និងក្រុមគ្រួសារ បានសម្តែងនូវកត្តញ្ញូកតវេទិតាធម៌ និងអំណរគុណយ៉ាងជ្រាលជ្រៅចំពោះ ឯកឧត្តម ឈួន វិន ប្រធានក្រុមការងារតំបន់១ ព្រមទាំងថ្នាក់ដឹកនាំ សមាជិក សមាជិកា នៃក្រុមការងារតំបន់១ ដែលបានផ្ញើសារលិខិត និងចូលរួមរំលែកទុក្ខក្នុងគ្រាដ៏ក្រៀមក្រំនេះ។

ក្រុមគ្រួសារបានចាត់ទុកទឹកចិត្តដ៏ប្រពៃ និងការចូលរួមរំលែកទុក្ខរបស់ថ្នាក់ដឹកនាំ និងសមាជិក សមាជិកា នៃក្រុមការងារតំបន់១ ជាកម្លាំងចិត្តដ៏មានតម្លៃសម្រាប់ក្រុមគ្រួសារ ក្នុងការឆ្លងកាត់នូវទុក្ខសោកនៃការបាត់បង់ដ៏ធំធេងនេះ។

ក្នុងឱកាសនេះ លោក ប៉ែត សារ៉ាត់ និងក្រុមគ្រួសារ សូមបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិក្នុងលោក សូមប្រសិទ្ធពរជូន ឯកឧត្តម ឈួន វិន ព្រមទាំងថ្នាក់ដឹកនាំ សមាជិក សមាជិកា នៃក្រុមការងារតំបន់១ សូមប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕