ឯកឧត្តម នាយឧត្តមសេនីយ៍ ឈន សារ៉ាណេ អញ្ជើញជាអធិបតីក្នុងពិធីក្រុងពាលីសាងសង់អគារសិក្សា និងបណ្ណាល័យ នៅអនុវិទ្យាល័យកំពង់ក្រសាំង

(តាកែវ)៖ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ និងឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ នាព្រឹកថ្ងៃសុក្រ ទី១០ ខែកក្កដា ឆ្នាំ២០២៦ បានអញ្ជើញជាអធិបតីក្នុងពិធីក្រុងពាលីសាងសង់អគារសិក្សា បណ្ណាល័យ និងទីចាត់ការ នៅអនុវិទ្យាល័យកំពង់ក្រសាំង។

គម្រោងសាងសង់នេះ រួមមានអគារចំនួន ២ខ្នង ស្មើនឹង ៨បន្ទប់ ដែលមានទីតាំងស្ថិតនៅភូមិក្តុលជ្រុំ ឃុំកំពង់ក្រសាំង ស្រុកបូរីជលសារ ខេត្តតាកែវ។ គម្រោងនេះមានគោលបំណងពង្រឹងហេដ្ឋារចនាសម្ព័ន្ធវិស័យអប់រំ បង្កើនបរិយាកាសសិក្សា និងលើកកម្ពស់គុណភាពអប់រំសម្រាប់សិស្សានុសិស្សនៅក្នុងមូលដ្ឋាន។

ការសាងសង់អគារសិក្សា បណ្ណាល័យ និងទីចាត់ការថ្មីនេះ ត្រូវបានចាត់ទុកជាការវិនិយោគដ៏មានសារៈសំខាន់លើធនធានមនុស្ស និងជាការឆ្លើយតបទៅនឹងតម្រូវការអភិវឌ្ឍវិស័យអប់រំ ស្របតាមគោលនយោបាយរបស់រាជរដ្ឋាភិបាល ក្នុងការលើកកម្ពស់គុណភាពសិក្សា និងបង្កើតបរិយាកាសសិក្សាកាន់តែប្រសើរសម្រាប់យុវជនជំនាន់ក្រោយ៕