លោកអធិការ យី វណ្ណដា ដឹកនាំកិច្ចប្រជុំពិនិត្យវឌ្ឍនភាពការងារប្រចាំខែកក្កដា និងដាក់ចេញទិសដៅអនុវត្តការងារសម្រាប់ខែសីហា ឆ្នាំ២០២៦

(កណ្តាល)៖ ដោយមានការអនុញ្ញាតពីលោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាល នាព្រឹកថ្ងៃទី២៩ ខែកក្កដា ឆ្នាំ២០២៦ លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានដឹកនាំកិច្ចប្រជុំពិនិត្យវឌ្ឍនភាពការងារប្រចាំខែកក្កដា ឆ្នាំ២០២៦ និងលើកទិសដៅការងារបន្តសម្រាប់ខែសីហា ឆ្នាំ២០២៦ ដើម្បីពង្រឹងប្រសិទ្ធភាពនៃការអនុវត្តតួនាទី ភារកិច្ច និងការងារជំនាញរបស់កងកម្លាំងនគរបាល។

ក្នុងកិច្ចប្រជុំនេះ លោកអធិការ បានផ្សព្វផ្សាយផែនការរបស់ស្នងការដ្ឋាននគរបាលខេត្តកណ្តាល និងណែនាំដល់ផ្នែកជំនាញ ព្រមទាំងប៉ុស្តិ៍នគរបាលរដ្ឋបាលទាំង១០ ឱ្យបន្តយកចិត្តទុកដាក់ខ្ពស់លើការថែរក្សាសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ការផ្តល់សេវាសាធារណៈជូនប្រជាពលរដ្ឋ ការទប់ស្កាត់បទល្មើសចោរកម្ម ការបង្ការ និងបង្ក្រាបបទល្មើសគ្រឿងញៀន ជាពិសេសការបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ឱ្យមានប្រសិទ្ធភាពខ្ពស់។

កិច្ចប្រជុំនេះ មានការចូលរួមពីលោក-លោកស្រី អធិការរង លោក-លោកស្រីនាយផ្នែក លោកនាយប៉ុស្តិ៍នគរបាលរដ្ឋបាលទាំង១០ ព្រមទាំងមន្ត្រីផ្នែកសណ្តាប់ធ្នាប់ និងចរាចរណ៍ ដើម្បីរួមគ្នាពង្រឹងការអនុវត្តការងារ និងបន្តបម្រើប្រជាពលរដ្ឋឱ្យកាន់តែល្អប្រសើរ ស្របតាមគោលនយោបាយរបស់អគ្គស្នងការដ្ឋាននគរបាលជាតិ និងស្នងការដ្ឋាននគរបាលខេត្តកណ្តាល៕