នគរបាលខេត្តកណ្តាលអំពាវនាវឱ្យម្ចាស់រថយន្ត Mercedes-Benz S500 ចូលខ្លួនបន្ទាន់ ក្រោយបង្កគ្រោះថ្នាក់ស្លាប់ស្ត្រីម្នាក់ និងរបួស៤នាក់ នៅក្រុងតាខ្មៅ

(កណ្តាល)៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្តីប្រកាសព័ត៌មានបញ្ជាក់ពីករណីគ្រោះថ្នាក់ចរាចរណ៍ដ៏ធ្ងន់ធ្ងរមួយ ដែលបានកើតឡើងកាលពីវេលាម៉ោង ១១:២០នាទីយប់ ថ្ងៃទី២ ខែសីហា ឆ្នាំ២០២៦ នៅចំណុចមុខហាង 168 តាមបណ្តោយផ្លូវជាតិលេខ២១ ស្ថិតក្នុងភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល។

តាមការបញ្ជាក់ពីសមត្ថកិច្ច គ្រោះថ្នាក់នេះជាការប៉ះទង្គិចរវាងរថយន្ត Mercedes-Benz S500 និងម៉ូតូសណ្ដោងរ៉ឺម៉ក បណ្តាលឱ្យស្ត្រីម្នាក់ស្លាប់នៅកន្លែងកើតហេតុ និងមនុស្ស ៤នាក់ទៀតរងរបួសស្រាល។ មធ្យោបាយទាំងពីររងការខូចខាតយ៉ាងធ្ងន់ធ្ងរ។

ក្រោយទទួលបានព័ត៌មាន កម្លាំងជំនាញនៃអធិការដ្ឋាននគរបាលក្រុងតាខ្មៅបានចុះពិនិត្យទីតាំងកើតហេតុ ប្រមូលភស្តុតាង និងដកហូតមធ្យោបាយពាក់ព័ន្ធ រក្សាទុកដើម្បីអនុវត្តតាមនីតិវិធីច្បាប់។ ដោយឡែក អ្នកបើកបររថយន្តបង្ក មិនបានឈប់នៅកន្លែងកើតហេតុនោះទេ ដោយបានបើករថយន្តគេចខ្លួន រហូតទៅចតទុកនៅមុខកីឡដ្ឋានបាល់ទាត់ខេត្តកណ្តាល មុនពេលរត់គេចខ្លួន។

ការស្រាវជ្រាវបឋមរបស់សមត្ថកិច្ចបង្ហាញថា មូលហេតុនៃគ្រោះថ្នាក់ គឺបណ្តាលមកពីអ្នកបើកបររថយន្តវ៉ាជែងដោយខ្វះការប្រុងប្រយ័ត្ន បណ្តាលឱ្យបុកជាមួយម៉ូតូសណ្ដោងរ៉ឺម៉កដែលបើកបរបញ្ច្រាសទិសគ្នា ហើយបន្តរត់គេចពីកន្លែងកើតហេតុ។

សមត្ថកិច្ចបានកំណត់អត្តសញ្ញាណអ្នកបើកបររថយន្តបង្កថា ឈ្មោះ ស៊ឹង ស៊ុនសេង ភេទប្រុស កើតឆ្នាំ១៩៩១ មានទីលំនៅក្នុងខណ្ឌចំការមន រាជធានីភ្នំពេញ។
ជាមួយគ្នានេះ ស្នងការដ្ឋាននគរបាលខេត្តកណ្តាល បានអំពាវនាវឱ្យបុគ្គលខាងលើ ចូលខ្លួនមកការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកណ្តាល ជាបន្ទាន់ ដើម្បីអនុវត្តតាមនីតិវិធីច្បាប់ យ៉ាងយូរត្រឹមថ្ងៃទី៥ ខែសីហា ឆ្នាំ២០២៦។

សមត្ថកិច្ចក៏បានស្នើឱ្យសាធារណជន និងបណ្តាញសារព័ត៌មាន ទទួលយកព័ត៌មានផ្លូវការនេះជាមូលដ្ឋាន និងបន្តសហការជាមួយអាជ្ញាធរពាក់ព័ន្ធ ក្នុងការផ្តល់ព័ត៌មានដែលអាចជួយដល់ដំណើរការស្រាវជ្រាវ។

បន្ថែមពីលើសេចក្តីប្រកាសរបស់ស្នងការដ្ឋាននគរបាលខេត្តកណ្តាល ប្រភពពីមន្ត្រីជំនាញចរាចរណ៍ផ្លូវគោក នៃស្នងការដ្ឋាននគរបាលខេត្តកណ្តាល បានបង្ហើបប្រាប់ The Mirror News នៅថ្ងៃទី៤ ខែសីហា ឆ្នាំ២០២៦ ថា បន្ទាប់ពីគ្រោះថ្នាក់កើតឡើងភ្លាម ភាគីរថយន្តបានប្រគល់ថវិកាចំនួន ១,០០០ដុល្លារអាមេរិក ដើម្បីជួយសម្រួលការព្យាបាលជនរងគ្រោះនៅមន្ទីរពេទ្យ។

ប្រភពដដែលបានឱ្យដឹងបន្តថា ក្រោយទទួលដំណឹងថា ជនរងគ្រោះបានទទួលមរណភាព ភាគីរថយន្តបានជួយថវិកាចូលបុណ្យសពចំនួន ២លានរៀលបន្ថែមទៀត ហើយក៏បានបង្ហាញឆន្ទៈថា នឹងទទួលរ៉ាប់រងថ្លៃចំណាយក្នុងពិធីបុណ្យគម្រប់ ៧ថ្ងៃរបស់សពផងដែរ។

ដោយឡែក នៅថ្ងៃទី៤ ខែសីហា ឆ្នាំ២០២៦នេះ ប្រភពបានបញ្ជាក់ថា ភាគីបង្កបានធ្វើការដោះស្រាយសំណងជាមួយក្រុមគ្រួសារជនរងគ្រោះក្នុងទឹកប្រាក់ចំនួន ១៨,៥០០ដុល្លារអាមេរិក ហើយសាច់ញាតិជនរងគ្រោះបានព្រមទទួលយកសំណងនេះ។

យ៉ាងណាក៏ដោយ ការដោះស្រាយសំណងរដ្ឋប្បវេណី មិនប៉ះពាល់ដល់នីតិវិធីព្រហ្មទណ្ឌនោះទេ ហើយសំណុំរឿងនៅតែស្ថិតក្រោមការចាត់ការរបស់សមត្ថកិច្ច និងអាជ្ញាធរមានសមត្ថកិច្ច ស្របតាមច្បាប់ជាធរមាន៕