«ចែករំលែកដើម្បីស្នាមញញឹមកុមារ»៖ ទឹកចិត្តមនុស្សធម៌ដ៏ប្រពៃរបស់លោក ឈន សុខមានហេង និងក្រុមការងារ គួរឱ្យកោតសរសើរ

(ភ្នំពេញ)៖ ក្នុងសង្គមដែលពោរពេញទៅដោយការប្រកួតប្រជែង និងភាពមមាញឹកនៃជីវិតប្រចាំថ្ងៃ សកម្មភាពមនុស្សធម៌ និងការចែករំលែកក្ដីស្រឡាញ់ដល់អ្នកខ្វះខាត គឺជាគំរូដ៏ប្រពៃដែលគួរឱ្យលើកសរសើរ និងគាំទ្រ។

ជាក់ស្ដែង លោក ឈន សុខមានហេង កូនប្រុសរបស់ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ និង លោកជំទាវ សែម សម្ផស្ស បានបង្ហាញនូវសន្ដានចិត្តដ៏ថ្លៃថ្នូរ និងទឹកចិត្តមនុស្សធម៌ដ៏ប្រពៃ ដោយបានដឹកនាំថ្នាក់ដឹកនាំ បុគ្គលិកនៃបុរី សម្បត្តិ មានហេង៣ ព្រមទាំងសប្បុរសជន ចូលរួមចែករំលែកក្ដីស្រឡាញ់ ទឹកចិត្ត និងគ្រឿងឧបភោគបរិភោគជាច្រើន ជូនដល់កុមារកំព្រា ក្នុងកម្មវិធីសប្បុរសធម៌នៃមូលនិធិលោកតា ឈន សម្បត្តិ ក្រោមប្រធានបទ «ចែករំលែកដើម្បីស្នាមញញឹមកុមារ»។

កម្មវិធីដ៏មានអត្ថន័យនេះ បានប្រព្រឹត្តទៅនៅ មណ្ឌលកុមារកំព្រាព្រៃជុំ ខេត្តកំពង់ស្ពឺ កាលពីថ្ងៃទី៤ ខែកក្កដា ឆ្នាំ២០២៦ ដោយបាននាំមកនូវស្នាមញញឹម ក្តីសង្ឃឹម និងភាពកក់ក្តៅផ្នែកផ្លូវចិត្តដល់កុមារកំព្រាជាច្រើនរូប ដែលកំពុងត្រូវការការយកចិត្តទុកដាក់ និងក្តីស្រឡាញ់ពីសង្គម។

សារដែលលោក ឈន សុខមានហេង បានលើកឡើងថា «ក្រោមពិភពលោកតែមួយ តែវាសនាខុសគ្នា» ពិតជាបានឆ្លុះបញ្ចាំងពីការយល់ដឹងយ៉ាងជ្រាលជ្រៅចំពោះជីវិត និងបង្ហាញពីបេះដូងដែលពោរពេញដោយមេត្តាធម៌ ចេះអាណិតអាសូរ និងចង់ចែករំលែកភាពកក់ក្តៅដល់កុមារដែលខ្វះខាត។

សកម្មភាពមនុស្សធម៌នេះ មិនត្រឹមតែជាការផ្តល់ជំនួយសម្ភារៈប៉ុណ្ណោះទេ ប៉ុន្តែជាការផ្តល់នូវកម្លាំងចិត្ត ក្តីសង្ឃឹម និងសារមួយដ៏មានតម្លៃថា សង្គមកម្ពុជានៅតែមានមនុស្សល្អៗ ដែលមិនភ្លេចអ្នកខ្សោយ និងតែងតែយកចិត្តទុកដាក់ចំពោះកុមារកំព្រា និងជនងាយរងគ្រោះ។

សកម្មភាពដ៏ប្រពៃរបស់លោក ឈន សុខមានហេង និងក្រុមការងារ គឺជាគំរូដ៏ល្អប្រសើរសម្រាប់យុវជនជំនាន់ក្រោយ និងសង្គមទាំងមូល ក្នុងការលើកកម្ពស់វប្បធម៌ចែករំលែក ការស្រឡាញ់ និងការជួយគ្នាទៅវិញទៅមក ដើម្បីរួមចំណែកកសាងសង្គមកម្ពុជាឱ្យកាន់តែមានភាពកក់ក្តៅ និងពោរពេញដោយមនុស្សធម៌៕