លោកស្នងការ ឈឿន សុចិត្ត ចុះត្រួតពិនិត្យស្ថានភាពប៉ុស្តិ៍នគរបាលរដ្ឋបាលព្រែកឫស្សី ពង្រឹងការងារគ្រប់ជ្រុងជ្រោយ និងលើកកម្ពស់ប្រសិទ្ធភាពសេវាសាធារណៈ

(កណ្ដាល)៖ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល ដោយអនុវត្តតាមបទបញ្ជាចង្អុលដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅព្រឹកថ្ងៃចន្ទ ទី៦ ខែកក្កដា ឆ្នាំ២០២៦ បានដឹកនាំសហការីអញ្ជើញចុះត្រួតពិនិត្យស្ថានភាពការងារ និងសំណេះសំណាលសួរសុខទុក្ខកងកម្លាំងនៅប៉ុស្តិ៍នគរបាលរដ្ឋបាលព្រែកឫស្សី ចំណុះអធិការដ្ឋាននគរបាលក្រុងតាខ្មៅ។

ក្នុងឱកាសនោះ លោកស្នងការបានផ្តល់ការណែនាំយ៉ាងម៉ឺងម៉ាត់ ដោយផ្តោតលើការពង្រឹងប្រសិទ្ធភាពការងាររបស់ប៉ុស្តិ៍រដ្ឋបាល រួមមាន ការគ្រប់គ្រងកម្លាំង និងបញ្ជីវត្តមាន ការគ្រប់គ្រងភស្តុភារ សម្ភារៈ មធ្យោបាយ និងអគារស្នាក់ការ ការពង្រឹងការងារសន្តិសុខ និងការផ្តល់សេវាសាធារណៈ ការគ្រប់គ្រងមុខសញ្ញា និងបង្ការ-បង្ក្រាបបទល្មើសគ្រប់ប្រភេទ ព្រមទាំងការគ្រប់គ្រងស្ថិតិប្រជាពលរដ្ឋ ការចុះបញ្ជីស្នាក់នៅ និងការគ្រប់គ្រងជនបរទេសឱ្យមានប្រសិទ្ធភាពខ្ពស់។

ជាមួយគ្នានេះ លោកស្នងការក៏បានជំរុញឱ្យយកចិត្តទុកដាក់លើការកែលម្អសោភ័ណភាពបរិវេណអង្គភាព សុខភាពអនាម័យ និងលក្ខខណ្ឌរស់នៅរបស់មន្ត្រីនគរបាល ដើម្បីធានាបាននូវបរិយាកាសការងារល្អ និងបង្កើនប្រសិទ្ធភាពក្នុងការបំពេញភារកិច្ចបម្រើប្រជាពលរដ្ឋ។

បន្ថែមពីនេះ លោកឧត្តមសេនីយ៍ទោស្នងការ បានស្តាប់ និងទទួលយកសំណូមពរ ព្រមទាំងចំណុចខ្វះខាតនានារបស់ប៉ុស្តិ៍នគរបាលរដ្ឋបាលព្រែកឫស្សី ដើម្បីយកទៅសិក្សា វាយតម្លៃ និងស្វែងរកដំណោះស្រាយសមស្រប សំដៅលើកកម្ពស់គុណភាពការងារ និងការបម្រើសេវាសាធារណៈឱ្យកាន់តែមានប្រសិទ្ធភាព និងទទួលបានទំនុកចិត្តពីប្រជាពលរដ្ឋ៕