ក្រោយពលរដ្ឋរអ៊ូរទាំ! លោក ឃឹម ស៊ុនសូដា ចៅហ្វាយខណ្ឌកំបូល បញ្ជាក់ថា តុលាការបានចុះបិទទីតាំងរួចហើយ ខណៈពលរដ្ឋស្នើឱ្យបន្តស៊ើបអង្កេត និងពិនិត្យផលប៉ះពាល់បរិស្ថាន

(ភ្នំពេញ)៖ ក្រោយពីមានការរិះគន់ និងការតវ៉ាពីប្រជាពលរដ្ឋជុំវិញក្លិនឈួលខ្លាំង ដែលគេអះអាងថាបង្កឡើងពីទីតាំងផលិតបារីមួយកន្លែង ស្ថិតនៅភូមិអំពិល សង្កាត់កំបូល ខណ្ឌកំបូល លោក ឃឹម ស៊ុនសូដា អភិបាលខណ្ឌកំបូល បានប្រាប់ The Mirror News នៅមុននេះថា តុលាការបានចុះបិទទីតាំងនោះរួចហើយ កាលពីម្សិលមិញ។

ការបញ្ជាក់នេះ ត្រូវបានចាត់ទុកជាជំហានឆ្លើយតបមួយ បន្ទាប់ពីមានការរអ៊ូរទាំជាបន្តបន្ទាប់ពីប្រជាពលរដ្ឋ ដែលបានលើកឡើងថា ក្លិនឈួលខ្លាំងពីទីតាំងខាងលើ បានប៉ះពាល់ដល់ការរស់នៅប្រចាំថ្ងៃ ដោយអ្នកខ្លះអះអាងថា មានអាការៈឈឺក្បាល ចង់ក្អួត និងពិបាកដកដង្ហើម ជាពិសេសនៅពេលមានខ្យល់បក់។

កន្លងមក ប្រជាពលរដ្ឋមួយចំនួនបានសម្តែងការខកចិត្ត ដោយអះអាងថា ការដោះស្រាយពីអាជ្ញាធរ និងស្ថាប័នជំនាញហាក់មានភាពយឺតយ៉ាវ ដែលធ្វើឱ្យកើតមានការរិះគន់ជុំវិញប្រសិទ្ធភាពនៃការទទួលខុសត្រូវក្នុងការការពារសុខភាពសាធារណៈ និងបរិស្ថាន។

ទោះជាយ៉ាងណា ការចុះបិទទីតាំងដោយតុលាការ គឺជាវិធានការដែលអាចបង្ហាញថា ស្ថាប័នមានសមត្ថកិច្ចបានចាប់ផ្តើមអនុវត្តនីតិវិធីច្បាប់។ ប៉ុន្តែ ប្រជាពលរដ្ឋនៅតែចង់ឃើញការបញ្ជាក់ជាផ្លូវការ អំពីមូលហេតុនៃការបិទទីតាំង លទ្ធផលនៃការស៊ើបអង្កេត ព្រមទាំងការវាយតម្លៃផលប៉ះពាល់បរិស្ថាន និងសុខភាពសាធារណៈ ដើម្បីបង្កើនទំនុកចិត្ត និងតម្លាភាពក្នុងការអនុវត្តច្បាប់។

ជាមួយគ្នានេះ មតិសាធារណៈនៅតែស្នើឱ្យក្រសួង និងស្ថាប័នជំនាញពាក់ព័ន្ធ បន្តស៊ើបអង្កេតឱ្យបានម៉ត់ចត់ ពិនិត្យលើអាជ្ញាប័ណ្ណ ប្រតិបត្តិការផលិត ស្តង់ដារបច្ចេកទេស និងការអនុវត្តវិធានការការពារបរិស្ថាន ដើម្បីធានាថា រាល់អាជីវកម្មទាំងអស់ ត្រូវអនុវត្តស្របតាមច្បាប់ និងមិនបង្កផលប៉ះពាល់ដល់សហគមន៍។

អង្គភាព The Mirror News សូមស្វាគមន៍ និងរង់ចាំទទួលការបកស្រាយ ឬបំភ្លឺពីតំណាងទីតាំងអាជីវកម្មខាងលើ ក៏ដូចជាស្ថាប័នពាក់ព័ន្ធគ្រប់ពេលវេលា ដើម្បីធានាបាននូវតុល្យភាពព័ត៌មាន សេចក្តីត្រឹមត្រូវ និងការគោរពតាមក្រមសីលធម៌វិជ្ជាជីវៈសារព័ត៌មាន៕